¹ Kikimweni nia zola kwakudila mambu ma nwa ngu sonikinini. Nia kula etshi: kudi ni ma tangwa mekha ma konda kukhala mboti yala mu kujinga ni mukajienji. ² Kashi mu kutshina pukumuni, medi mboti koshu yala akwedi mukhetu wenji, koshu mukhetu epi akhadi ni mulumienji. ³ Yala afeti kulungisa nzala ya mukajienji, mukhetu epi afeti kulungisa nzala ya mulumi enji. ⁴ Mukhetu keshiku fumu wa mwila wenji, kashi kiyeka kidi kudi Mulumwenji. Pila yimoshi kudi yala,Mukaji enji wudi fumu wa mwila wenji. ⁵ Nu dikapula oku muhela, kaka yivwa nwa zola kudihana mwa tangwa mu yisambu. Kumanima na vutuka ki nwenda kadi kukhala; nu kukuka oku kudi keba, he Satana wu kuhenga ku nu hukumuna. ⁶ Nienda nia nu leza mambu ama mudi mulongi; keshiku mudi tsiku. Nienda nia banza etshi koshu muthu ⁷ akhadi mudi ami, Kashi wenda kuhana kudi koshu muthu makabu ma lunga kudi mweni. ⁸ Kudi a ndumbu, ni kudi awa afisa, medi mboti kudi eni mu kukhala ndumbu mudi ami. ⁹ Kashi yivwa etshi ka lungidiku kukasa mutshima, a kwedi kaka. Kikuma medi mboti kudi eni mu kukwela mu kuleka kubebisa nzala ya mwila. ¹⁰ Kikimweni kudi athu edi akwela, nienda nia wahwa tshiku eyi, keshiku ami kashi Fumu wa yi hana: "Mukhetu wa makwela ka lungidiku ku dikapula ni mulumi enji." ¹¹ Kashi yivwa etshi wa dikapula, akhedi kaka ndumbu,ho lo a vutukidi mulumi enji." Yala kalungidiku kuleka mukaji enji. " ¹² Kikuma kia athu ekha, ami - keshiku fumu - nienda nia hana mulongi etshi: Yivwa kudi ni pangi wakwela mukhetu wudi mupani, mweni wazola kukhala nenji dibela, ka mu leka oku. ¹³ Yivwa epi mukhetu wudi ni yala wudi mupani, wa zola kukhala nenji, ka jia oku wala. ¹⁴ Kikuma yala wudi mupani, walunga kuhuluka kumanima ma mukaji enji wudi mukhidishitu; Mukhetu wudi mupani epi walunga kuhuluka kumanima ma mulumi enji wudi mukhidishitu. Yivwa lo ana jiowu akhakhala asumuka; Kashi Nzambi wa wakumbula kadi. ¹⁵ Kashi, yivwa mupani wazola kwenji kwenda, mulekenu endi kwenji. Mu mambu ma kienekina, mukhidishitu wa yala to wa mukhetu, keshiku muhika wa wala. ¹⁶ Nzambi wa tu tambika mu kujinga mu ngemba. Kikuma, wushiku kwijiyanga, ayi mukhetu wa lunga kuhulusa mulumi eyi , ayi epi Yala wa lunga kuhulusa mukaji eyi. ¹⁷ Leka etshi koshu muthu akhadi kaka kia tangwa dia mutambikidi Nzambi. Eyi tshiku yemi nia hana mu mabundu moshu. ¹⁸ Muthu oyu wengila kadi mukanda, konda Nzambi a mu tambiki, wenda kusala kandanda. Mupani, tangwa dia kwikila a wa lunga epi kwingila mukanda e? Loni. ¹⁹ Kikuma kima kia hitangana fhunu, keshiku mukanda, kashi yidi kulemvuka ku jitsiku jia Nzambi ya hitangana fhunu yingi. ²⁰ A pangi amala ni akhetu, koshu muthu akhadi mutshindu wakhedi kadi tangwa dia mutambikidi Nzambi. ²¹ Nwakhedi ahika tangwa dia nu tambikid Nzambie? Nu diyangisa o ku. ²² Kashi yivwa nwa zola ku lunguka, hangenu kienekina. ²³ Oyu watambika Fumu mudi muhika, wudi muthu wa lunguka kadi kikuma kia Fumu. Kienikioki, oyu wa lunguka kadi, tangwa dia kwikila, wekhina muhika wa Khidishitu. ²⁴ Enu a nu sumbidi mu thalu yingi, nu khaloku ahika jia athu. Koshu muthu akhadi mu kisalu kiakhedi kuhanga tangwa dia kwikididi. ²⁵ Kikuma kia athu aleka kadi kukwela, Fumu ka ngu lejidiku kima, kashi nia zola kuhana mabanza memi. Nwa lunga ku ma shila mutshima, kikuma Fumu wa ngwividi khenda kienikioki a ngu shidi muthu wa kisalu kienji. ²⁶ Mu kutala jipashi ji nudi kumonga, nia banza ami etshi mboti muthu ka kwela oku. ²⁷ Enu nudi mu wala, nu jiya oku wala. Enu nudi a dumbu, nu henga oku kukwela. Kashi yivwa etshi nwa kwela, nwa hangidiku masumu. ²⁸ E e awana akwela, enda kuwanina ni mambu mengi ma pashi tangwa dia kujinga owu mbadi, nia zola ku nu katula mu pashi mwenejina. ²⁹ Kashi, nia kula eki kudi enu apangi: Yilumbu yekhina ya kutanga. Yanjika kikimweni, athu edi ni akheti ajingingi mudi kakhedikku nawu. ³⁰ Awana edi kudilanga, akhadi mudi keshiku ni masanga; awana edi sangu sangu, akhadi mudi keshi ni sanguka, awana azola kusumba, akhadi mudi keshiku ni yima. ³¹ Awana edi adihana mu mambu ma hashi, akhadi mudi etshi ka dihana oku kamu. Kikuma mambu ma henaha hashi ma kajinga oku. ³² Nia zodidiku kukhala muthsima mu wulu. Yala wudi ndumbu, adihani mu mambu ma Fumu, ni kuhenga pila ya ku mu sangusa. ³³ Kashi, muthu wudi wa kwela,wenda kudiyangisa mu mambu ma hashi ni kuhenga kusangusa akaji jenji. Wudi ni mitshima miadi. ³⁴ Henihohu mukhetu wa konda kukwela, to wa konda kwijika yala, wenda kudihana mu kisalu kia Fumu, ni kuhenga kukhala wa vedila mu mwila ni mu Pevi. Mukhetu wa wala wenda kudihana mu mambu ma hashi, nu ku sangusa mulumi enji. ³⁵ Nienda niakula mambu menama kikuma kia mammoti menenu, kashi nia nu shididiku muhetu. Niazola nu hangigi pila yidi ya lunga, nu dihani mvimba kudi Fumu. ³⁶ Kashi, yivwa muthu wenda wa kana kukwela, kumanima evwangana ni mukhetu etshi kakukwela oku epi, wahanga pimbu. ³⁷ Meshiku masumu. Kashi, yivwa wa zenga etshi ka kukwela oku, yivwa epi keshiku ku mutshinjikanga, wu kubula kudikeba, wahanga pimbu yivwa ka mu kwedidiku. ³⁸ Kienikioki, Oyu wazola kukwela mukhetu wenji wahanga pimbu. Kashi oyu waleka kukwela, wahanga pimu ya hitangana. ³⁹ Mukhetu afeti kujitisa tshiku jia wala tangwa diedi mulumi enji ni moyi. Kashi yivwa mulumi enji wafwa, wa lu nga kukwela koshu yala mwekha wazola, kashi makhadi mu jina dia Yesu. ⁴⁰ E,e mu mabanza memi, wu kukhala ni kieshi kingi, yivwa wasala ndumbu. Nia makula etshi, nia banza ami epi nidi ni Pevi ya Nzambi