¹ A pangi amala ni akhetu, nia lugidiku ku nu leza mudi nudi athu azala ni Pevi ya Nzambi, kashi nienda nia nu leza kaka mudi athu edi ni kimuthu. Kikuma mu mambu ma tadila khidishitu nudi khadi a bebe. ² Nienda nia nuhwa matedi keshiku misuni. Ni tangwa mwenedi nushiku kadi nwa kubama. ³ Kikuma nudi thethi ni kimuthu, kienikioki kimbeni ni matendu medi mengi mu katshi kenenu. Nwenda kaka epi nwa laba mambu ma kimuthu; mabanza menu medi kaka mudi ma athu oshu. ⁴ Yivwa etshi muthu mumoshi mu katshi kenenu wakula,"Ami nidi muthu wa Polu," mwekha etshi," Ami nidi muthu wa Apolo," nushiku kumonanga etshi nwenda nwa jinga mu kimuthu e? ⁵ Apolo wudi nani? Polu kama nani edi? Edi kaka athu ahwedi Nzambi kisalu, mu njila yoyu enu nwa kwikididi. ⁶ Ami nia kunini. Apolo wetshudidi meya, kashi Nzambi mweni wa menishini kheni. ⁷ kienikioki, ni muthu wa kuna ni oyu wetshila meya eshiku ni fhunu yingi, Kashi Nzambi wenda kumenisa. ⁸ Muthu oyuna wa kunini, ni oyu wetshididi meya edi pila yimoshi. Koshu wa kanona matapishi menji pila yidi kisalu kienji. ⁹ Kikuma etu oshu tudi athu a kisalu kia Nzambi. Enu nudi kilanga kia Nzambi, athu a hangidi Nzambi. ¹⁰ Mukhednajia ngu hwedi Nzambi, ami niashi mufulandala mudi kienda kuhanga atunga manzu. Niashidi mufulandala, muthu mwekha weza kutunga ha wulu. Kashi oyu wenza kutunga a wulu, leka akhadi wa dimuka. ¹¹ Kikuma, kushiku ni muthu walunga kushia mufulandala wekha ha wulu dia wathethikididi: Mufulandala mweni wudi Yesu Khidishitu. ¹² Kienikioki, moshu oyuna watunga a wulu dia mufulandala ni wola, ni ni arza, ni mayala ma thalu, ni mutondu to ni mwangu, ¹³ kisalu kienji kia ka mwekana mu katshi ka kieji kia kilumbu mwenekina. Kikuma thuya twa ngou twa keza ku meka kisalu kia hangidi koshu muthu. ¹⁴ Yivwa etshi kisalu kia hanga muthu kia jinga, a ka muhwa lufutu. ¹⁵ Kashi kisalu kiaya thuya, muthu mweno yuna wa ka mona pashi,kashi wa ka huluka mudi muthu wa huluka mu lufwa lwa thuya. ¹⁶ Nwenda oku kwijika etshi enu nudi nzu ya Nzambi, Pevi ya Nzambi yenda kijinga mu katshi kenu e? ¹⁷ Yivwa etshi muthu wazanga nzu ya Nzambi, Nzambi epi wu ku mu zanga. Kikuma nzau ya Nzambi yidi ya longu, enu epi. ¹⁸ Muthu kadihuna oku enjimweni. Yivwa muthu mu katshi kenu wenda wa banza etshi wudi mayela mengi mu mesu ma athu, leka ekhini waswinga, he anoni kia mayela ma kiedika. ¹⁹ Kikuma mayela ma hashi medi wuzoba kumesu ma Nzambi. Kikuma, medi ma kusonika etshi:" Mayela ma athu mekhina muhetu wenda ku wa kwatila." ²⁰ Nzambi wejiya mabanza athu edi ni mayela etshi medi ma pamba." ²¹ Kienikioki, wudi shitumuna oku kumesu ma athu. Kikuma mambu moshu medi menenu. ²² Yivwa etshi Polu ,Apolo, Sefasi, tshi yoshu, moyi,lufwa, yima yoshu yidi kikimweni to eyi yakheza kumesu, yoshu yidi yenenu, ²³ enu nudi athu a khidishitu, Khidishitu wudi Nzambi.