¹ Eme pholo thumwa wa Yesu Kilisto mu luzolo lwa Nzambi, nu Timote phangi'etu, gu dibundu dia Nzambi dinyi didi gu Kolinto nu gwa a santu akima adi gu gijuinga gia gu dimbo dia Akaya. ² Ngemba nu mambote a Nzambi Tata nu Fumu wetu Yesu Kilisto ikhale mu katshi dienu. ³ Nzambi, Sha Fumu wetu Yesu Kilisto a zule lukumu, Mwene udi Tata wa vula khenda, wa nu zwelela athu akima, ⁴ wa nu gu tu lembiga gu phashi jikima a nu khala najio mukunda tu khale nu phila ya gu lembiga phashi jia phila nu phila jia athu ako mu phila Nzambi a nu tu lembiga. ⁵ Mukunda phila ta nu mona phashi jia vula mukunda nu Kilisto, phila imoshi yene nji ta nu zula gu lembiga gwa vula mu njila ya Kilisto. ⁶ Hene gula tudi mu kutana nu phashi, idi mukunda tu zule gikhesa enji mba tu guluge. hene gula tudi mu zula gikhesa, idi mukunda enwe mu zule gikhesa jinyi gia nu mi salesa ha gu kanga mutshima gu phashi jinyi ta nu mona. ⁷ Hene, givuvu gietu gu khanda yenu gia nu nyigana go, mukunda tudi mu jiya egi mu phila mudi mu mona phashi , phila imoshi nji mba mu lembigiya ole etwe. ⁸ Tu shi mu tshigina go mu jiye phashi jinyi ta nu kutana najio gu khanda ya gu Aziya. Ta monele phashi jia vula, phashi jene jia balegele giteso hene ta jiyile go gula ta jiya nji gu jinga. ⁹ Ta yindudile egi ta batudiye khanu ya lufwa. Ndaga jene jia salamele mukunda tu hage mutshima gwa Nzambi yonu wa nu zugisa athu a fwa uvi tudi hagela go mutshima. ¹⁰ Mwene wa tu gulushile gu gingonsa gia koma gia lufwa, mba udi mu tu gulusa nji. Ta hagele mutshima gwa mwene egi mba udi mu hata kaka ha gu tu gulusa. ¹¹ Enwe mwa nu tu salesa mu isambu yenu. A vula mba adi mu hana matondo mukunda nu etwe mukunda nu mambote wanyi tudi mu zula gu mvutu Nzambi adi mu tu vutudila mu njila ya isambu yenu. ¹² Lulu ngagi, ndaga inyi tudi ha gudi monesa idi gimbangi gidi mu zoga gu guyindula gwetu mu phila tudi mudi twalesa mu lujingu lwetu haha ha mavu. Mwa vula vula gu twama dienu nu phila tudi mudi haga ole athu a santu nu a masonga adi mu katuga gwa Nzambi. Ishi go mu mayele a gi musunyi, uvi mu mambote a Nzambi. ¹³ Tushi mu mi sonegela go ndaga iko inyi mwa jiyile go gu tanga nga gu konda gu bagisa ngu mu haga mutshima egi mba mudi mu jiya ndaga yene mwa bonga sha. ¹⁴ Mu phila mudi mu tu bagisa mu ndambu egi mu gilumbu gia Fumu wetu Yesu mba tu khala gikuma gia mambote enu, mu phila yene mba mu khala gikuma gia mambote etu. ¹⁵ Hene mu phila nga hagele mutshima gu ndaga yene, nga kanesele ha gu mi jila, mukunda mu zule mambote a mbala jiyadi. ¹⁶ Nga hagele njila ha guza mu mi tala tangwa nga tshiginile guya gu Masedwane nu guza mu mi vutugila tangwa dia gu katuga gu Masedwane, mukunda mba muye mu ngu twala mu njila ya guya gu Yudeya. ¹⁷ Tangwa nga zudile dibanza dia njila yene, keti nga yindudile egi ndaga ya saga? nga ndo nga yindudile egi idi ndaga ya gi muthu, mukunda ngu zwele egi" Eya, eya", gu nyima ngu zwele egi " ndo, ndo "? ¹⁸ Uvi mu phila tudi mu haga mutshima gwa Nzambi. Ta jiyile go gu zwela egi" Eya" gu nyima tu zwele egi "ndo". ¹⁹ Mukunda Muna Nzambi, Yesu Kilisto yonu Sidive, Timoteyo nu eme ta mi longele gwa shi go "Eya" gu nyima "ndo". ²⁰ Mukunda ma laji akima a Nzambi adi "Eya" mu njila yenji. Hene mu njila yenji, mba tu zwela egi" Amen" ha gu hana lukumu gwa Nzambi. ²¹ Lulu ngagi, Nzambi wa tu hwile nenu ngolo ha gu jinga nu Kilisto mwene wa tu kungudile mafuta. ²² Mwene wa tu hagele gidimbu nu gu tu hwa pheve mu mitshima yetu ole gidimbu gia ndaga jidi muza. ²³ Haha, ngu mu tamega Nzambi ha gu khala themwe wami mukunda mwene wa nu jiya mutshima wami. Gula nga jile go mu vutuga gu Kolinto, ya khalele mukunda nu gu mi keba. ²⁴ Ishi go mukunda ta tshiginile gu jiya lukwikilu lwenu, uvi tudi mu kita nenu gisalo mukunda nu kiese gienu, mukunda mudi nu lukwikilu lwa ngolo.