¹ Petulu thumwa wa Yesu Khidishitu kwa nzenza a mwangana kwa sodiwa ku Pont Galatia Kappadoce Kasie ni Bithynie. ² Bosu kia ma hangika Nzambi tata ma kumbulama kwa pevi mu ulemvu kikuma kia kutshiakuka kwa menga ma Yesu Khidishitu leka khenda jikhadi nienu leka ngemba yikhadi yingi. ³ Leka Nzambi Tata wa fumu Yesu Khidishitu khalenu lwa sakumuka mu khenda jienji jingi wa tuhwa kubutuka kwapa mu kivuvu kia kimvwama. kimvwama kieni mu njila ya kufutumuka kwa Yesu Khidishitu mu katshi kia mvumbi. ⁴ Ekhi kidi kimvwama ekhi kia kabiloku konda kubola kiaka zanganoku anu swekila mu ma hulu. ⁵ Nudi nwa swekiwa mu ngolu jia Nzambi mu njila ya lukwikilu kikuma kia moyi ohu udi pena pena mu kumonika mu matangwa ma tshuka. ⁶ Nwenda nwevwa kieshi kiohu ata yidi fhunu nwivi khenda mu kumekama kwingi. ⁷ Medi kiene kina kikuma lukwikilu lwenu lumwekhani lukwikilu olu ludi pimbu kuhita wolu wenda kufwa ata a wusha ku thuya ama matula kikuma lukwikilu lwenu tshuka yolu kuyimba nkhembu ni lukumu mu kwiza kwa Yesu Khidishitu. ⁸ Nwa mu mweniku kashi nwa muzola nwendoku kumu mona kiki thudi kashi nwa mu kwikila nwa zala ni kieshi ki kuhwangoku ni nkhembu. ⁹ Kikimweni nwenda nona matonzi ma lukwikilu lwenu kubika kwa moyi. ¹⁰ Moyi ni khenda jia nu shishila yekhina kima kia kuhenga kwa mbikudi. ¹¹ A henganga mu kwijiya mata pevi ya Khidishitu wa walezanga mu katshi kiohu ma hitanga mu tangwa awa lenzanga kikuma kia pashi ja Khidishitu ni nkhembu ya keza kumanima. ¹² Wawa tendudila ama ma lekanga kuhanga owu mweni. kashi owosu tangwa diakulanga mambu ma kuwalezanga kiki mweni kudi awa aku nulonganga sangu ya mboti mu njila ya pevi ya longu yejidi ku wulu. ¹³ He khalenu nwa sungimina khalenu nawa tokama khalenu ni kivuvu mu khenda jia keza mu kwiza kwa Yesu Khidishitu. ¹⁴ Mudi ana alemvuka nu dihanoku mu nzala ji nwa labanga ha nwejikangoku. ¹⁵ Kashi mudi owu wanu tambikidi udi mutoka enu epi khalenu nwa toka mu yifu yenu. ¹⁶ Kikuma asonika khalenu atoka kikuma ami mweni nidi watoka. ¹⁷ He ivwa nwenda tambika Tata owu wuku sambisanga konda kukatula muthu mudi kidi kisalu kia muthu ni muthu hitisenu tangwa dia kukiba mu kumwiva woma. ¹⁸ Nwejika ni keshiku ni fwalanga to ni wola wenda kuvunda nwa sumbiwidi mu yikalulu nwa longukidi kudi atata jienu. ¹⁹ Mu kutala anu sumbidi mu mashi ma Khidishitu wakhedi lwa mwana dimemi diakonda mvindu. ²⁰ Khidishitu wa sodiwidi kifutshi khanduku kihangama kashi kikimweni mu tangwa edi dia tshuka yanu lombilushidi ku twala. ²¹ Nwa kumbula Nzambi mu njila ya mweni wamu tokimishini mu lufwa owu wahwa nkhembu mu pila ni lukwikilu lwenu lukhadi kudi Nzambi. ²² Nwekhinisa mioyi yenu pimbu ni kulemvukila masonga olu lwakhedi luzolu lwa kimvuka ni ma kiedika zolanganenu hengi enu ni enu mum mitshima yenu. ²³ Nwa butuka apa kesuku mu kheni yafwa kashi mu kheni yendoku kufwa mu njila ya ndaka ya lujingu ni matangwa mosu ma Nzambi ²⁴ Kikuma mwila yosu wudi mudi mwangu khembu mudi kithundu mwangu wenda kuwuma kuthundu kienda kubwa. ²⁵ Kashi ndaka ya fumu yenda kujinga mvula ni mvula yidi tsangu ya mboti ya mu longidi.