¹ Kumanima Yesu wabutukidi ku betelehemi dia Ayuda mu tangwa diakhedi Erodi fumu kaka mu matshiku menamana Anganga akhedi kulonguka tutumbwa akatukidi kwimbu diowu kwenda kuhudikila tangwa atudidi ku Yeluselemi ni kwakula etsi ² Mwehi fumu wa Ayuda wakatuka kutetuka. Kikuma etu twamonanga katumbwa kenji kwenda kuhudikila tangwa tweza ku mu sambila. ³ Tangwa diedidi fumu Erode wevwa kienekina wekhina mutshima mu hulu ni athu oshu ku Yeluselemi. ⁴ Erode wa wongikidi Anganga Nzambi ni Tulaki wa wehula etsi kwehi Khidishitu afeti kutetukila. ⁵ Eni etsi Ku Betelehemi dia Ayuda kikuma kienikioki masonomini kudi mbikudi ⁶ Ayi Betelemi thothu ya Ayuda wushiku dimbu ditsiotu mu katsi ka membu ma Zude kikuma fumu mujima wakawudika kudi ayi mweni wa katwadisa ni kutala kikanda kiemi kia Yisaleli. ⁷ He Erode watambikidi mu kitsweki Anganga mu kwijika tangwa diamwekinini tutumbwa. ⁸ Wa watumini ku Betelehemi wa waleza etsi ndenu nuhudi kamu mwana kalengi yivwa nwa mumona nwiji nu ngu leji ni ami niendi ku mu sambila. ⁹ Kiela evwa ndaka ya Fumu endidi mu mbala yimoshi amweni katumbwa akana kamweni kwenda kuhudikila tangwa kayanjika kwenda kumesu mowu tii kaya kumakana akhedi mwana. ¹⁰ Kia mweni katumbwa azadidi ni kieshi kingi. ¹¹ Engingi munzu amweni mwana ni mama enji Madiya. Afukimini amusambila. A kasuludidi mawaba mowu amuhwa milambu wola palata ni mire. ¹² Nzambi wa walejidi ku ndoji aleki kuvutukila mu djila ya Erode kienikioki avutukidi kwimbu diowu mu djila yekha. ¹³ Kiedidi eni aya Wanjio wa fumu wejidi kumwekana kudi Yosefi ku ndoji wa muleza etsi Zanguluka nona mwana wa kalengi ni mama enji tshina ku Ngipiti kikuma Erode wenda wahenga mwana mu kumujiya. Wukhadi kokhu tii hohu niaka kulejila etsi vutuka. ¹⁴ Pipa yeneyina Yosefi wa tokama wa nona mwana ni mama enji waya nawu ku Ngipiti. ¹⁵ Wakhedi khoku tii lutsiku lwa fidi Erode. mambu menamana mahangimini mu kulungisa ndaka yakudidi fumu mu kanu dia mbikudi wenji Nia tambika mwanemi awudiki ku Ngipiti. ¹⁶ Tangwa diamweni Erode etsi Andwenga amuhuna wevidi kamu khabu. Watumini Asuta ku Betelehemi ni mu membu makhedi penapena endi kujiya ana amala oshu akhedi ni mvula jadi ni awa aleka kadi kutudisa mvula jadi. Wahangidi kienekina kikuma watangidi matshiku mahitidi katuka tangwa Anwenga amweni tutumbwa. ¹⁷ Moshu menamana mahangimini pila yakudidi mbikudi Yelemiya etsi ¹⁸ Yivwenu ndaka ku Rama yidilu ni mabokuta ma Rashel wenda wadidila ana jienji waleka muthu kamubondila oku kikuma ana jienji afwa. ¹⁹ Kiela Herode wafwa tala wanjio wa Fumu wejidi kumwekana ku ndoji kudi Yosefi ku Ngipiti wa muleza etsi ²⁰ Zanguluka nona mwana ni mamenji vutuka ku Yisaledi kikuma awa edidi kumujiya aafwa. ²¹ Yosefi watokimini wa nona mwana ni mamenji wa vutuka ku Yisaledi. ²² Kashi kievidi etshi Arklawusi wekhina fumu ku Zude apalashi ya tatenji wevidi woma mu kwenda He Nzambi wa muleza ku ndoji mu kwenda ku thothu ya Ngadidi ²³ wendidi kujinga ku vidi dia Nazaleti.Mambu menama malungishidi ndaka jiakudidi a mbikudi etshi eni edi akwa Nazaleti.