¹ Yuda muhika wa Yesu Khidishitu pangi wa Jaki nienda nia sonika kudi enu apangi jiemi nwa sodiwa kudi Nzambi nwenda nwa jinga mu luzolu lwa Tata Nzambi nuku kebiwanga kudi Yesu Khdidishitu. ² Leka khenda ngemba ni luzolu lwenji lukhadi lwingi kudi enu. ³ Apangi jiemi nia hangidi ngolu muku nusonikina mu kikuma kia kuhuluka kwetu osu. Niazola kunu sonikina mu kunuhwa kikesa khalenu ngolu mu kunwanina lukwikilu lwa theti lu nwa nonini mbala yi moshi. ⁴ Kikuma mu katshi kenemu mwengila athu amoshi ambi mu kitsweki asodiwa mu kwenda ku lufwa. Edi athu akonda lukwikilu enda kwalumuna tsangu ya mboti ya Nzambi mu mambu maku sepidisa mwila wowu ni kuvwenza fumu Yesu Khidishitu. ⁵ Kikimweni nia zola kunu bambukisa etshi fumu wa hulushidi kikanda kimoshi ku Njipiti kashi wa jiyidi awana alekidi kukwikila. ⁶ Wa jiyidi epi awanjo awana alekidi kukeba palashi yowu ya kifumu kia wahwedi Nzambi kashi ashisa homa ha bathu he Nzambi wa womba mu pipa enaha ashi awakasa mishinga ya yibende enda kumakinina kilumbu kia lufwa luowu. ⁷ Ebukenu Sodomu Gomolu ni mavula ma pena pena athu a membu menamana adi hanini owu mweni mu kuta mbongi ahangilanga mabanza ma kimuthu mudi ambiji edi ni ndola ya kuhia thuya twa mvula ni mvula. Yidi mbandu ya haniwa kudi enu mu kunu kebisa. ⁸ Ejikenu etshi athu mwenawana mabanza mowu mabola menda ma wa senda mu kubebisa mwila wowumweni eshiku kujiyanga kifumu kia Nzambi enda epi atukana luyalu lwenda kuhwa Nzambi lukumu ku wulu. ⁹ Ata mbuta dia wanjo Michel kiakhedi ku tenda ni Satana kikuma kia Moyise kasadidiku kumu tukana kashi wa mulezidi kaka etshi leka fumu akuwu ndola. ¹⁰ Kashi athu awa enda atukana mambu ma kulekanga kwijika enda hanga mambu mudi ambiji enda kukhala mutemu yosu ya kuhanganga yenda ya wa senda mu lufwa luowu mweni. ¹¹ Pashi jingi kudi eni kikuma alabidi njila ya sodidi Kayinu adihanini mu wiji wa wakaba mbongu abwa mu wilaya balami osu afidi kikuma engididi mu kijeneshi mudi akwa Cora. ¹² Edi athu amoshi enda kuzanga mafeti menu tangwa dinwenda kuwaningina bosu a pangi. Enda kuhanga mambu ma soni mu amafeti azola kidia hengi kikuma akuti kaka eni. Edi mudi matuti makonda mvula muhunga wenda ku makatula konda pashi. ¹³ Edi mudi mitondu yenda kumena mu kishiwu yikubutangoku mbuma. edi afwa mbala jiadi Nzambi waka watumuna. ¹⁴ Enoki mujikulu wa Adam walondidi mamabu makeza mweni etshi tata yesu wakeza ni mafunda ni mafunda ma athu jenji a vedila. ¹⁵ Wakeza mu ku sambisa makanda mosu medi mu kifutshi waka bedisa athu awa osu ahanganga mambu ma bola etshi mosu mahanganga makhediku ni fhunu ni zindaka jiosu jia bola jiakukanga athu amoshi kudi mweni. ¹⁶ Edi athu amoshi enda kubokuta enda kukhala ni mabanza mabola menda kuhangila edi lulendu lwingi kikuma kia kulengula akowu. ¹⁷ Kashi enu apangi a luzolu ebukenu mambu ma mulongidi athumwa a fumu Yesu Khidishitu. ¹⁸ Mu tangwa dia tshuka kiakeza ni athu enda kulata dia kuseya aka bula kulaba mabanza mowu ma kimuthu. ¹⁹ Athu mwena wana kisalu kiowu kukapisa kimvuka azala ni mambu ma kimuthu eshiku ni pefi ya Nzambi. ²⁰ Kashi enu apangi jiemi tungenu lukwikilu lwenu mu kilongu kiosu ni mu ngolu jia pevi ya Nzambi. ²¹ Enu zingenu mu luzolu lwa tata Nzambi makininangenu khenda jia fumu Yesu nwa kanona moyi wa mvula ni mvula. ²² Khalenu ni khenda jingi kudi awa enda kushia pika lawu. ²³ Sadisenu akwenu nu wa wudisshi mu thuya twa lufwa kikuma nieni awuluki kudi ekha nukhaloku ni woma waku wevila khenda nufeti kubeya kuleka kuvwata ata miledi yahangilanga kubola. ²⁴ Kudi Nzambi walunga kutukeba mu kuleka kubwa mu pukumunu mweni kaka walunga kutu twadisa mu nzila ya lukumu ngolu kiyeka yikhadi. ²⁵ Kudi mweni Nzambi mu hulushi wetu mu zina dia fumu Yesu Khidishitu lukumu fumu ni ngolu ameni lelu ni mvula ni mvula. amen.