¹ Phaula muenya mudimo wa yesu Kilisto, watamegewe ha gukhala mupostolo, wa hagewe mu lukalo mukunda nu guzuela lukuma lua bonga lua Nzambi. ² Mualeha ya jiyishiwe gudi azuedi a ndaga jia gutuamesa mu mbimbi jiago jia diago jidi jia gusonegewa. ³ Mukunda nu munenji yago wabutshiwe mu mulungo wa Davidi. ⁴ Wakhalele ya gudijigiwa mu ngolo jia givule giabonga, gu guzuga guenji gu ngima dia gufwa gua yesu klisto Fume yetu. ⁵ Mukatshi dienji, tuazanguile ngasa nu upostolo mu gutumaga nu gutshigina mukatshi dia iphuta yagasue ya ha mavu, mukunda nu jina dienji. ⁶ Mukatshi dia iphuta yene yagasue muakhalele nji nu athu agutamegewa ha gukhala athu a Yesu Kilisto. ⁷ Gudi agasue adi gu Lomo, athu aguzumba guabonga gua Nzambi nu ago adi agutamegewa ha gukhala asantu, nu gisemo nu guhuima gudi nu enue mu Nzambi, shetu nu Fumu yetu Yesu klisto ⁸ Gudiangela ngudi muhana gisemo gudi Nzambi yami ha ndaga ya gutshigina guenu gudi gua dijigiwa mavu agasue. ⁹ Mukunda nu Nzambi udi themua yami u ngudi muvua mu mutshima wami mu lukuma lua bonga lua munenji nu guzuela mukunda nu enue. ¹⁰ Muagasue mu gukombelela guami, gumulomba ha enue guya gutuama mu maluholo agasue nu henyaha mu gisemo gia Nzambi ha gutshigina ame guya gu mbodienu. ^{11 12} Ndaga ya ngatshigina gumimona ha gumihua guhana guko gua mu givule mukunda nu gumihana ijiyi nga gumikolesa mu gutshigina. Nu gutukolesa mu gutshigina guetu, guami nu guenu. ¹³ Luenyelu ngatshiginyilego mujimbile anetu a mala, ngatshiginyilego ha gumitala nga gumimenega mahugo avula , uvi ngakhalele ya gubindanesewa unu gunu nu mujiye egi ngudi nu dibundu mikatshi dienu gifwa muakhalele ndaga mukhatshi dia jingulungu nga thondo. ¹⁴ Ngudi nu mukudi ungoshi mukunda nu enya Geliga, nu jithondo nu enya ndunge nji, nu gudi agi ashigo mujiya gima nga njimbidi. ¹⁵ Ngenyi ngudi nu giheho giakola ha gumiwambela lukuma luabonga ludi ngolo jia Nzambi gudi enue ago mudi gu Lomo. ¹⁶ Mukunda nu ngenyi, ngushigo nu musonyi mukunda nu lukuma luabonga. Ludi ngolo jia Nzambi mukunda nu yagasue udi nu gutshigna. Gudiangela enya yuda nu enya Geliga. ¹⁷ Ndaga, idi mukunda nu lukuma luene luabonga, na hene giamatshidia gia Nzamni giakhalele gia gulondolola mukunda nu gutshigina nu guya gutuama gifwa mu luholo luago ya sonegewe egi:" Muenya giamatshidia mba ubamba gutshigina mukunda nu gusala nu monyo. ¹⁸ Khabu jia Nzambi jiana gudimuenegesa sendese gosa mu madilu ha gutuna gubola guagasue nu gutuna ndaga jiagi jishigo jia giamatshidia jiana tshitshiwa gudi athu mukunda nu njila jiawo jioabola, anasuega ndaga jia giamatshidia. ¹⁹ Nzambi wana gu asophela, ndaga ya yagasue idi nayo gukhala ya gujiyiwa gudi Nzambi, idi ya gujiyiwa nga gudimuenegesa gudi ene. Mikunda nu Nzambi muene hakhenji wa' ajiyishile nayo. ²⁰ Sendese gu gufugiwa gua mavu, ima yago yakhalele yajiyilego gumuenega, yago ya buishiwe ya gujiyiwa, yago idi mutalela unzambi nu ngolo jia mayilago yakhalele ya gudijijiga diago mu yagasue ya fugiwe. Hene, mba gakhadigo nu ya guatotesela. ²¹ Mukunda nu muajiyile gale egi Nzambi yowu, amukombelelego gifua Nzambi nu amuvutshuilego hamba dia hana. Uvi abuile agasue njimbidi mu matangi awo nu mitshima yawo nu ajiyilego gukhaphumuna, akhalele agutshuigiwa mu phipha. ²² Akhalele gudihala egi, adi enya ndunge n u meso awo hakhawo, abuile njimbidi. ²³ Ha gula ahanyi lutumbu gudi Nzambi, akhalele mukombelela ikhokho idi nayo gufua, ikhokho ya muthu mungoshi, nga ya ganjila gangoshi, nga shitu ingoshi , nga ifugilo yagasue idi mu wavula mu mavu. ²⁴ Mukunda nu ngenyi, Nzambi wa' abembele mu nzala jiawo jiabola jia mitshima yawo mukunda nu akhadigo gudinemesa mukatshi diawo mungoshi-mungoshi mu mila yawo hakhawo. ²⁵ Ene ago adi musombegesa giamatshidia nu mambo, ene angoshi adi mutumbuisa ifugilo habugu dia mufugi yawo, yago udi ya guzela muila mu mayilago nu mayilago. Ikhale ngenyi. ²⁶ Ha ndaga ya ngenyi, Nzambi wa'ahanene mu matangi awo adi agutewa mukumbu. Hene akaji'awo asombegesele gudivisa guago gua gishina nu gudivisa guago gushigo gua gishina diago. ²⁷ Luholo lungoshi luene, mala abembele gudivisa nga ufuta wago wa diago nu akaji'awo mukunda nu guhana matangi awo gu ufuta wago ushigo wa diago. Mukatshi diawo, mala-mala adibungishile mu ufuta wa luholo luabola. Mukunda nu ngenyi, hene Nzambi ga' asophele mu luholo luago luakhalele nayo guzangula mu luholo luago abalumuine. ²⁸ Mu luholo atshiginyile go gubamba, guzuela nga gudijigiwa gudi Nzambi, na wa'ahanene gu matangi awo akhalele mu lukalo ha gutshita yago ya khalelego nayo gutshitshiwa. ²⁹ Mukunda nu gukhala aguzala mu ndaga jishigo jia giamatshidia gifua khabu, guminyina gima gishigo giaye mate, ndunge jiabola, nga matangi abola, akhalele aguzala pha nu iheho ya mila, gudishiya, gumana, gudihuiga, mitshima ya khuta nu matangi abola mu mitshima yawo. ³⁰ Akhalele enya gusegulula ako, ndaga jia usala, enya mangala-ngala, enya gudikandugisa, alumbugi gudi mangina awo. ³¹ Akhalelego nu jindunge, akhalelego nu mitshima yadiago, akhalelego nu jikhenda. ³² Ajiya muabonga gulumbuluisa gua Nzambi ndaga ya agasue adi mutshitshila midimo eyi, adi atagana ha gufwa, anatshitago khuta ndaga jiene jinyi, uvi asolola nji ago adi mutshita ndaga jiene.