¹ Kikimweni mambu matala tangu ni tshungi apangi nushiku ni fhunu anu sonikini namu. ² Kikuma nwejika kibeni ni kilumbu kia fumu kiakeza lwa mwiji mu pipa. ³ Tangwa dia kakula wu ngemba ni lukengulu heni hohu mambu maka wa zanginina muki thulumukina yaka khala mudi misongu kudi mukhetu wudi ku vumu uku yitshina kiehi. ⁴ Kashi apangi musuku mu pipa kikuma kilumbu kiene kina kinu tudidi mu kithulumukina lwa mwiji. ⁵ Kikuma nudi enu osu ana ja nsemu ni ana a kilumbu tusuku ana pipa to pipa ya ngolu. ⁶ Kieni kioki tulangaloku mudi kienda kuhanga athu ekha kashi kangulenu mesu khalenu shenu kikesa. ⁷ Kikuma awa enda kulangala alangala mu pipa awa enda kuzela enda kuzela mu pipa. ⁸ Kashi kikuma tudi ana a kilumbu tu khadi pimbu tu vwatidi mikaba ya lukwikilu ni luzolu tu vwati mphu ya kivuvu mu moyi wukwiza. ⁹ Kikuma Nzambi katu hangoku sambu twivingi khabu kashi muku nona moyi mu njila ya Yesu Khidishitu. ¹⁰ Wudi owu wa fidi kikuma kietetu mu pila etshi tulangaloku to tu langadi tujingi kimvuka ni mweni. ¹¹ Mu kutala Hwanganganenu kikesa ni kulongana enu nienu mudi kinwenda kuyihanga kadi. ¹² Twenda nu lomba pangi mu kubambuka awa nu kuhanganga nawu ni awa edi amambuta jienu mu Yesu awa akunu longanga. ¹³ Twa nu lomba nu khadi ni lujitu lwingi mu luzolu kikuma kia yisalu yowu. khalenu mu ngemba eni nienu. ¹⁴ Twenda nu lomba apangi kebisenu awa aku jinganga kisakasaka huenu kikesa awa ahua kikesa kwatenu awa alembwa kasenu mutshima ku owosu. ¹⁵ Kebenu muthu ka vutuloku kubola ni kubola kashi labenu kaka ama medi ma waha enu nienu ni kudi athu osu. ¹⁶ Khalenu kaka mu kieshi. ¹⁷ Lombangenu konda kulembwa. ¹⁸ Hanenu matondu mu mambu mosu kikuma ludi luzolu lwa Nzambi mu njila ya Khidishitu Yesu kunudi enu. ¹⁹ Nu jimoku pevi. ²⁰ Nu beyoku kubikula. ²¹ Kashi talenu mboti mboti mambu mosu kangamenu ni ama medi ma waha. ²² Tuleki yima ya bola yiku mwekananga. ²³ Leka Nzambi wa ngemba anu sukudi mvimba leka pevi yenu moyi ni mwila wukhadi wa kukeba wakonda kifu tii kwa fumu etu Yesu Khidishitu. ²⁴ Owu wa nu tambika ka kusobangoku mweni waka mahanga. ²⁵ Apangi sambangenu kikuma kietu. ²⁶ Huenu apangi mboti ya tama. ²⁷ Nia nu lomba mu zina dia fumu mukanda owu wutangami kwa apangi osu. ²⁸ Leka ngemba ya fumu Yesu Khidishitu yikhadi nienu.