¹ Yesu kia tala kuku ni kuku wamona a mvwama akhedi kushia makabu mowu. ² Wamoweni epi mufidi wa muhetu wakhedi tsukami mumoshi washidi pata jiadi jia fwalanga. ³ He mweni wakula nia nuleza mu kiedikika kioshu etshi mufidi oyu washia hitila enu oshu. ⁴ Athu oshu a hana makabu makonda fhunu. Kashi mufidi oyu washia jioshu jiakhedi naji mu lujingu lwendji. ⁵ Mudi kiakhedi kwakudila athu ekha nzu ya nzambi kia yakhedi ya kuwedika ni mayala kasu ni makabu ⁶ mweni wa waleza etshi Yosu eyi ni nu kumonanga mu yilumbu yikwiza kumesu kwaka sala oku ata yala dimoshi moshu makabwa. ⁷ Eni a mwihula etshi Longi tangwa ekhi mambu menamana makabwa e e. Yidimbu ekhi ya ka mwekana kia kela mambu meni mabwa. ⁸ Yesu wa wavutudidi etshi Dikebenu ka nu hunoku. Kikuma athu lawu akeza mu jina diamemi aka bula kwakula etshi Oyu ami tangwa dia lunga nu wa laba oku. ⁹ Tangwa di nwa kevwa enda akudila ndjita ni athu ayandjika kijiyangana nu di yangisoku kikuma yoshu eyina yifeti kubwa kashi tsuka ya mambu ya kasudila. ¹⁰ He wa waleza etshi ndjita ya kabwa mu katshi ka thothu ni thothu yifumu ya kabula ku nwana ni yifumu yekha. ¹¹ Kwa kakhala kunikana kwa mavu kwa ngolu muma lawu nzala ni makhashi ya kangila. Kwakeza epi mambu ma pashi ma kahangama ni yidimbu ku wulu. ¹² Kashi mambu ama mukuhangama thethi a kabula ku nushia mokhu ni ku nuhwa pashi a ka bula ku nu funda mu ma nzu ma yisambu ni ku numba mu boluku ¹³ a ka bula ku nusenda kumesu ma fumu ni a kuvernere kikuma kia jina diamemi. ¹⁴ Menamana moshu maka nuhwa ndjila ya kuhana kithemu. Nu khala oku mitshima keneni mu ma nwaka bula kwakula ¹⁵ kikuma ami nia ka nuhwa ndaka ya kedimina ni ya kimbaku kia kwakudila mbeni ka kakhala oku ni ndaka ya ku nu bangulula. ¹⁶ Kashi enu a kabula ku nu sumbisa kudi a tata jienu ni a pangi jienu ni kudi a nduku jienu a ka jiya athu lawu mu katshi kenu. ¹⁷ Enu aka nu menga kudi athu kikuma kia jina diamemi. ¹⁸ Kashi ketshi lushuki lwenu lumoshi lwa ka bila oku. ¹⁹ Mu kukasa kwenu kwa mutshima enu nwa kahulusa mioyi wenu. ²¹ Tangwa di nwa kamona Yeluselemi a dijieta kudi asuta ejikenu he etshi kufwa kodi kwa kokuluka. ²⁰ Kienikioki awana a kakhala ku zude a katshina mu mindonda awana a kakhala ha katshi ka vidi a kenda ekha a kakhala mu khulu a kengila oku. ²² Kikuma ya kakhala yilumbu ya ndola ya Nzambi mudi ki medi ma kusonika. ²³ Pashi kudi akhetu a kakhala ku mila miadi ni awana a kabwila kunwisa ana mayedi yilumbu mwene yina. ²⁴ Kikuma kwa kakhala pashi lawu mu thothu yoshu ni khabu kudi athu. Aka bula ku wavuka ni ji njangu ni ku wa senda mu kihika mu thothu mu membu moshu tii kooku apakanu a niokudi Yeluselemi ti tangwa dia ka lunga. ²⁵ Kwa kakhala yi yidimbu ku tangwa ni ku ngondi ni ku tutumbwa. Hashi kama ha kakhala ni woma kudi makanda moshu mayama ma mawuwu maka wevisa woma. ²⁶ Athu a kafila woma mu kubanzanga pashi ji kubwila thothu yoshu kikuma ngolu jioshu jia ku wulu ia ka nikana. ²⁷ He a kamona mwwana muthu ni kwiza kukulumuka mu matuti ni ngolu jioshu mu khembu. ²⁸ Tangwa dia kabula kuhangama mambu menama tokamenu nu thuthi mutwa wenu kikuma tangwa dienu dia kukatuka mu wuhika dia lunga. ²⁹ Yesu wa watedidi kingana kimoshi etshi Talenu mutondu wa ma figi ni mitondu eyina yekha. ³⁰ Tangwa di nwa mona mayiji mayandjika kumena ejikenu kadi etshi yibundu ya kola. ³¹ Kitezu kimoshi nu mona mambu ama moshu mahita ejikenu etshi kifumu kia Nzambi kiatula penapena. ³² Mu kiedika ni ku nulezanga athu a tangwa mwenedi a ka khala ni oyi tii kooku mambu ama makabwa. ³³ Wulu ni mavu ma kayita kashi ndaka jiemi jia ka hita oku. ³⁴ Dikebenu enu mweni mitshima mienu mileku kuzala ni mambu ma pamba pamba ni kuzela kwa maluvu ni mabanza ma pashi jia lujingu kikuma kilumbu mwenekina kileki kunwijila mu kitwatwatwa ³⁵ mudi muhetu. Kikuma ma keza kudi athu oshu enda kijinga hashi. ³⁶ Sungulukangenu tangwa dioshu sambilangenu nzambi nu swakadi kukhala ni tshidi jia kutshina mambu menamana makeza hashi enu nwa ka mwekani nwa makana kumesu ma mwana wa muthu. ³⁷ Henihohu yilumbu yakhedi kulonga Yesu mu nzu ya nzambi wakhedi kwenda kulangala mu mindonda mia olive. ³⁸ Athu oshu akhedi kwiza mu bwididi kudi mweni mu nzu ya yisambu mu ku mwivwa.