¹ « Mu masonga, mu masonga, yeka lusamuna, wuna konda kota munzo yi ba tsasilaka mameme ku kiafulu, mana we kotila ku tubu di hika, mutu ,wuna kene mwifi pe n'hondi batu. ² Mukutala wuna kotila ku kielo kene n'hungudi mameme. ³ Mutu wuna kengidilaka kielo kan'kangudila kielo. Mameme ma waaka ndinga yandi pe katela mameme mana ma yandiene mu zina diaandi konso dimeme pe ka malubula. ⁴ Mu ntangu kalubudi mana mene ma yandi, ka kangala hantwala mawu pe mameme makwen'landi ; mudiambu mayebe ndinga yandi. ⁵ Malandako n'zenza, mana mukutala ye masonga man'tina n'zenza ; mudiambu mayebeko ndinga yi ba n'zenza.» ⁶ Yezu bateele kingana kiaki, mana baakulu baseloko kuhana kete kiima ki mosi mu maakulu maka bakambi. ⁷ Yezu bakambi diaka: «Mu masonga, mu masonga, yeka lusamuna, yene kiafulu ki mameme. ⁸ Baakulu bana biisa ku ntwala mene bene biifi pe ba hondi batu, mana mameme ma widiiku ndinga zibawu. ⁹ Yene kiafulu. Konso wuna kota mu nzila mène ka huluka; ka kota mpe ka lubuka, mpe kamona madia ma bunkete. ¹⁰ Mwifi ka kwisila kaka mudiambu di kuyiba, ku Honda batu ye ku bebisa. Mene, yisidi mukusonga ne ba monga luzingu pe ba lu monga kuhioka kiteso. ¹¹ Yene n'hungudi wu mboti. N'hungudi wu mboti kahanaka luzingu lu yandi kikuma ki mameme ma'ndi. ¹² Mutu kisalu keko n'hungudi pe ka vwidiku mameme. Nekamona mbwa n'situ keka kwisa, ka sundula mameme pe tini. Pe mbwa n'situ kama nata makaka pe mampanzisikisi. ¹³ Katini mudiambu kene mutu kisalu pe kadi yangisoko mudiambu di mameme. ¹⁴ Yene n'hungudi wu mboti. Yibayebe bana bene ba mene pe bawu bangieebe. ¹⁵ Tata ngieebe pe mene yin'yebe tata; mpe yi hanaka luzingu lu mene mudiambu di mameme ma mene. ¹⁶ Yene diaka ye mameme ma hika mana meku mu kihanga kiaki. Yi fweti kwisa banata pe, bawa ndinga mene pe mukusonga ne yikala ye kibuka ki mameme ki mosi mawu mpe makala ye n'hungudi mosi. ¹⁷ Tala kikuma kikanzodilaka tata: mpene luzingu lu mene mukusonga ne yi lumonga diaka. ¹⁸ hankatu mutu mpotumuna lwo, mana yeka luhana menene. Yene ye kiyeka ki kuhana pe ye ki kulumonga. Tata wu mpele n'swa wuna.» ¹⁹ Kukabana kukabuki diaka mukati di ba jwifi kikuma ki mambu ma mana. ²⁰ Biingi mukati di bawu bakala hoyaka: « kene ye mpeve zi ba ngulu pe n'twa ka kwen'sadiku kitoko. M'funu nki lukwen'wididi?» ²¹ Ba hika bakala hoyaka: « meku malongi makukala kwe mutu wu wene ye mpeve zi bangulu. mutu wu mpeve zi mbi fwene ka monisa kifwa meso?» ²² Mana disa feti di kutambika kimenga ku Yeluzalemi. ²³ Dikala mu nsungi yi kioso kingi pe Yezu kayenda kangadi mu tempelo, ku ndambu yi kibaka ki salomoni. ²⁴ Hakana ba jwifi ban'zuungi mpe ban'kembe: « tii kuna nki ntangu nge simbidila malongi ma ba siisa mu lweka? Na wene klistu, ntu samuna ha ntwala mutu wakulu.» ²⁵ Yezu bakabusidi mvutu: «yi lu kambi mana lueeka kwikiloko. Bisalu bi yeeka sala muzina di tata bieeka teendula m'vimba mene. ²⁶ Muku tala lueka ndimoko mudiambu lueeku mameme ma mene. ²⁷ Mameme ma mene mawa ndinga mene. Yi ma yeebe pe ma ndandaka. ²⁸ Yi ba heka luzingu lu mvula ye mvula ma fwoko mudibele pe ha nkatu mutu fwene kama hotumuna ha koko dimene. ²⁹ Tata mene wuu ba mpeka kene mbuta kuhioka bana baakulu pe ha nkatu mutu fwene kaba hotumuna ha moko ma yandi. ³⁰ Mene ye tata, ntwene kima ki mosi.» ³¹ mana, ba jwifi ba tonguni diaka matadi ba n'bula. ³² Yezu ba kabusidi mvutu: « yi lusongidi bisalu bi bunkete biingi bi tata mène. Munki biawu mukati di bisalu bina bilweka zola lu mbudila Matadi?» ³³ Ba jwifi ban'kabusidi mvutu: «heko mudiambu di bisalu bi mboti ntweka ku budila matadi, mana mukutala kikuma weka bebisa minsiku; kikuma ngeyi, mutu, weeka di monga nzambi.» ³⁴ Yezu bakabusidi mvutu: «masonamoko mu tsiku mibeno:" mpoyi lwene ba Nzambi?" ³⁵ ne kabatedi ba Nzambi, kwe bana bisa ye ndinga nzambi(mpe masonami ma bebaku kete bunkeke), ³⁶ bwe lweka hoyila ku kwene wuna kampetusi tata pe ka tumi ha nsi n'toto : "weka bebisa mitsiku", mudiambu mpoyi: yene mwana nzambi? ³⁷ Neyeka salako bisalu bi tata, hana lukwikidiku. ³⁸ Mana mu tsobanu na yeka sala, kukadi luzodi lunkwikila, lu kwikila ata kubisalu; mu diambu dina, luyaba pe lumona ne tata kene mukati di mene pe mene yene mukati di tata.» ³⁹ Ba meki diaka mukun'kwata Yezu, mana ba tini ha moko. ⁴⁰ Mbala yi zole, Yezu wele ku thandu yuludani, ha kizika ki kadila yohani ye kikaluluka batisila batu, pe ka zakadi. ⁴¹ batu bingi bisa kwe yandi mpe ba hoyi: «yohani kasadiku ata kikamwisi ki mosi, mana mambu makulu makahoyidi mutu wandu mene masonga.» ⁴² pe bingi ba kwikidi mu zina di Yezu ha kizika kiakina.