¹ Lutshiku lumoshi mu posa Tangwa diakhedi kwenda ku nzu ya Fumu mumoshi wa Fadishi mu kudia Afadishi akhedi ku mu tala ni mayela mosu. ² Tala kwejidi ni muthu mumoshi kuthwala yenji wkhedi ni makhashi menda kunanisa mwila. ³ Yesu wehudidi athu ejika tshiku jia Ayuda ni Afadishi etshi Tsiku yenda ya hana njila to lo mu kuwuka mu lutshiku lwa posa. ⁴ Kashi eni adibatidi. He Yesu wa mu kwata wa mu wuka wa mu tusula waya. ⁵ Wa waleza etshi nani mu katshi kenenu wudi ni mwana to ngombi wenji kwivwa wabwa mu buku lutshiku lwa posa ka ku mu wudisa oku swalu swalu. ⁶ Ka kukidiku kuhana mvutu mu mambu menamana. ⁷ Tangwa diela Yesu wamona kiehi athu atambikidi akhedi ku sola palashi ya hitangana lukumu wa watedidi kingana mweni etshi ⁸ A ku tambika ku feti dia wala wu henganga oku kwenda kushikama homa ha hitangana lukumu mbala jekha kudi ni muthu mwekha watambikidi wa kuhita ayi lukumu. ⁹ Tangwa diamba kutula mukwa Feti wuku kuleza etshi hwanga muthu mwekha palashi eyi ni soni jioshu wu kwenda kuhenga palashi ya kumanima. ¹⁰ Kashi tangwa dia kutambika ayi nda wushikami a palashi ya ku manima kikuma Muthu wa kutambikanga yivwa watula wu ku kuleza etshi Ndoyi nda wushikami ku mesu. Kienekina wu kunona lukumu ku mesu ma athu awudi kudianga nawu ha mesa. ¹¹ Kikuma Koshu wukudi zangulanga a ka mu kulumusa koshu epi wadi kulumusa aka muzangula. ¹² Yesu wakula epi kudi muthu oyuna wa mu tambikidi etshi Yivwa wa hangisa feti wu tambika oku kashu a ndoyi jieyi to a pangi jieyi to kikanda kieyi to a vwama a wudi nawu penapena kikuma etshi ni eni a ku tambika kama kilumbu yivwa lo ya kekhina lufutu lweyi. ¹³ Kashi yivwa wazola kuhangisa feti tambika awayi ni athu edi ni yifu mu mwila yikata ni athu edi mesu mafwa ¹⁴ Wa ka khala ni kieshi kikuma eni keshiku ni kima kia ka kufuta. Kikuma lufutu lweyi ludi tangwa diaka kafutumuka athu a mboti mu lufwa. ¹⁵ Tangwa dievidi muthu mumoshi wakhedi wa shikama a mesa ni Yesu mambu menamana wa mu leza etshi kieshi kudi muthu oyu wakadia mapa mu kifumu kia Nzambi. ¹⁶ Kashi Yesu wa mu leza etshi muthu mumoshi wahangidi feti dijima watambika athu lawu. ¹⁷ Tangwa dia tula penapena mu kudia wa tumini athu jienji a kisalu mu kwenda kuleza athu atambikidi esthi Yizenu kikuma yima yosu yidi ya kukubika. ¹⁸ Owu oshu ayanjikidi kulomba ndolula pila yimoshi. Wathethi wa mulejidi etshi nia sumbidi kilanga ni feti kwenda ku kitala. ¹⁹ Ngu vidishidi yivwa wa zola. Mwekha etshi nia sumbidi a ngombi kumi niaya kuwa meka. ²⁰ Ngu vidishidi yivwa wa zola. Mwekha epi wakudidi esthi nia katuka kukwela henihohu nia leka kwijila. ²¹ Musadi wa vutukidi kudi fumu enji wa muleza mambu menamana mosu. He Fumu wevwa khabu wa leza musadi wenji etshi ndanga tswalu mu mukhidi ni mu mazandu wu nehi awayi athu edi ni yifu mu mwila a pofu ni yikata. ²² Musadi etshi Fumu nia hanga pila yi wa ngulezanga kashi palashi jia pamba jidi kaka. ²³ Fumu enji etshi ndanga mu ji njila jijima ni jitsiotu wu wengishi mu kingolongolo kikuma nzu yemi yizadi. ²⁴ Kikuma nia nu leza etshi ata muthu mumoshi lo wunia tambikidi wu kudia madia mu feti dienedi. ²⁵ Athu lawu akhedi ku mu laba mweni walumuka wa waleza esthi ²⁶ Yivwa muthu wazola kwiza kudi ami mu kukhala mulonguki wemi afeti kusisa tata enji ni mama enji ni apangi jienji akhetu ni amala ni lujingu lwenji. ²⁷ Koshu waleka kuzangula kulunji dienji weza ku ngu laba kalungidiku kukhala mulonguki wamemi. ²⁸ Kikuma nani mu katshi kenenu wa zola kutunga nzu ya etaje thethi aleki kushikama atadi fwalanga jingahi edi naji ejiki ji kwa edi naji fhunu mu kulungishila. ²⁹ Yivwa lo tangwa dia kushia mufulandala ka kukuka oku kuyi manisa athu oshu akuyanjika ku mu seya ni ku ³⁰ muleza etshi muthu oyu wanjikidi kutunga kashi kakukidiku kumanisa . ³¹ Khia Fumu wazola kwenda ku njita ni fumu mwekha aleka kuhula mulongi yivwa wa lunga kukuka kunwana ni asuta mafunda kumi ni Fumu mukowu wudi ni asuta makumi madi wu kwizanga ku mu nwanisa. ³² Yivwa lo kiedi khadi mukowu kwa laha wu kutuma ngenji mu kwenda kuhenga pila ya kwivwangana. ³³ Henihohu kushiku ni muthu mu katshi kenenu wa lunga kukhala mulonguki wemi yivwa kalekidiku kimvwama kienji kioshu. ³⁴ Mungwa wudi kima kia mboti kashi yivwa munzenzu wahwa woshu wa sululuka. ³⁵ Fhunu yowu yahwa pila ya ku wushia mu yithothu lo. A wu kokonga ashi. Leka muthu wudi ni mathu makwivwila evi.