¹ Nu mbuta dibundu , nu mu kwetu yogo waponeye nji on'enji , wanyi nga tshigina mu masonga . ² Ishi go eme nga mitshigina hakhami , uvi nu athu akima wanyi ajiya masonga . ³ Bemba khenda , nu kuzumba , nu ngemba idi mu katuga gua Nzambi Tata nu Yesu kilisto Muna Tata ikhale n'enue mu masonga nu gutshigina . ⁴ Ngudi nu kiese giavula ha gumona anaye ako adi muwenda mu khatshi 'a masonga mu phila tua zudile shigo gua Tata . ⁵ Lulu ngagi nga gu bondila mukhetu ndo mu phila wa hwiya shigo yampa , uvi ule muthu tazudile ha guyandiga , hene tudi tshigine eswe n'eswe . ⁶ Mukunda gutshigina gunu mua giyile mu luyandigu gumutala phila ya guwenda mu shigo , shigo yene inyi mua longogile ha guyandiga idi egi mu fete wenda . ⁷ Hene athu avula adi mudimba athu ano azoga , eza mungila hoshi 'a mavu , athu hene ashigo mujiya egi Yesu kilisto wejile mu gifwanesa gia musunyi muthu muene muenya mambo udi mbeni wa kilisto . ⁸ Kebienu , muphila egi mule gutotesa ndo mabundu a gisalo gienu gia phashi , ginyi mba muzidela makapo avula . ⁹ Muthu mukima yonu umuya gua leha , uvi guashi nuyi nga nu khatshi 'a malongi a kilisto go , gueshi wa Nzambi go . muthu yonu udi mujinga mu khatshi 'a malongi a kilisto ,yonu udi nu Tata nu mona . ¹⁰ Gula muthu weza gudi enue wa tuna gu bata malongi wawa , muthu yonu gua ngila go mu inzo, mumuhwi go mbote yenu . ¹¹ Muthu yonu mba umuhua mbote , isalo yenji yabua ya masumu . ¹² Ngudi nu ndaga jia vula ha gumisonegela uvi nga tshigininego gu misonegela najio ha yiji nu tinta . uvi nga indulegi mba nguza guminona tuzuela kano nu kano , mu phila egi kiese gietu mba gikhale gia bonga . ¹³ Ana a pangiahe a mukhetu wa poneye agutumila mbote .