¹ Nienda nia nuleza ni kiedika kiosu etshi kosu wengila mu dinda konda kihitila ku kishu kashi wahitila mu ndjila yekha wudi mwiji pi bandi. ² Kashi oyu wengidila ku kishu wudi mukebi wa mamemi. ³ Sinzidi wenda ku mwanzuludila kishu. Mamemi menda kwivwa ndaka yendji mweni wenda ku tambika kosu dimemi mu jina diodi ni ku ma wudisa. ⁴ Tangwa dienda ku ma wudisa mosu mekhina ma mweni mweni wahita a mesu meni ni ku mu laba kikuma mejika ndaka yendji. ⁵ Mendoku kulaba nzenza kashi menda ku mu tshina kikuma mejiku ndaka jia anzanza. ⁶ Yesu wa watedidi kingana mweneki eni kabakishidiku ata kima kimoshi mu mosu ma walezidi. ⁷ He Yesu wa waleza epi etshi ni masonga mosu ni ku nu lezanga ami nidi kishu kia mamemi. ⁸ Osu a thethikididi kwiza ku mesu ma memi edi eji a ma bandi kashi mamemi mevidiku ndaka jiowu. ⁹ Ami nidi kishu. Koshu wengila mu ndjila yamemi wa ka huluka. wu ku bula kwingila ni ku wudika wu kumona madia. ¹⁰ Mwiji wenda kwiza kaka mu kukaba kujiya ni kuzanga. Ami nieza kikuma anoni moyi akhadi nawu wa hitangana. ¹¹ Ami nidi mvungi wa pimbu wenda kudihana kikuma kia mamemi mendji. ¹² Mwana kisalu keshiku mvungi ka khala oku ni mamemi. Amona kisupa ni kwiza wa tshina wa sala ku ma sisa. Kisupa ki kikwiza kia kwata mamemi kia ma mwanga. ¹³ Mweni wu kutshina kikuma wudi mwana kisalu ka kwivila oku mamemi khenda. ¹⁴ Ami nidi mvungi wa pimbu. Niejika awa edi amemi eni epi a ngwijika. ¹⁵ Tata wa ngwijika ami epi niejika Tata nienda nia hana moyi wemi kikuma kia mamemi memi. ¹⁶ Nidi epi ni mamemi mekha meshiku mu dinda dienedi. Ni feti epi ku mengisa mayandjiki kwizwa ndaka yamemi mu pila etshi makhadi kaka kibuka kimoshi ni mvungi mumoshi. ¹⁷ Talenu kikuma Tata a nzodila ni ku hana moyi wemi kumanima nia ka wunona epi ¹⁸ . Ni muthu ka katambula oku moyi wemi kashi ami mweni ni wu ku hana. Nidi ni kiyeka kia ku wu hana ni kiyeka kia ku wu nona. Yidi Tata wathumini mu kuhanga kienekina. ¹⁹ Kukapangana kwingididi mu katshi ka Ayuda mu ji ndaka mwenejina. ²⁰ Kiatshi kia athu mu katshi kowu akulanga etshi wudi ni pevi ya bola wayela laji. Ekhi nu ku mwivilanga. ²¹ Ekha a kulanga etshi keshiku ji ndaka jia muthu wudi ni pevi ya bola. Pevi ya bola ya lunga kukangula mesu ma pofu. ²² He tangwa dia kuhanga feti mu kukangula nzu ya Nzambi ku Yeluselemi dia lungidi. ²³ Yakhedi mu tsungi ya kishika Yesu wakhedi kwenda ni kuhita mu katshi ka nzu ya Nzambi ku valanda dia Salomoni. ²⁴ He Ayuda a mu jetidi a mwihula etshi tii khia tangwa wu ku disweka Yivwa wudi khidishitu tuleji mu mbaji ya athu oshu. ²⁵ Yesu wa wa vutudidi etshi nia nu lejidi kadi kashi enu nwa zodidiku ku kwikila. Yisalu yi ni kuhanganga mu jina dia Tata yenda ya hana kithemu kiamemi. ²⁶ Mu ku tala eni nwa zodidiku ku kwikila kikuma nushiku mamemi mamemi. ²⁷ Mamemi mamemi menda kwivwa ndaka yamemi. ²⁸ Nia mejika meni epi ma ngwijika. Nienda nia wahwa moyi wa mvula ni mvula ka kafwa oku ni muthu ka ka tambula oku ku mokhu mamemi. ²⁹ Tata wa nguhwedi namu wudi wahita athu oshu kushiku ni muthu wa lunga ku ma tambula ku mokhu mendji. ³⁰ Ami ni Tata tudi muthu mumoshi. ³¹ He Ayuda atonguna mayala mbala ya kiadi mu ku mwasa. ³² Yesu wa wa vutididi etshi Nia nu lejidi yisalu ya pimbi lawu ya Tata. Mu kikuma kia kisalu ekhi mu yisalu mwene yina nwa zola ku ngwashila mayaala e. ³³ Ayuda a mu vutudila etshi keshiku kikuma kia yisalu ya pimbu tu ku kwashila mayaala kashi kikuma kia matuka kikuma epi ayi wudi kaka muthu wenda wa dinona mudi Nzambi. ³⁴ Yesu wa wa vutudila etshi Ka sonika oku mu tshiku yenu etshi Ami nia kula enu nudi a nzambi. ³⁵ Yivwa wa watambikidi a nzambi kudi eni kwejididi ndaka ya Nzambi ( mambu masonika mu mukanda wa Nzambi ka ku makatulanga oku) ³⁶ Kiehi nu kwakulanga he kudi muthu oyu wa sola Tata mu ku mutuma hashi etshi wenda wa tukana kikuma nia kulanga etshi Ami nidi mwana wa Nzambi. ³⁷ Yivwa nishiku kuhanganga yisalu ya Tata ya memi nu ngu kwikila oku. ³⁸ Kashi Yivwa nienda ku yihanga ata nwa zodidiku ku ngu kwikila kkwikilenu kikuma kia yisalu henihohu nwa kejika ni kubakisa etshi Tata ni ami tudi muthu mumoshi. ³⁹ Eni ha hengidi pila ya kukwata Yesu kashi katukidi ku mokhu mowu. ⁴⁰ Mbala eyi he Yesu wazawukidi mu sambwa dia Yordani waya kujingila kwakhedi kubotikila Yowani. ⁴¹ Athu lawu ezanga kudi mweni ni kwakulanga etshi Yowani kahangidiku ata kipedikisa kimoshi kashi moshu makhedi kwakula matadila muthu mwenoyu medi ma kiedika. ⁴² Athu lawu akwikididi Yesu kwenokuna.