¹ Kikuma tsiku yakhedi mudi kininga kia mambu makeza kumesu, keshiku kamu mambu makiedika. Tshiku ya lungidiku kuhwayisa athu azola kupusana penapena ni Nzambi, kienikioki koshu mvula eni akhedi kuhana makabu ma pila yimoshi kaka. ² Kwivwa lo kambidiku epi eni kuhana makabu menamana,kikuma etshi ambidi kudimona mudi eshiku epi ni masumu. ³ Koshu mvula ambidingi kaka kuhana makabu ni kubanjilanga masumu mowu. ⁴ Kashi kimenga kia a ngombi ni a khombu kia lungidiku kukatula masumu ata fioti. ⁵ Kiedidi Yesu weza hashi, wakudidi etshi:" ayi wa kumbudidiku makabu moshu makhedi kukuhwa. ⁶ Kashi wapedi ami mwila. Wakumbudidiki mbiji jiakhedi kukwoshila, to awana a kuhwanga kikuma kia masumu. ⁷ He nia kula etshi:" Talenu, ami oywekhi, mudi kimedi makusonika mu mikanda,nieza kuhanga luzolu lweyi." ⁸ Thethi wakudidi etshi:" Ayi wa kumbudidiku makabu ma kuhwedi,yikhadi ambiji akhedi kukwoshila to akuhwanga kikuma kia masumu. Wakhediku namu kieshi loni, ata a mahanini pila yakulanga tshiku. ⁹ Wayikidi epi etshi:"Tala, nieza kuhanga luzolu lweyi." Boshu weza kukatula pila yikulu yakusambila mu kuyanjika ya katataka. ¹⁰ Mu luzolu lweno luna Yesu Khidishitu wejidi kulungisa mambu mazodidi Nzambi,kiadi hanini mbala yimoshi, watwikinisa etu athu alongu. ¹¹ Koshu Nganga-Nzambi wa hanganga kisalu kienji koshu kilumbu kumesu ma Nzambi. Wenda kuhana makabu ma pila yimoshi, menda kuleka kukatula masumu ma athu. ¹² Kashi Khidishitu wa hanini dikabu dimoshi, mu kukatula masumu dibela, wudi wa shikama ku koku dia kitata dia Nzambi. ¹³ Wenda kumakinina tii kooku ambeni jienji akekhina ku mashina ma miendu mienji. ¹⁴ Kikuma mu ngolu jia makabu ma moshi menamana, wekhinisa athu oshu alongu ni alunga. ¹⁵ Pevi ya longu yenda ya tutela kithemu,kikuma thethi mweni wakudidi etshi: ¹⁶ " Tala kwivwangana ku nidu kuhanga ni eni kumanima ma yilumbu. Nia kashia tshiku jiemi mu mitshimia miowu, nia ka ji sonika mu mabanza mowu,Fumu wakula. ¹⁷ Ami nia kabula oku epi kwibuka masumu mowu ni kubola kwowu." ¹⁸ Kikimweni he, yivwa a lolula kikuma kia mambu menamana, pila ya kuhana epi makabu ma mbiji yishiku. ¹⁹ Kienikioki he, apangi, kikuma kia mashi ma Yesu, tushienu musthima etshi twa kengila ku suku dia longu. ²⁰ Tala njila ya katataka ni ya moyi ya tu kangudila mweni kumanima ma Rido; yidi mwila wenji. ²¹ Kikuma tudi ni Mbuta dia Anganga- Nzambi washi Nzambi mu kutwadisa kikanda kienji, ²² tukokulukenu kudi mweni ni mutshima wumoshi, ni lukwikilu lwoshu, kikuma Nzambi wakatula kadi masumu metu, mitshima mietu miekhina miatoka, mila mietu a yovwa ni meya ma kiedika. ²³ Twakulangenu etshi twenda twashila Nzambi mutshima, tulembwa oku, tudi hanenu, kikuma Nzambi wa kalungisa kaka kilaka kienji. ²⁴ Tudi banjilangenu, tu zolangangenu, tu hangangenu yisalu ya pimbu. ²⁵ Nu leka oku kwiza kuwongamanga mudi kia kuhanganga athu ekha. Kashi hanangenenu kikesa enu ni enu, kikuma nwenda nwa mona etshi kilumbu kia tshuka kia kokuluka. ²⁶ Kashi, yivwa etu athu twa nonini kadi malongi ma kiedika, twa yanjika epi kuhanga masumu ma luzolu, kushiku epi ni makabu mekha ma ka lunga kukatula masumu. ²⁷ Kwa sala kaka he, kamakinina kie Nzambi akatuzengila ndola ni thuya twa katumisa mu koshia ambeni jienji. ²⁸ Koshu muthu walekidi kujitisa tshiku ya hanini Moshi, a ku mujiya konda ku mwivila khenda, yivwa athu mbadi to asatu ata kithemu kia kubola kwenji. ²⁹ Nwejika khia ndola ya hitangana yidi ku makininanga, koshu muthu wa tala Mwana wa Nzambi pamba, ni ku tala pamba kimenga kia kwivwangana kwa katataka, kieza kukatula masumu menji, ni wa tukana Pevi ya Nzambi wa mu nehinini khenda jia Nzambi? ³⁰ Kikuma etu twejika oyu wakudidi etshi:" Ani nia ka wa vutidila kubola;" epi etshi:" Fumu waka sambisa makanda ma athu oshu." ³¹ Medi mambu ma susudi yivwa muthu wabwa ha mokhu ma Nzambi wa moyi. ³² Ebukenu yilumbu yahita, kiedidi a nu kangula mesu, nwakhedi kunwana ni pashi jingi,kashi nwa khedi kukasa mutshima. ³³ Akhedi ku nu tukana, ku nu niokula mu mesu ma athu, kashi enu nwa kumbudidi kujinga nawu. ³⁴ Nwa khedi kumona pashi ni akwa boloku, nwakhedi kukumbula ni kieshi kioshu ata a nu tokununa yima mu kingolungolu. Enu Ejikenu etshi nudi ni kimvwama kia hita kidi ku wulu kia kaleka kuzangana. ³⁵ Yivwa enu nwa shia kaka mutshima, nwa kanona matapishi mayitangana. ³⁶ Kikuma yivwa nwenda nwa kasa mutshima nu ku bula kulungisa mambu menda kuzola Nzambi, nwa kanona mambu ma pimbu ma nu nehinini. ³⁷ "Tangwa dishiku epi, muthu afeti kwiza, eji,ka kusunina oku. ³⁸ Kienikioki muthu w'emi wekhina wa pimbu kikuma wa kwikila, wa kawuluka. Kashi wa vutuka kinima nima, ni kukhala ou nenji sanguka lo. ³⁹ Kashi etu tushiku athu tudi kuvutukanga ku manima, tu kubila oku. Kashi, etu tudi mu kibuka kia athu edi ni lukwilu mu kukeba mioyi mowu.