¹ Mu mambu ma tadila kuwonga fwalanga kikuma kia akhidishitu, hangenu enu epi mudi ki nia lejidi madundu medi ku Ngalati. ² Leka koshu muthu mu katshi kenu, mu lumingu, a hangiki ku nzu enji ndambu ya Fwalanga mu pila ya luzolu lwenji, kikuma nu leki ku ngu makinina tii koku ku nia keza. ³ Tangwa di nia ka tula, nia kahana mukanda kudi athu a nwaka sola, nia ka watuma endi kusendila a pangi edi ku Yeluselemi makabu menu. ⁴ Yivwa ya kalomba etshi niami niendi, twakenda nawu. ⁵ Nia keza kudi enu tangwa di nia ka hita ku Masedwane. Kikuma nia zola kuhitila ku Masedwane. ⁶ Nia banza nia kahanga mwa ndambu yilumbu kudi enu, mbala jiekha epi nia kahanga mvula. kikuma enu nwa ka lunga ku ngu shinjikila ku nia kenda. ⁷ Nia zodidiku kuhita kudi fishia fishi. Kashi yivwa Fumu wa nguhwa njila, nia banza nia ka hanga mwa yilumbu ni enu. ⁸ Nia ka jeta mwa fioti a Efeze tii kilumbu kia Pentekote, ⁹ kikuma a ngu kangudidi kishu kijima mu kuhanga kisalu kia bathu, mbata kioki ambeni edi lawu. ¹⁰ Yivwa Timote watula, mu yambenu mboti aleki kukhala ni woma, kikuma mweni epi wenda kuhanga kisalu kia Fumu mudi ami. ¹¹ Muthu ka nuhuna oku. Musadisenu alabi kuhanga kisalu ni ngemba, ti eza kutula kudi ami. Kikuma etu ni apangi ekha twenda twa mu makinina. ¹² Kikuma kia Apolos, nia mu bondidi hengi etshi eji kudi enu ni apangi, kashi mweni waleka mu kwiza kikimweni. Mwa keza koshu kilumbu kia ka zola Mweni. ¹³ Sungulukenu, nu bidisoku lukwikilu lwenu,khalenu athu a bathu, khalenu ni ngolu. ¹⁴ Leka koshu ki nwa zola kuhanga nu hangi ni luzolu. ¹⁵ Apangi, Nienda epi nia tuma athu ekha kudi enu. Enu nwejiya etshi kikanda kia Setufani, eni edi athethididi kwikhina akhidishitu ku Akayi, adihanini hengi mu ku hangila akhidishitu. ¹⁶ Khalenu ni lujitu kudi athu a kienekina, ni kudi awana enda kumona pashi njila yimoshi ni eni. ¹⁷ Nia sanguka ki nia mona Setufani, ni Fortunatusi, ni Akayis; ki nwa kondi enu, eni anonini palashi yenenu. ¹⁸ Kikuma, eni a lembikidi mabanza memi ni menenu. Henihohu, nu feti kujitisanga athu a kienekina. ¹⁹ Mabundu medi ku Asia ma tumisa mboti. Akilasi ni Pidisila, ni mabundu nedi mu manzu mohu, a nu tumisa mboti yingi mu jina dia Fumu Yesu. ²⁰ A pangi oshu a nu tumisa mboti. Hananganenu mboti ya ku mokhu; yambangenenu. ²¹ Ami mweni Polu nidi kusonikanga mukanda owu ni mokhu memi. ²² Yivwa muthu kazodidiku Fumu, a Shingami! Fumu etu Yiza! ²³ Leka khenda jia Fumu Yesu ji khadi ni enu. ²⁴ Luzolu lwemi lukhadi ni enu oshu mu jina dia Yesu Khidishitu. Amen.