¹ Kiela Yesu wa manisa kwakula mambu menamana, Mweni ni alonguki jienji endidi mu sambwa dia muwanda wa Cedron wengila nawu mu kilanga kimoshi. ² Yudashi wakhedi kuzola ku musumbisa wejikidi kilanga mwenekina kikuma Yesu wakhedi kwenda nawu hengi ni mweni epi. ³ Henihohu Yudashi wendidi koku ni asuta ni athu akhedi kukengidila Nzu ya Nzambi atumini anganga Nzambi ni afadishi akhedi ni minda ni mimbunda ni mata. ⁴ Yesu wejikanga kadi mambu makubwila kienikioki wathethikididi kuhwehula etsi Nani enu nu kuhenganga? Eni amu vutudidi etsi Yesu mukwa Nazaleti. ⁵ Yesu wa waleza etsi Ami yuyu. Yudashi epi wakhedi ni asuta mwenawana. ⁶ Kiela Yesu wa waleza etsi Ami yuyu Eni avutuka kumanima abwa hashi. ⁷ Mweni wahwehula epi Nani enu nu kuhenganga? Eni avutula etsi Yesu mukwa Nazaleti ⁸ Yesu wa wavutudila etsi nia nulezanga kadi etsi Ami yuyu.Yivwa ami kamu nu kuhenganga tusulenu athu awana ekhi endikowu. ⁹ Mambu menama moshu makhedi kuhita mu kulungisa ndaka yakudidi etsi Tata nia bidishidiku ata muthu mumoshi mu katshi ka athu awa pedi. ¹⁰ Simoni Petulu wakhedi ni pokhu mu kilalu wayiwudisa wavuka diatu dia muthu wa kisalu watumini ambuta jia anganga Nzambi jina dienji Malkusi. ¹¹ Yesu walejidi Petulu etsi vutula pokhu yeyi mu kilalu ami ni feti kunwa kopa mwenedi dia pashi dianguhwa Tata. ¹² Asuta ni afumu jiowu ni a khengididi atumini Ayuda akwaditi Yesu amukasa mishinga. ¹³ Eni amusendidi kudi Anna mahenda ma Kayafwa oyu wakhedi Fumu wa a Nganga Nzambi mvula mwene yina. ¹⁴ Mweni walejidi ayuda etsi mboti muthu mumoshi kashu afwi kikuma kia athu oshu. ¹⁵ Simoni Petulu wakhedi kwenda ni kulaba Yesu ni mulonguki mwekha. Kinga lo mulonguki oyuna mwekha wakhedi wejiangana ni fumu wa Anganga Nzambi mweni epi wengididi ni Yesu mu lupangu lwa Nganga Nzambi. ¹⁶ Kashi Simoni Petulu wasadidi penapena ni kishu. Mulonguki oyuna wakhedi wejiangana ni Mbuta dia Anganga Nzambi wa wudikidi waleza mukhetu wakhedi kutadikila kishu kia lupangu mu kwingisa Petulu. ¹⁷ Mukhetu mweni wakhedi kutadikila kishu wehwula Petulu etsi Ayi epi wudi mumoshi mukathsika alonguki a muthu oyu? Mweni etsi Ami lo. ¹⁸ Ana kisalu akhetu ni akengididi akhedi hohu amakan ni kwota thuya kikuma kumka kwakhedi kishika lawu. Petulu epi wakhedi ni eni wa makana ni kwota thuya mweni epi. ¹⁹ Mbuta dia Anganga Nzambi wehwula Yesu kikuma kia alonguki jienji ni mambu makhedi kulonga mweni. ²⁰ Yesu wa muvutididi mvutu etsi Ami niakhedi kwakula kudi athu pwelele kumesu ma athu oshu. Niakhedi kulonga mu manzu mowu ma yisambu ni mu manzu ma Nzambi mwakhedi kuwongama Ayuda. Ami nia khediku kusweka ata kima kimoshi. ²¹ Kikuma kiakhi ayi wuku nguhudilanga kienekina? Ehwula athu evidi maniakhedi kulonga. ²² Tangwa diakudidi Yesu kienekina Khengididi mumoshi wabula Yesu mbata wa munganina etsi Kienikioki ufeti kuhana mvutu kudi Mbuta dietu? ²³ Yesu etsi Yivwa niakulanga kubola ndeji. Kashi ami nia hananga mvutu ya pimbu. kikuma kiakhi wambudila mbata? ²⁴ Anna watumisa Yesu kudi Kayafwa mbuta dia Anganga Nzambi. ²⁵ Mu tangwa mwenedina Petulu wakhedi kaka hohu ni kwota thuya. Amuhudidi etsi Ayi wushiku mumoshi mu katshi ka alonguki jienji? Mweni watunini he wakula etsi Loni kamu. ²⁶ Musadi mumoshi wa mbuta jia Anganga Nzambi pangi dia oyuna wavukidi Petulu diatu wakula Keshiku ayi ami niamweni mu kilanga ni mweni? ²⁷ Petulu watunini epi mbala yikowu mbala yimoshi nzolu wathethi wakokula. ²⁸ Mu suka suka eni akutididi Yesu kunzu ya Kayafwa amesenda kwenda kusambisila athu. Eni owu mweni kengididiku mu nzu mwene yina mu kuleka kujiya tshiku kikuma akhedi kuhangama mu kudia Paki. ²⁹ Kiela Pilatu wawudika waya kuhwehula etsi ekhi kibeni nweza kufundila muthu oyu? ³⁰ Eni avutudidi etsi Muthu oyu nga keshiku wabola etu twambidiku kumuhana kudi ayi. ³¹ Pilatu wa waleza etsi munonenu enumweni mwendi ku musambisa mudi kikwakulanga tshiku yenu. Ayuda amuleza etsi Tshiku yetetu yenda oku kutuwa djila ya kujiyisisa muthu. ³² Eni akudidi kienekina mu kulungisa mambu makudidi Yesu tangwa dia walejidi pila ya kafwa. ³³ He Pilatu wavutuka epi munzu mwenda kusambisila athu watambika Yesu wa mwihula etsi Ayi fumu wa Ayuda? ³⁴ Yesu etsi Mambu mawu nguhulanga makatuka kudi ayi mweni to eni akuleza wiji kunguhula? ³⁵ Pilatu wa muvutudila etsi Ami nidi muyuda? Yidi apangi jieyi ni amambuta jia Anganga Nzambi ejidi ku kuhana kudi ami. Ekhi kamu wahangidi? ³⁶ Yesu wa muvutudila mvutu etsi Kifumu kiamemi kishuku kia hashi. Nga kikhala kia hashi asadi jiamemi ambidi kungu nwanina ni leki kubwa ku mokhu ma ayuda. Ejika kaka etsi kifumu kiemi kishiku kia ashi. ³⁷ Pilatu wa muhudidi epi Ayi wudi fumu wa Ayuda? Mweni wa muhwedi mvutu etsi Ayi wakula etsi ami nidi Fumu. Kienikioki niejidi kubutukila.Kienikioki niejididi hashi mu kuhana kithemu kia mambu ma kiedika. Athu oshu edi namu fhunu afeti kwivwa ndaka yamemi. ³⁸ Pilatu wa muhula Kiedika kidi ekhi? Kiela wa manisa mukwakula mweni wawudika waleza ayuda etsi Ami nia mweniku mambu mabola kudi muthu oyu. ³⁹ Enu nwa mesana kadi etsi mu koshu feti dia Paki ami nienda ku nutusudila mukwa boloku mumoshi. Enu nwazola ni nu tusudidi Fumu wa Ayuda? ⁴⁰ Eni ashia kamu mayema ni kwakula etsi Keshiku muthu mweno oyuna kashi Barabasi. Barabasi wakhedi muthu wabola.