¹ Kumanima pangi twenda nuhwa ngolu epi ku nuhwa mulongi mu zina dia fumu etu Yesu mutshindu wu nwamweni kudi etu pila ekhi nwa lunga kwendanga ni Nzambi mu pila kuhwa kieshi kieni kioki epi nu kwendanga hangenu kiene kina tangwa ni tangwa. ² Kikuma nwenda nwejiya milongi ekhi twa nuhwedi mu jina dia fumu etu Yesu Khidishitu. ³ Kikuma yosu eyi yidi luzolu lwa Nzambi nuleki lunjingu lwa bola lwa yizumba nu khadi a longu. ⁴ Kosu muthu ejiyi kukeba mwila wenji mu kilongu ni lukumu. ⁵ Nu dihanoku mu yizola zola ya nzala ya kumwila mutshindu apani aku lekanga kwijiya Nzambi. ⁶ Ata muthu mu moshi kahengoku ku kaba pangienji to kumu hanga kubola mu mambu ama kikuma fumu wenda kuhana ndola mu mambu mosu kieni kioki twa nulejidi kadi twa nu leza epi. ⁷ Kikuma Nzambi katu tambikidiku mu ku sumuka mu kilongu. ⁸ Kieni kioki owuna uku konga mulongi ka kongidiku muthu wa konga Nzambi wa muhwa pevi jenji la longu. ⁹ Mu mambu ma zola dia pangi nushiku epi ni pila muthu anu sonikini epi kikuma enji mweni anu longi muku dizola enumweni. ¹⁰ Kieni kioki yosu eyi nuku hanganga kudi apangi osu edi ku Macedoine twenda tawa nuhwa mulongi apangi muku yihanganga tangwa diosu. ¹¹ Twenda twa nuhwa epi milongi mu kuhenga kujinga nenene. mu kutalangana mambu manu tala enumweni muku hanga ni mokhu menumweni mutshindu wu nianu lejidi kadi. ¹² Hangenu kienekina kikuma nwendingi mu kiedika ni lujitu kudi awa edi hanji akonda lukwikilu kima nu leki kukhala ni fhunu ya kima. ¹³ Apangi twendoku twa zola nu khadi ni soni kudi athu awa akulangalanga kikuma nuleki kukhala ni khenda mudi athu ekha akonda lukwikilu mu mambu ma keza. ¹⁴ Kidi etshi twa kwikila etshi Yesu wa fidi wa tokimini mutshindu umoshi Nzambi waka tokimisa ni Yesu athu osu edi alangala ni mweni. ¹⁵ Kieni kioki twenda twa nu longa mu ndaka ya fumu etu tudi ni moyi twaka makininanga kuvutuka kwa fumu twaka thetikiloku athu osu edi alangala. ¹⁶ Kikuma fumu enji mweni waka katuka ku wulu wa keza ni kiwolu mu ndaka ya fumu wa wanjo ni pungi ya Nzambi athu afwa mu Yesu aka tokama atheti. ¹⁷ Kumanima etu twaka khala ni moyi etu osu twakatuka ku wulu ni eni mu matuta twaka waningina ni Yesu mu wulu kieni kioki twaka khalanga ni mweni tangwa diosu. ¹⁸ Katulangenu khenda enu mweni ni enumweni mu ndaka yeneyina.