¹ Kikuma nwejiya enu mweni etshi ki twejidi kudi enu kwa khediku mu pamba. ² Ejiyenu mutshindu eni atu mwenishini pashi ni kia mutshindu atutukunini ha Philippe. Twa nonini kikesa muku nuleza tsangu jia Nzambi mu katshi ka matata. ³ Kikuma kutambika ku twa nu tambikidi keshiku kujimbangana yishiku mu mabanza ma bola ni kudihuna. ⁴ Pila yimoshi Nzambi watu kumbula wa tuhwa tsangu jia mboti twendoku kuhenga mutshindu wa kuhana kieshi kwa athu twenda kuhenga kuhana kieshi kwa Nzambi owu wenda kutala mambu medi mu mitshima yeku. ⁵ Kikuma twa khediku kwakula mambu ma mboti mabanza loni ma kunona yima ya ngani Nzambi wudi themu. ⁶ Uhengoku pila ya kunona lukumu kwa kosu muthu ata enu mweni ata kwa athu ekha. ⁷ Twa khedi kuhanga ni mutshima wa shipula mudi mama owuna wenda kukeba ana jienji. ⁸ Heni hohu twanu zodidi hengi twa nu kapididiku kasu tsangu jia mboti jia Nzambi twanu kapididi epi moyi. ⁹ Kikuma nu bambuki kisalu kienu ni pashi jietu. pipa ni mwania etu mweni twa hanganga mu kuleka kutudisa kudi mumoshi mu kathi ka enu. Twa zodidiku nu noni kilemu ki twa nu lezanga tsangu jia mboti jia Nzambi. ¹⁰ Enu nudi a themu jietu Nzambi epi wudi themu wetu yifu yetu kutwala ya henu a khidishitu ya khedi ya kinzambi. ¹¹ Nwijiyi etshi twa hangidi kwa kosu muthu mu katshi ka henu mudi tata ki enda kuhanga kudi ana jienji. ¹² Sambu dia kiene kina twenda twa vutula matondu kudi Nzambi ki nwa kumbudidi ndaka ya Nzambi ki twa nulongidi nwa yi noniniku mudi ndaka ya muthu kashi nwa yi nonini kamu etshi ndaka ya Nzambi. teni yoyi yi kuhanganga kisalu mu katshi ka enu. ¹³ Twenda kuvutula matondm kwa Nzambi tangwa diosu sambu dia mambu ama ki twa nulejidi tsangu jia Nzambi nwa jividi nwa jikumbudidi mudi keshiku tsangu jia muthu kashi tsangu jia Nzambi jidi masonga menda kuhanga mu kathsi ka mutshima wetu akhidishitu. ¹⁴ Kikuma apangi jiemi mambu mosu ma hitidi okuna kudi enu ma hitidi epi ku ma dibundu dia Nzambi edina didi ku Zude didi kwa yesu Khidishitu. Athu jienu anu hwedi pashi ejina Ayuda ahangidi kwa akhidishitu aku dibundu dia Zude. ¹⁵ Ayuda a jiyidi fumu Yesu ni ambikudi eni atu mwenishini pashi. ma haniniku kieshi kwa Nzambi ekhinini ambeni a athu osu. ¹⁶ Enda oku kuzola kulonga tsangu ejina jaka hulusa athu osu twendoku kuzola tu jileji athu ekha kikuma ahuluki ku tshuka khabu jaka wabwila. ¹⁷ Twa kapinginini ni enu pangi. kukapangana kwa mwila keshiku mu mabanza nzala yingi ya kunu mona kikuma twa jinga oku. ¹⁸ Kikuma twa zodidi kwiza kwenokuna mbala jingi kashi Satana wa kasa njila ami Polu nia londa. ¹⁹ Kikuma mu kwakula kwa pimbu keshiku athu ekha twenda kusha mutshima kutwala ya fumu Yesu mu kwiza kwenji. ²⁰ Kikuma kiedika enu nudi lukumu ni kieshi kia etu.