¹ Itshi tuajiya guzuela luenyelu mukunda nu Abalahama, khakha yetu yamuenene mu uthu? ² Ndaga ya gula Abalahama watangewe nga watshiginyiwe mukunda nu midimo, nga wakhalele nu gibingua ha muene guditumbuisa uvi ndo gutuama dia Nzambi. ³ Ndaga ya, itshi idi muzuela yago udi ya gusonega ? " Abalahama" watshine mu Nzambi mu ngenyi yene inyi ya mutangewe mu giamatshidia." ⁴ Henyaha gudi yago udi mutshita mudimo, gishimbigo gienji gishigo mutangewa egi gia muhuwa mu khenda uvi gifwa gima giago gi gazangula ⁵ nu gudi yago gashigo mutshita mudimo uvi udi mutshigina yago udi mutshita yago ishigo yabonga, gutshigina guenji gudi nayo gutamegewa mu giamatshidia. ⁶ Davidi wazuelele guzela muila gudi muthu yago Nzambi wamutamegele mu giamatshidia gishigo nu midimo, nu guzuela: ⁷ "Gusuanguluga gudi ago Nzambi gafidile jikhenda nu gudi ago adi Nzambi watshigile gubola guawo. ⁸ Guzela muila gukhale gudi yago Nzambi gamutangelego gubola. ⁹ Guzela muila guene gudi mukunda n u ago adi akwa mukanda, inyi gudi ago ashigo akwa mukanda? Ndaga ya, tuana zuela egi gutshigina gua tangewe gudi Abalahama mu giamatshidia. ¹⁰ Luholo tshi amubatshuile ? Yakhalele hago akhalele amubatula gale inyi hago akhalele khenji amubatula gale ndo ? Wakhalele khenji amubatula gale ndo, wakhalele thondo. ¹¹ Abalahama wazanguile gijiyilo gia mukanda( gubatshuiwa ) gifua ginyemeno gia giamatshidia nga gia diago gia gutshigina guago gu gakhalele nago gudiangela hago gakhalele khenji gaya gale ndo gu mukanda hagula akhale tata ( sha ) athu agasue adi nu gutshigina nga hago akhalele khenji abatshuiwa gale ndo ha gula giamatshidia gia abatshuishiwe ( gia ahuwe ). ¹² Nu akhale tata ya akwa mukanda adi gashigo khuta akwa mukanda, uvi nji ago adi muwenda mu nganyo jia gutshigina gua shetu nga tata yetu Abalahama, gutshigina guago gu gakhalele nago gutuama dia muene, hago gakhalele khenji gabatshuiwa nga ha khalele muene thondo. ¹³ Gu gishina, yakhalelego mukunda nu gutshigina hene laji dia hanewe gudi Abalahama nu gudi gindongo gienji hagula mba akhale ahinyinyi a mavu agasue, uvi mukunda nu giamatshidia gia gutshina. ¹⁴ Ndaga ya ahinyinyi adi guene mukunda nu mikhuala, gutshigina gudi gua gituhu nu laji dia bembewe. ¹⁵ Ndaga ya mukhuala udi mubuta jikhabu , uvi gunu gushigo nu mukhuala, gushigo ndo nga hazonda gushiya gua mikhuala. ¹⁶ Hene ahinyinyi adi guene mukunda nu gutshigina nu gudivisa mukunda nu gisemo hagula egi laji dikhale diago guhua gua diago gudi athu a gindongo giagasue gia Abalahama, yago udi shetu khungi yagasue. ¹⁷ Gifua mu idi ya gusonega mu mukanda wa Nzambi egi: " Nga guhagela tata ya giphuta gingoshi giakoma;" Udi shetu gutuama dia yago Nzambi gatshiginyine, yago wana hana monyo gudi ago adi agufwa nu ago ana tamega ima yago ishigo nu monyo ha gukhala nu monyo. ¹⁸ Nga idi luholo tshi mu miho yagasue, Abalahama watshiginyine Nzambi ha gula egi akhale tata ya iphuta yavula mu luholo luago luakhalele yago ya muwambelewe egi: " ... gifua mba mukhala luholo lua umonyhi waye. ¹⁹ Gakhalelego waleba mu gutshigina, gawungulugilego egi muila wenji wakhalele gale wa gufwa nga nu ivo lukhama nu mukaji'enji Sala wakhalele wabalega gale ivo ya gubuta luko nu guzoga mahatshi. ²⁰ Uvi wasalele mu gutendelela gua Nzambi. Abalahama gakhalelego muthu wakola matshui nu guleba gua matangi, uvi wakhalele muenya ngolo mu gutshigina ha guhana lutumbu gudi Nzambi. ²¹ Wakhalele diago nu gutshigina nga gudifelela egi yago yangutendelele Nzambi mba itaganesewa. ²² Ngenyi yene inyi ya mubatshuiwe mu giamatshidia. ²³ Uvi gakhalelego khuta mukunda nu muene hakhenji, idi ya gusonegewa mu mukanda wa Nzambi egi:" Yrene inyi ya mubatshuiwe ngenyi." ²⁴ Idi ya gusonegewa nji mukunda nu esue gudi ago yene inyi mbayibatshuiwa nga mba ituhuwa gudi esue ago tudi mutshigina gudi yago wazugile gu gufwa, Yesu-klisto Fumu yetu. ²⁵ Yago wakhalele ya guhanewa gifua mulambu ha gutukula mu gubola nu guzuga gu gufwa mukunda nu gutubingisa gifua tua tshitshilego nga gima gingoshi giabola.