¹ Ngu feto gudi zalula, uvi ngu shi gami mu zula go ata gima. Lulu ngagi, nga tshigina gu jiyisa ndaga jia gimona meso jia gu yituga, mu ndaga jia funu jia ngu lezele Fumu. ² Ngu mu jiya mukilisto mu moshi, gwa balega mvula kumi nu ji wana wa kandugile gosa gwa tatu nu mwila wenji ukima to wa konda mwila, eme ngu shi mu jiya go,Nzambi ha khenji udi mu jiya. ³ Ngu mu jiya muthu mwene, ikhale nu mwila wenji ta wa konda mwila, ngu shi mu jiya go, kaka Nzambi udi mu jiya mwene hakhenji. ⁴ Wa kandugile gosa gu phaladisu gwa leha, gunu wa vile ndaga jia gu yituga jinyi muthu gwa shi go nu nswa ya gu zwela to ya gu tendula. ⁵ Ngu mu di zalula mukunda nu muthu mwene, ngu shi mu di zalula go mukunda nu eme ha khami, idi mukunda nu gu leza egi ngudi nga muthu udi wa konda gikhesa. ⁶ Ata nga di zalula, ngu shi mu kituga go nga unga mukunda nga mbo zwela ndaga kaka jia masonga. Uvi, ngu mudi kwata ha gudi zalula, mukunda ata muthu mu moshi ale gu ngu vudishila ndo ndaga gu ndaga adi mu ngu vila, nga ha gu mona ndaga jinyi ngu di mu kita. ⁷ Kaka mukunda nga lezeya ndaga jia gu yituga jia phila inyi mukunda ngu konde gudi zalula, mukunda nga hwiye musunyi wa isongesa mu phila wanjio wa satana a hanele sango. ⁸ Nga lombele gwa Fumu mbala ji tatu mukunda a ngu katule mu ndaga yene. ⁹ Wa ngu lezele egi: " Gu tshigina nga nu gu tshigina gudi ndaga yaye ya funu, mukunda ngolo jiami jia nu monega tangwa dinyi udi wa hwila. Nga bala gudi zalula gu ndaga inyi ya nu ngu katula gikhesa, mukunda ngolo jia Kilisto ji khale mu katshi diami. ¹⁰ Hene ngu di nu kiese mu tangwa ngu shi nu gikhesa go, mu mashingo, mu tangwa dia phashi mukunda nu Kilisto, mu tangwa dia mbangiga, mukunda tangwa nga nu khala nga hwila, kaka mu tangwa diene dinyi nga nu zula ngolo. ¹¹ Nga kituga nga unga! Enwe mwa ngu bangiga ha gu kituga nganyi, mukunda ya lombele egi mu ngu zalule, mukunda nga nu monesa go egi ngudi nga galenge gu twama dia thumwa jenu koma-koma, ata ngu shi nu gima go. ¹² Idimbu ya kielega ya gisalo giami gia gi thumwa gidi mudi monesa mu katshi dienu nu phila nga nu kanga mutshima; yene idi mu monesa ndaga jia gu yituga nu idimbu ya khumbwa ya vula. ¹³ Gubola khi nga mi kitile, nga kondele gu kita gu mangumba ako a isambu? Kaka gubola gu moshi, nga kitugile go ginemo mukunda nu enwe? Ngu lolulenu mukunda nu ndaga yene. ¹⁴ Tala! nga tshigina guza ha gu mi tala mu mbala ya gi tatu, mba ngu shi nji gu mi hwa ginemo go, mukunda ngu mu mi tshigina enwe athu, uvi ishi go falanga jenu ngu di kamba ndo. Ishi go ana a nu swega ima ha gu salesa ibuti yawo, uvi idi ibuti ya nu swega ima, mukunda nu anawo. ¹⁵ Eme mba ngu khala nu kiese gia vula ha gu mi kaphela ima ngu di nayo nu ha gudi tambiga mukunda nu enwe. Gula nga nu mi tshigina gibeni mwa vula, keti enwe mwa jiya gu ngu tshigina ga ndambu? ¹⁶ Ata nganyi, ngu shi mu mi khalela go ginemo, uvi enwe mudi mu zwela egi ngu di nu mayele a bola, nga nu mi dimba. ¹⁷ Keti nga mi dimbila mu njila ya muthu mu moshi yonu nga mi tumile? ¹⁸ Nga lombele gwa Tito ha guza mu mi tala, ebuna nga tumile nji phangi mu moshi ha gu mu sumbiga. Keti Tito wa mi dimbile ata mbala imoshi? Keti ta wendele go n'enji mu mutshima umoshi? ¹⁹ Keti tangwa dinyi dikima, mudi mu yindula egi ta khalele mu kamba phila ya gu samba gu twama dienu? Gu twama dia Nzambi mu gimvuga nu Kilisto, mukunda ndaga jikima tudi mu zwela jidi mukunda nu gu mi salesa salesa. ²⁰ Ngu mu vwa woma egi, tangwa mba ngu za mu mi vutugila, mba ngu le gu mi sanga ndo kaka mu phila inyi ngu mu tshigina, enji egi ngu le gu khala ndo phila mudi mu tshigina. Ngu mu vwa woma ha gu mi sanga mu katshi dia gumana, nu gingonzo, nu khabu, nu songi-songi, nu lulendo nu mavanga. ²¹ Ngu mu vwa woma egi, tangwa mba ngu za gu dimbo dienu, Nzambi mba a konde gu ngu monesa sonyi gu meso enu, enji egi mba ngu dile mukunda athu a vula a kitile masumu mwa leha, uvi ti nu magino khanji a bemba gawo go ndaga jia uthambi, nu ndaga jiko jia bola jinyi adi mu kita.