¹ Mu tangwa mwenedina Yesu wakhedi kuhita mu kilanga kia ble lutshiku lwa lumingu. Alonguki jienji akhedi ni nzala ayanjika kuhela kheni jia ble ni kudia. ² Kashi kiela a Fadishi a wamona aleza Yesu etsi tala Alonguki jieyi enda ahanga mambu ma lekisa tshiku yetu mu lutshiku lwa lumingu. ³ Kashi Yesu wa walejidi etsi Enu nwa tangidiku kadi mambu ma hangidi Davidi ni athu jienji tangwa diakwatiwidi nzala lutshiku lumoshi. ⁴ Kiengididi mu nzu ya Nzambi mweni ni athu jienji ayanjika kudia mapa mahanini athu kudi Nzambi makhedi ni kijila mu kuleka ku madia kaka a nganga Nzambi alendaku madia. ⁵ Nwa tangidiku mu tshiku jia Moshi etsi lutsiku lwa lumingu a Nganga Nzambi enda kuhanga mu nzu ya Nzambi kendoku kubwa mu tshiku ata ajiya tshiku ya Lutshiku lwa lumingu. ⁶ Kashi nia nuleza mambu ma nu kumonanga aha mahita nzu ya Nzambi. ⁷ Yivwa enu nwejiya thendula ya mambu masonama etsi Ami nwividingi athu ekha khenda kashi makabu ma ambiji lo. ⁸ Kikuma mwana wa muthu wudi Fumu wa lumingu. ⁹ Tangwedi he Yesu wakatuka henahana waya ku nzu ya yisambu. ¹⁰ Kweno kuna kwakhedi ni muthu mumoshi kokhu kifu. Eni akhedi hohu akhedi kuhenga djila ya kufunda Yesu henihohu a muhudidi etsi tsiku yetu yenda kuhana djila ya kuwuka athu lutshiku lwa lumingu to lo. ¹¹ Yesu wa wavutudidi etsi Yivwa muthu mumoshi mu katshi kenu wudi kaka ni mukoku wumoshi yivwa mukoku wabwamu buku mu lumingu kalungidiku ku wu wudisa. ¹² Muthu wudi thalu hitila mukoku. Kienikioki tshiku yetu yenda ya hana djila mu kuhanga pimbu mu lumingu. ¹³ He Yesu waleza muthu mwenoyuna etsi tandulula khokhu dieyi. Waditandulula diakola diekhina mudi dikowu. ¹⁴ Kashi Afadishi awudika mu nzu ya Nzambi aya kuhanga fondu dia kuhenga djila ya ku mujiya. ¹⁵ Kiela Yesu wa wabakisa wakatuka henahana athu lawu amu labidi wawukidi akhashi oshu. ¹⁶ Wa walekishidi mu kuleza athu nani mweni akhedi. ¹⁷ Mahangimini kienekina mu kulungisa makudidi mbikudi Yesaya. ¹⁸ Nzambi wakudidi etsi Talenu musadi wemi wu nia sodidi nia muzola nidi ni kieshi kingi kikuma kia mweni. Nia ka muhwa Pevi yemi mu kwiza kuleza makanda moshu fundusu. ¹⁹ ka katenda oku ni muthu ka kanganina oku muthu ka kabuloku kudiakudila mu balabala. ²⁰ Kaka vukoku luyiji lwa lembwa mwinda wukufwetalalanga ka ka wujima oku. Wa kabula kuhanga kienekina tii koku kwaka kengishila masonga. ²¹ Makanda moshu ma ka mushila mutshima. ²² He anehinini Yesu muthu mumoshi wakhedi ni pevi jia bola. ²³ Wakhedi kamama pofu ni pevi jia bola Yesu ma mu wukidi wayanjika kwakula ni kutala wudi mwana wa Davidi ²⁴ Kashi kiela Afadishi evwa kienekina eni etsi muthu oyu wenda wakaya pevi jia bola mu ngolu jia muhwa Satana wudi fumu wa pevi jia bola. ²⁵ Kashi Yesu wejikidi mabanza mowu wa waleza etsi kifumu kinwanganga ki kufwa. Membu to Yikanda ya athu yinwananga kakujinga oku pimbu. ²⁶ Yivwa Satana wa kaya muthu wenji wenda wa kapisa kifumu kienjimweni. Khia mutshindu kifumu kienji kia lunga kujinga. ²⁷ yivwa ami nienda nia kaya Satana mu ngolu jia Belezebule nani wenda kuhwa ana jienu ngolu ya kuwakaya. Kikuma athu jienu aku nu bedisanga. ²⁸ Kiashi yivwa ami nienda nia wudisa pevi ya bola mu ngolu jia Pevi ya Nzambi ejikenu etsi kifumu kia Nzambi kidi mu katshi kenu. ²⁹ Kiehi muthu alunga kwingila mu ngolu munjia muthu mu moshi wa ngolu akabi yima yenji. Afeti thethi kukasa muthu mwenoyuna misinga kumanima walunga kukaba yimas yenji yoshu. ³⁰ Oyu wakonda kukhala ni ami wudi mbeni wemi oyu wukulekanga kutsadisa ami mu kuwongika wenda wamwanga. ³¹ Henihohu nia nuleza etsi Athu oshu ahanga kubola ni kusawula Nzambi wa kawavidishila kashi oyu wa sawula Pevi ya Longu kaka muvidishila oku. ³² Koshu muthu wasawula mwana muthu Nzambi wa kamuvidishila kashi koshu muthu wakula mambu mabola kudi Pevi ya Longu zambi kaka muvidishila oku yikhadi kikimweni to kumanima ma lufwa lwenji. ³³ Yivwa nwa kuna mutondu wa pimbu yidingi yoyu yikukhala pimbu nukuna mutondu wa khadi yidingi yoyu yi kukhala khadi. ³⁴ Enu nudi ana a yiwuta khia mutshindu nwa lunga kwakula mambu ma pimbu kudi athu ki nudi nwabola kanu dienu dienda kwakula mambu menda medi mazala kumutshima wenu. ³⁵ Muthu wa pimbu wenda kwakula mambu ma pimbu kikuma wudi wazala ni mambu ma pimbu ku mutshima wenji. kashi muthu wabola wenda kwakula mambu mabola medi ku mutshima wenji. ³⁶ Nienda nia nuleza etshi lutshiku lwa kazenga mambu ma athu waka wasambisa kikuma kia mambu moshu ma konda fhunu menda kwakula. ³⁷ Kwakula kweyi kwalunga kukunungisa kwa lunga epi kukubedisa. ³⁸ A fumu a jitshiku ni Afadishi ekha amuvudidi Yesu etsi Longi twazola wutuleji kidimbu kimoshi. ³⁹ Kashi Yesu wa wavutudila etsi athu abola ni akonda lukwikilu enda kuhenga kidimbu kashi kaka waleza oku epi kidimbu kiekha kaka ekina kia Yona wakhedi mbikudi. ⁴⁰ kikuma mudi kiahangidi Yona matshiku masatu muvumu dia shiya Kienikioki mwana wa muthu epi wakahanga mu mavu matshiku masatu ni pipa jisatu. ⁴¹ Akwa Niniwe aka nu funda lutshiku lwa keza kusambisa athu kikuma eni abaludidi mitshima tangwa dievidi malongi ma Yona. Kashi ami nidi haha niahita Yona. ⁴² Fumu-Nkentu wakakatuka ku thunda wakeza ku nu funda mu lutshiku lwa kasambisa athu ni ndonga ya athu akabedisa kukima mweni wakakatukila kwalaha weza kwivwa mambu mamayela ma Salomon. Kashi nidi haha niahita Salomon. ⁴³ Yivwa Pevi ya bola yimoshi yawudika kudi muthu yenda kwenda ni kuyungana mu tseki kikuma kia kuhenga hamakhedi kashi yivwa kamweniku homa hakukhala ⁴⁴ Oyumweni yi kuzenga etsi niku vutuka kunjiemi ku nia katukidi yivwa ya vutuka yaya kuwana nzu ayi komba yawaha. ⁴⁵ Tangwedi ya vutuka yaya kunona pevi jiokwu jiahitangana kubola tsambwadi eza kujinga munzu mweneyina.He muthu mwenoyuna wukwikhina kubola hitila mbala ya thethi. Yakakhala pila yimoshi kudi enu nudi nwa bola. ⁴⁶ Yesu kiakhedi kwakula kudi hunji dia athu mama enji ni apangi jienji ejidi amakana hanji ni kuhenga pila ya kusolula nenji. ⁴⁷ Muthu mumoshi wa muleza etshi tala mama eyi ni apangi jieyi edi hanji azola kusolula ni ayi. ⁴⁸ Kashi Yesu wa mu vutudidi etshi Nani wudi mama yamemi a pangi jiemi edi amakana hanji akuzolanga kumbona anani. ⁴⁹ Kumanima watandulula khokhu kwakhedi alonguki mweni etsi tala mama ni apangi jiemi. ⁵⁰ Kikuma koshu muthu wenda kuhanga mambu menda kuzola Tata ya memi hudi ku hulu mweni wudi pangi wemi wa yala to wa mikhetu wudi epi mama ya memi.