¹ Mbuta dibundu , nu phangi nga tshigina gayusi , nga tshigina mu masonga . ² Phangi ngatshigina , nga lomba hule ukhale mua bonga nu ima yaye ikima nu muila waye mu masonga nu monyo waye . ³ Heniaha ngudi nu gimbangi giaye mu masonga muphila udi mu wenda mu katshi'a masonga . ⁴ Ngudi nu kiese gia vula ha guvua egi anaye akima adi muwenda mukatshi 'a masonga . ⁵ Phangi , nga tshigina egi udi musala mu phila ya bonga mbala jikima udi mu sala gisalo mukunda nu aphangi nu a nzenza . ⁶ wanyi atele gimbangi gia gutshigina guaye ha meso 'a dibundu , udi musala mua bonga ha gu atuna mu phila ya bonga ya Nzambi . ⁷ Mukunda nu diene jina dinyi azogele , nu guzula ndo ata gima gimoshi gua athu wanyi ajiyigo gale Nzambi . ⁸ Etwe tufeto yamba athu a gisalo mukunda nu masonga . ⁹ Nga sonegele ndaga imoshi gu gimvuga gia athu , uvi diotrefes yonu watshigina ha gukhala muthu wa thomo mukatshi dia athu akima gua tu yambelego . ¹⁰ Gula nzeza , nga ibuga isalo inyi ya muene asalele , ikwatshi azuelele ima ya bola - bola nu jindaga jia bala mukunda nga vilego kiese mu isalo yenji , muene gua nu yamba go aphangi enji udi mu tunyisa athu anyi adi musala ndaga jia bonga , udi mu akaya mu gimvuga . ¹¹ Phangi 'ami nga tshigina uhati go makalegelo anyi abola , uvi kita ima ya bonga udi muenya Nzambi , uvi muthu yonu udi musala ima ya bola gua jiyilego Nzambi . ¹² Demetrusi wa zudile gimbangi gia athu akima mu masonga diago , etue tu hane gimbangi , mua jiy'egi gimbangi gietu gidi gia bonga . ¹³ Tangua nga yandiga ha gusonega mukanda , nga khalele nu ima ya vula , uvi haha , ngushi go mu isonega mu mukanda go . ¹⁴ Nga tangiza ha guza tudimone , n'aye lulu ngagi mu phila nyi tuzuelese ame nu aye . ¹⁵ Nga lomba gudi Nzambi aguhue Ngemba . Mafuta etu gugu ngagi agutumina mbote .