¹ Ami nishiku libre? Nishiku thumwa e? Enu nushiku mbuma jia kisalu kiemi kikuma kia Fumu e? ² Yivwa etshi nishiku thumwa kikuma kia athu ekha, nidi kikuma kienu. Kikuma enu nudi kidimbu kia kisalu kiemi kia thumwa mu jina dia Fumu. ³ Eyi pila yi nienda kuvutudila athu enda ku ngu shila ma fundu. ⁴ Tushiku ni tangwa dia kudia ni kunwa e? ⁵ Twa lungidiku kwenda ni kujieta ni apangi akhetu edi akhidishitu, mudi kienda kuhanga athumwa ekha, ni apangi mu jina dia Fumu, ni kia hangidi Cefasi e? ⁶ Kaka Banabasi ni ami kashu tu feti kahunga kisalu mweneki e? ⁷ Nani wenda kuhanga kisalu mudi musuta kikuma kia enjimweni? Nani wenda kukuna Vinu, enjimweni kudia mbuma lo? To nani wenda ku sasa angombi konda kunwa mayedi menji? ⁸ Niakula mambu ama mu pila ya kimuthu e? Medi kienekina kienda kwakula Tsgiku. ⁹ Kikuma medi makusonika mu mukanda wa moshi etshi," wu kasa oku ngombi kukanu tangwa dia kubundulanga." Nzambi wakudidi mambu menama kikuma kamukia Ngombi e? ¹⁰ Kakudidiku etu e? Medi ma kusonika kikuma kietu etsh, oyu wudi ku bundulanga kilanga, ni oyu wa katula mbuma afeti kushia mutshima etshi akanona ndambu yowu ya yima. ¹¹ Etu twa kuna kheni jia kimpevi mu katshi kenu. Pashi yidi akhi yivwa wa nona lusadisu lwa kimuthu kudi enu? ¹² Yivwa athu ekha enda anona lusalusu kudi enu, etu kamu tushiku ni nswa ya hita eni e? Kanduku tu nu lombanga lusalusu etu. Twenda kukasa mutshima mu pila etshi pashi yikhala oku ata fioti tangwa di twenda ku nu longa tsangu ya mboti ya Fumu Yesu. ¹³ Enu nwijiku etshi athu enda kuhanga mu nzu ya Nzambi, enda kudia mu nzu ya Nzambi. Nwijiku etshi athu enda kuhanga ku mesa ma Fumu enda kudia makabu menda kuhana kudi Fumu. ¹⁴ Kienikioki Nzambi akudidi etshi athu enda kulonga ndaka ya Nzambi afeti mu njila ya ndaka ya Nzambi. ¹⁵ Kashi ami nia lumbidiku ata lusalusu lumoshi lo. Nishiku kusonikanga mambu moshu kikuma esthi enu nu ngu sadishi. Mboti nifu kwemi, kikuma muthu mwekha aleki kuthambula lukumu lwemi. ¹⁶ Yivwa nienda nia longa ndaka ya Nzambi, nishiku ni tangwa dia kudishikisa, kikuma kidi kisalu ki nidi kuhanganga. Nienda kumona pashi jingi yivwa nishiku kulonganga tsangu ya mboti! ¹⁷ Kikuma nienda kukihanga ni luzolu lwoshu, nia ka nona lufutu. Kashi yivwa etshi nia hangidiku ni luzolu lwoshu, nia kakhala kaka ni kilemu kikuma kia kisalu kia ngu hwedi. ¹⁸ Ekhi ya kakhala lufutu lwemi e?Kienikioki, tangwa di nienda kulonga tsangu ya mboti nienda kudihana lufutu lwemi ludi kiehi ki nienda kukhala naki mu kukonda kulomba lusalusu. ¹⁹ Nishiku muhika wa muthu, kashi ami mweni niekhinina muhika wa athu oshu kikuma kia benda athu engi. ²⁰ Kudi Ayuda nienda kumwwekana mudi nidi muyuda, mu ku benda Ayuda. Kudi athu enda kulaba tshiku jia Moshi, nienda kujinga mudi etshi ni ami nienda nia laba tshiku, keshiku etshi ami mweni nidi mu katshi ka tshiku, yidi pila ya kubenda eni athu enda kulaba tsiku ya Moshi. ²¹ Kudi athu akonda kulabanga tsiku, nienda kwikhina mudi eni, keshiku etshi nidi nijiku tshiku jia Nzambi ami mweni, kashi nienda kulaba tshiku ya Yesu, kienekina na lunga kubenda athu lawu enda kuleka kulaba tshiku. ²² Kudi athu akonda lukwikilu lwa ngolu, nienda kuhanga mudi eni,kikuma ni swakadi kuwa hulusa. ²³ Niekhinini kuhanga mudi athu, kikuma tshangu ya mboti yileki nikana mudi mupepi, mu pila etshi ami ni noni malawu moyi. ²⁴ Nwijiku etshi athu enda kuhanga tshaka jia kunona fishi enda kujihanga athu lawu, kashi mumoshi wenda kunona matapishi. Enu ndangenu fishi kienekina mu kununga. ²⁵ Muthu mwoshu wenda kuhanga tshaka, wenda kulemvuka ku tshiku jingi. Wenda kuhanga kienekina mu kunona lukumu lwenda kukonda kujinga, kashi etu twenda kuhanga kienekina kikuma kia kunona lukumu lwa kajinga mvula ni mvula. ²⁶ Kikuma, nienda oku kwenda fishi konda kikuma, mu kuleka kukaya muhunga. ²⁷ Kashi nienda kuniokula mwila wemi wekhina mudi muhika, mu kulombulula kudi akwetu etshi ami mweni nishuki mumolu.