¹ Iyi mbala ya gi tatu ngu mu za ha gu mi tala. Ndaga jia feto tshiginiya gidi egi gula themwe gia athu mu yadi nga ndo mu tatu a ta gimbangi gia ndaga jiene. ² Nga zwelele gala ndaga idi mu talela athu wanyi a kitile masumu, idi gwa wanyi ako, tangwa nge jile mu mi tala mu mbala ya giyadi, haha ngagi, gula nge za mu mi tala nji mba ngu vila ata muthu khenda go. ³ Ngu mu mi leza nganyi, mukunda mwa tshigina gu mona gi jiyishilo mu phila Kilisto adi mu monesa mukunda nu eme. Gwashi wa hwila go mukunda nu enwe, uvi udi nu ngolo jia vula mukunda nu enwe. ⁴ Wa shiyiye holu dia khulunji mukunda mwila wenji wa sudigile mwila wa muthu, uvi udi nu monyo mu ngolo jia Nzambi. Etwe nji tudi nu gi muthu nu mwene mu gimvuga, hene mba tudi mu jinga n'enji mu ngolo jia Nzambi. ⁵ Di kaphenu enwe ha khenu ha gu tala gula mudi mu katshi dia lukwikilu. Di talenu ha khenu ha gu jiya phila mudi, to keti mushi mu jiya go egi Yesu Kilisto udi n'enu mu gimvuga? Gula ngo zwelenu egi mushi genu mwa nunga go. ⁶ Ngu mu haga gibeni mutshima egi enwe ha khenu mba mu zwela egi tudi ta nunga. ⁷ Lulu ngagi, tudi mu samba Nzambi mukunda mu konde gu kita ndaga jia bola. Tudi mu samba nganyi ishi go mukunda tu monese egi tudi ta nunga ndo, uvi mukunda nu gu kita ndaga jia bonga, ata tu shi mu tshiginiya go. ⁸ Mukunda ta jiyile go gu kita ata gima gi moshi ha gu kanga masonga njila, uvi idi kaka mukunda nu masonga. ⁹ Ta feto khala nu kiese gula tu shi nu ngolo go, uvi tudi nu ngolo, hene tudi mu mi lombela gwa Nzambi mukunda mu kituge athu a bonga. ¹⁰ Ngu mu mi sonegela ndaga jiji haha ngu di gwa leha mukunda tangwa mba ngu khala n'enu phene-phene mba ngu le gu khala ndo nu ndaga jia ngolo ngolo tangwa ngu di mu salela giyega ginyi nga zudile gwa Fumu, giyega gia gu tunga, uvi gia gu konda gu phanza. ¹¹ Hene, enwe aphangi a mala nu a akhetu, khalenu nu kiese, khalenu mudi hwa gikhesa, khalenu mudi visa mu katshi dienu, jingenu mu ngemba, nganyi Nzambi wa phungu nu maweze wa tu tshigina a khale mu katshi dienu. ¹² Khalenu mudi hwa mbote, nu gudi yamba. ¹³ A Kilisto akima a mi tumila mbote. ¹⁴ Khenda jia Fumu Yesu Kilisto, gutshigina gwa Nzambi, nu gimvuga nu Pheve-Santu ikhale n'enu tangwa dikima.