¹ Yilumbu yisambenu ya hitidi Yesu wa nonini Petulu Jaki ni pangiendji Yowani waya nawu ha wulu dia mundonda wumoshi wulaha. ² Mweni wakhedi kubejimina mbunzu yendji ni kukedia mu tangwa miledi yendji yekhinini ku kejimina mudi mwania. ³ Tala he Moshi ni ELiya a wa wudikila ayandjika kwakula ni mweni. ⁴ Petulu wa lejidi Yesu etshi Fumu yidi mboti kudi etu kitudi henaha. Yivwa wa kumbula nia ka tunga manzu masatu henaha yimoshi yayeyi yekha ya Moshi yikowu ya Eliya. ⁵ Mudi mweni kiakhedi kwakula epi tuta dimoshi diakhedi ku kejimina dia wa winda ndaka yimoshi ya wudikidi ni kwakula etshi Tala mwana wemi wu nia hitangana kuzola wenda ku nguhwa kieshi. Mwivilangenu. ⁶ Tangwa alonguki evidi kienekina abwidi hashi mbunzu matadidi lo ni woma woshu. ⁷ He Yesu weza wa wa kwata wakula etshi Zangulukenu nu khala oku ni woma. ⁸ He eni atadidi ku wulu kashi ni kumona muthu lo kaka Yesu. ⁹ Eni kia kulumukanga Yesu wa wa leza etshi Mambu ama moshu mahita oku nu lezoku muthu tii hohu mwana muthu a katokama mu lufwa. ¹⁰ Alonguki mwena wana a mwihula etshi Kikuma kiakhi amalongi ma jitsiku enda kwakula etshi Yidi mboti Eliya a thethiki kwiza. ¹¹ Yesu wa wa vutudidi etshi Mu kwakula kwa pimbu Eliya wakeza mu kuhangika mambu moshu. ¹² Kashi ami nia nu leza etshi Eliya weza kadi kashi heni ka mwijikidiku. Eni a mu hangidi pila ya luzolu lowu. Kitezu kimoshi kioki mwana muthu wa ka niokwama ku mokhu mowu. ¹³ He alonguki a bakisa kia etshi mweni wa walejidi mu kikuma kia Yowani mbotika. ¹⁴ Kiela a vutuka kwakhedi Hundji muthu mumoshi wejidi kudi Yesu wa fukimini kutwala yendji wakula etshi ¹⁵ Fumu evila mwana emi khenda kikuma mweni wenda kukonia wenda wa mona pashi jingi. Mbala jiekha wenda kubwa ku jiku to mu meya. ¹⁶ Ami niendi nendji kudi alonguki jieyi kashi eni kakukidiku ku mu wuka. ¹⁷ Yesu wa vutudidi etshi Kikanda kia athu nudi mitshima mia kola mia zala ni kubola ma tangwa mangahi ni ku nu kashila mutshima Mu ndeyinenu nendji oku. ¹⁸ Yesu wa nganina Pevi ya bola ya wudika mudi mweni. ¹⁹ He alonguki apusana penapena ni Yesu mu kitsweki a mwihula etshi Kikuma kiahki etu twalekanga kukaya pevi mweneyina. ²⁰ Yesu wa wa leza etshi Kikuma kia lukwikilu lwenu lutsiotu. Kashi ami nia nu leza ni kiedika kioshu etshi yivwa nudi ni lukwikilu mudi kidi kheni ya mutardi enu nwa lunga kwakula kudi mundonda owu etshi Katuka ahudi nda wukhadi hahana wu ku kutumuka kushiku ni kima ki nu kodila. ²¹ Kashi pevi ya pila mwenehi yenda kuwudika mu ngolu jia yisambu ni kujila kudia. ²² He kia khedi ku Ngadidi Yesu waleza alonguki jiendji etshi Mwana muthu a ka mukapa kumokhu ma athu ²³ ena wana a ka mujiya mu kilumbu kia kisatu wa katokama mu lufwa. Alonguki ekhinini khenda khenda. ²⁴ Kiela atula ku Kapernawumi Tulaki twkhedi kufutisa kitadi kia nzu ya Nzambi eza kudi Petulu a mwihula etshi Fumu enu kendoku kufuta kitadi kia Nzu ya Nzambi. Mweni wakula Ee. ²⁵ Tangwa diendidi Petulu munzu ya Nzambi Yesu wa thethikila kwakula kudi Petulu etshi Ekhi wu ku banzanga Simoni a fumu ha hashi kudi nani enda kunona kibawu kudi athu jiowu to kudi a nzenza. ²⁶ Tangwa diela Petulu wa vutula etshi kudi anzenza Yesu wa mu leza etshi boshu athu jiowu kendoku kufuta. ²⁷ Kashi mu kuleka kuhangisa tulaki masumu ndanga wumbi ndobu mu meya Shiya wu wukuthethikila kukwata tangwa di wu ku mu tala mu kanwa wamba kumona kibenda kimoshi. Wu kinoni wi kiwu tulaki kikuma kia ayi ni ami.