¹ Eyi mbala ya kisatu ni kwizanga kudi enu. Nu feti kunonanga kithemu kia athu mbadi to asatu mu kukumbula koshu mambu meza kufunda muthu. ² Nia kudidi kadi kikuma kia athu a hangidi masumu, mu ku wa kebisa, tangwa di niakhedi koku mu mbala ya kiadi; nienda epi nia vutukila:" Yivwa nieza epi nia ka wevila oku khenda." ³ Nienda niakula kienikina, kikuma enu nwenda nwa henga nwijiki yivwa kamu khidishitu wenda ku ngu hangila. Mweni wudi ngolu jienu. ⁴ Kikuma a mu khokhidi ha kulunji, kashi wudi ni moyi mu ngolu jia Nzambi. Etu oshu twakonda ngolu, twa kajinga ni mweni mu ngolu jia Nzambi wudi ni etu. ⁵ Ditaleni enu mweni mu kwijika yivwa nudi ni Lukwikilu lwa kiedika. Di mekenu enu mweni. Nushiku kwijikanga etshi Yesu khidishitu wudi ni enu? Wudi ni enu kashi nushiku kudijiyanga. ⁶ Nia kumbula etshi twa kevwa oku soni. ⁷ Kikimweni twenda twa lomba kudi Nzambi etshi nu leki epi kuhanga mambu mabola, keshiku etshi etu tuleki kumona soni, kashi etshi nu hangi mambu medi malunga,he etu soni ji katuki. ⁸ Kikuma twa lungidiku kuhanga mambu makonda fhunu, kashi tu kuhanga kaka mambu makiedika. ⁹ Nienda nia nu sonikina mambu menama kikuma nidi kwa laha ni enu. ¹⁰ Ki niaka tula kudi, nia kaleki kuhanga mambu mu ngolu jia Nzambi ma nu bebishi kashi ma nuhu kikesa. ¹¹ Mu kumanisa, a pangi amala ni akhetu, khalenu sangusangu! Hangenu kisalu ki nu sendi kumesu, khalenu ni kikesa, evwangangenu, jingenu mu ngemba. Nzambi wa luzolu ni wa ngemba wu kukhala ni enu. ¹² Mboti kudi enu oshu. ¹³ Akhidishitu oshu a nu tumisa mboti. ¹⁴ Leka khenda jia Fumu Yesu, luzolu lwa Tata Nzambi, mu kimvuka ni Pevi ya longu yikhadi ni enu oshu.