¹ A pangi, Ki kikuma kia mamu matadila makabu ma Pevi ya Longu, nia zola enu nu bakisi. ² Nwejiya etshi, tanfgwa nwakhedi apani, nwa khedi kuhuniwa mu kusambilanga Yiteki, eyi yenda kuleka ku nu twadisa. ³ kienikioki, nidi ku nu lezanga etshi, yivwa muthu wenda wakula mu ngolu jia Pevi ya Nzambi, kalungidiku kwakula etshi" Yesu wudi wa shingama"; Muthu ka ku lunga oku kwakula etshi," Yesu wudi Fumu" yivwa keshiku ni Pevi ya longu. ⁴ Makabu ma Pevi ya longu medi lawu, Pevi yenda ku mahana yidi yimoshi. ⁵ Pila ya kuhangila Fumu, yidi ya selangana, kashi Fumu wudi mumoshi. ⁶ Pila ya kuhanga kisalu yidi ya selangana, kashi, Nzambi mumoshi kaka wenda kuyikapa kwa koshu muthu. ⁷ Kudi koshu muthu, ngolu jia Pevi jienda kuhanga kikuma kia athu oshu. ⁸ Kudi athu ekha, wa wahwa ndaka jia mayela, kudi mwekha ngolu jia kwijya mambu ma kitsweki. ⁹ Kudi mwekha, wa muhwa lukwikilu lwa ngolu, kudi mwekha epi ngolu jia kuhuka akhashi. ¹⁰ Muthu mwekha wa muhwa ngolu jia kuhanga mambu ma kuyituka, mwekha wa muhwa ngolu jia kubikula, kudi mwekha ngolu jia kwakula mambu makatukila kudi Pevi ya Longu, kudi mwekha ngolu ji kwijiya yivwa Pevi yidi ya mboti to ya bola, kudi ekha ngolu jia kwakula ndaka jia konda kwijiya athu, kudi mwekha ngolu jia ku ji tendula. ¹¹ Kashi mambu menamana moshu, wudi Pevi enjimweni wenda kuhanga pila ya zola enjimweni. ¹² Mudi kidi mwila wa muthu, wudi wumoshi ni yitshini yingi. Ata yitshini yidi yingi yidi yoshu ya laminina ku mwila wumoshi. Kienikioki medi kudi Khidishitu. ¹³ Kikuma, Pevi yidi yimoshi ya hangidi etshi, tu botami, twikhini etu oshu mwila wumoshi, yikhadi Ayuda to a Grec, ahika to athu akonda kukhala ahika. ¹⁴ Mwila wushiku kitshini kimoshi, kashi wudi yitshini yingi. ¹⁵ Yivwa mwendu wakula etshi:" kikuma nishiku koku, nishiku kitshini kia mwila," kushiku ni kitshini kia konda fhunu. ¹⁶ Yivwa diathu diakula etshi:" kikuma nishiku dishu, nishiku kitshini kia mwila," kushiku ni kitshini," kushiku ni kitshini kia mwila kia konda fhunu. ¹⁷ Nga mwila woshu wakhedi dishu, nga kwehi diatu diambidi kukhalee? Nga mwila woshu ukhala diatu, muzulu wambidi kukhala haki e e? ¹⁸ Kashi Nzambi washia mu mwila koshu kitshini pila ya luzolu lwenji. ¹⁹ Yivwa yoshu yidi kitshini kiomoshi, mwila wambidi kukhala kiehi? ²⁰ Yitshini yidi lawu, kashi mwila wudi wumoshi. ²¹ Dishu dia lungidiku kuleza koku etshi nishiku ni fhunu yeyi. Ata mutwa wu leji miendu etshi,"nishiku ni fhunu y' enu. ²² Kashi ayitshini ya mwila yenda kumwekana etshi yishiku ni fhunu yingi, ya lungidiku kukonda. ²³ Yitshini ya mwila yi twenda kubanza etshi yishiku ni lukumu, twenda ku yi jitisa hengi. Yitshini eyi yenda ku tuhwa soni ku mesu ma athu, twenda ku yisweka. ²⁴ He yitshini yenda kukonda ku tuhwa soni, tushiku ni fhunu ya ku yisweka. Kashi Nzambi wa hangidi mwila, mu pila etshi yitshini eyi ya konda lukumu, yikhini ni lukumu lwingi. ²⁵ Wa hangidi kienekina kikuma mwila wu di kapa oku, kashi yitshini yoshu yenda kudi sadisa,ni yenda epi kuzolangana. ²⁶ Tangwa didi kitshini kiomshi mu pashi, yitshini yoshu epi yengila mu pashi. Tangwa epi kitshini kimoshi kia nona lukumu, yitshini yoshu epi yekhina sangu sangu. ²⁷ Kikimweni, enu nudi mwila wa Khidishitu, koshu muthu wudi kitshini kia mwila wenji. ²⁸ Mu katshi ka dibundu Nzambi washia muthu ni muthu ni kisalu kienji: Thethi athumwa; ya kiadi ambikudi; mu kulaba amalongi, kumanima athu edi ni makabu ma kuhanga mambu ma kuyituka; ni athu edi ni makabu ma kuhuka akhashi, athu edi ni makabu ma kusadisa akowu, athu edi ni makabu ma kutwadisa yisalu mu dibundu, athu enda kwakula ndaka jia leka kwijiangana. ²⁹ Tudi etwoshu ambikudi e? Tudi etwoshu a malongi e? Twenda kuhanga etwoshu mambu ma kuyituka e? ³⁰ Tudi etwoshu na makabu ma kuwuka akhashi e? Twenda kwakula mu jindaka j'ekha e? Twenda kutendula jindaka e? ³¹ Tushienu kikesa mu kuhenga makabu mahitanga makabu mahitanga fhunu. Ami nia ka nuleza njila ya bathu.