¹ Kikuma athemu lawu edi atujieta, tulekenu mambu moshu menda kukasa njila mu kudiata pimbu,ni masumu menda ku tuwinda. Twendenu fishi, tu talenu eyi yidi kumesu. ² Tusienu mesu kaka kudi Yesu,wa tunehini lukwikilu, mweni kaka epi wa lulungisa. Wakashidi mutshima tangwa dia mukhokidi ha kulunji, mwa mweni soni mu lufwa mweno luna mudi muthu wa pamba, kikuma wakhedi kubanjila kaka kieshi kia mu swekididi Nzambi. ³ He kikimweni, wudi wa shikama kitsi kia lukumu penapena ni Nzambi. ⁴ Enu kandiku kadi nu nwananga tii mashi ma wudiki mu mwila, to nwa nwanoku kadi ni masumu lo. ⁵ Nwa jimbangana kwenu kadi dilongi dia nu hwedi mudi ana:" Mwana emi, wuleka oku ndola ya Nzambi, kikesa ki kukatuka oku ata yivwa Nzambi wa kuleza kubola kweyi. ⁶ Kikuma Nzambi wenda kuhana ndola kudi muthu wenda kuzola, wenda kubula muthu mwoshu wenda kunona mudi mwana enji. ⁷ Kasenu mitshima. Nzambi wa nu nona mudi ana jienji; kikuma khia mwana tata enda kukonda kuhwa ndola? ⁸ Kashi yivwa ka nu hwediku ndola, etwosu twenda ku yinona, nudi ana makangu, nushiku ana jienji. ⁹ Tudi ni atata a tu butidi enda ku tuhwa ndola,twenda ku washia lujitu. Kiehi kamu tu kuleka kulemvuka kudi Tata wa kipevi mu kujinga mboti? ¹⁰ Kikuma, atata jietu akhedi ku tuhwa ndola mu mvula jitshiotu mudi khiakedi kuzola mitshima miowu, kashi Nzambi wenda ku tuhwa ndola kikuma etu tuhwahi, twikhini athu alongu mudi mweni. ¹¹ kushiku ni ndola a lenda kuhwa muthu kieshi,kashi yeni yenda kuhana susudi. Kinga lo Ndola ya wekhinisa kadi athu a pimbu, ya wa nehina mambu ma pimbu ni yifu ya shipidi. ¹² Kienikioki, khakenu ni kikesa ata yivwa mokhu menu malembwa ni mabongu mekhina susudi, ¹³ hangikenu njila jia sungama kikuma ata yivwa yikata ya hitila momu, yileki kubula sasa, kashi eni a diatingi pimbu. ¹⁴ Hengangenu kujinga mboti ni athu oshu,ni kilongu, yivwa lo nwa nu mithu ka kamon' oku Fumu. ¹⁵ Kebenu! Muthu kabidisa oku khenda jia Nzambi, muthu lo epi ekhini mudi mayisa medi khadi ma lunga kujiya athu lawu mu katshi k'enu. ¹⁶ Muthu kuhanga kindumba lo,kusawula Nzambi lo mudi kia hangidi Ezawu, wa sumbishidi kimbuta kienji kikuma kia madia. ¹⁷ Kikuma enu nwejika etshi, kiedidi wevwa nzala ya kunona lusakumunu, ka mweniku epi njila ya ku balula mabanza ma tat'enji, ata wakhedi kudila. ¹⁸ Kikuma, enu nwendidiku ku mondonda wakhedi kulema thuya, midima yakhedi lawu,funji ya ngolu yakhedi ku pupula. Nwevidiki mayema ma kilolo ma ¹⁹ wudikanga. Tangwa dievidi mayema menamana, alekisa etshi ka wa leza oku ndaka yekha. ²⁰ Kikuma eni kakukidiku kuvwa mambu ma walezanga etshi:" Ata mbiji akwata mundonda wenowu, afeti ku mu jiya ku mayala." ²¹ Mambu ma mweni eni, ma wahwedi woma kamu, he Moshi wakudidi etshi:" Nienda nievwa woma ni mwila kutekita." ²² Kashi , enu nwa katuka kadi ku mundonda wa Sion nwa kokuluka kudi Nzambi wa moyi, ku Yeluselemi didi ku wulu, kudi awanjio mafunda ni mafunda edi kuhanganga feti. ²³ Nwekhina ana athethi a Nzambi edi awongama ni kiesi kioshu,majima mowu medi makusonika ku wulu. Kokulukenu kudi Nzambi,wudi Ziji wa athu oshu; kudi mweni kweni koku kudi pevi jia athu a bathu ekhinisa Nzambi athu a lunga. ²⁴ Kokulukenu kudi Yesu mweni wa hangidi kwivwangana kwa katataka; kimenga kienji kia katula masumu moshu, kia hanga mambu majima mahita kimenga kia Abel. ²⁵ Kebenu mu kuleka kukonda kwivwa muthu wudi kwakulanga. Kikuma,yivwa eni kia lekidi kwivwa oyu wakhedi kwakula henaha hashi owu 'oshu anonini ndola, etu epi twa kanona ndola yivwa twa leka kwivwa oyu wudi kwakulanga ku wulu. ²⁶ Mu tangwa mwenedina, Ndaka yenji ya nikishini mavu. Kashi kikimweni, wa tu laka etshi:" Ami nia ka nikis'oku kashu Mavu , kashi ni wulu epi." ²⁷ Ndaka mweneji:" mbala yimoshi epi" ya lombulula etshi yima yoshu ya hanga mweni henaha hashi, ya kanikana yoshu ya kajimuka, kikuma eyi yenda kuleka kunikana ya kasadi dibela. ²⁸ Mudi ki twa nona dimbu dienda kuleka kunikana, tujimbangan'oku Nzambi mu mithsima mietu. Tu khalenu athu a pimbu, tu hangilenu Nzambi kienda kuzola enjimweni, tu lemvukang'enu kudi mweni ni lujitu lwosu. ²⁹ Kikuma Nzambi wetu wudi mudi thuya twenda kwoshia yima yoshu.