¹ Polu thumwa wa Yesu Khidishitu mu luzolu lwa Nzambi mu lilaji kia lujingu ludi mu Yesu Khidishitu. ² Kwa Timote mwana emi una zola hengi leka ngemba ni khenda ni ku haniwini kudi Tata Nzambi ni kwa Yesu Khidishitu fumu wetu. ³ Nia tonda Nzambi wu nienda kuhangila ni mabanza ma pimbu mudi akhakha jemi kia ma hangidi niku ngu bambusanga pimbu kudi ayi pipa ni mwania mu yisambu yenu. ⁴ Niku ngu bambusanga masonga meyi nia zola kamu kuku mona kikuma ni zadi ni kieshi. ⁵ Nienda bambuka lukwikilu lweyi lwa kiedika lwa khedi theti ni khakunu Lois ni kwa mamunu Eunice nia kumbula etahi wenda kujinga epi ni ayi. ⁶ Kikuma kia kiene kina nia ku bambushila muku tokimisa dikabu dia Nzambi didi mudi ayi ni ki kinonini mu kunusha mokhu. ⁷ Kikuma Nzambi katuhwediku pevi ya woma kashi ya ngolu ya zola ni mashipu. ⁸ Wivwoku soni ja kimbangi kia fumu etu ata ku ami Polu mukwa boloku wenji kashi nona kapi mu pashi ja tsangu ja ngolu ja Nzambi. ⁹ Wudi Nzambi wa tu hulushidi ni watu tambikidi ni kutambika kutoka wa ma hangidi lo kasu mu yisalu yetu kashi mu pila ya kuhanga ni khenda jenji. wa tuhwedi yima yeni mu Khudishitu Yesu ku twala ya kuyandjika kwa yima yosu. ¹⁰ Kashi kieneki ku huluka kwa Nzambi kwa lumbulukidi mu kwiza kwa fumu etu Yesu Khidishitu wudi Khidishitu wa shidi tshuka ku lufwa ni wa neha lujingu lwa mvula ni mvula ku mwania wa tadilanga tsangu. ¹¹ Kikuma kia kienekina angu sodididi mulongi thumwa ni longi. ¹² Kidi kiene kina nienda kola epi jipashi jeni kashi nishiku lo ni soni kikuma niejiya kwa nani na kwikila ni nia kwikila etshi mweni wa lunga kikwata tii kilumbu kiene kina kinia muhwedi. ¹³ Kwata ni lukwikilu ni zola idi mu Khidishitu Yesu pila ya jitsangu ja lemvuka ji wevidi kudi ami. ¹⁴ Mulongi wenowuna wa mboti wa kuhwedi fumu wukwati ni lusalusu lwa pevi ya longi ya khala mudi etu. ¹⁵ Wejiya etshi osu awa enda kujinga mu Asia angu lekidi mu kipi kienekina kudi Phygelle ni Hermogene. ¹⁶ Leka fumu anuhu khenda kunzia Onesiphore kikuma wenda hengi kungu kodisa ni lo kwivwa soni ya miyololu yemi. ¹⁷ Mu kutala kia khedi ku Roma wa ngu hengidi ni kieshi ni wangu mweni. ¹⁸ Leka fumu amuhu muku mona khenda mu mweni mu kilumbu ekina ni wejiya mboti pila ya angunehinini lusalusu lwenji ha Ephese.