¹ Ene eli emono e Yezu Kristu eyopii Nzeam djwi na ngyegne vear ande otshia vii afwete ndog le ntshuu ileye. Akabnde vii awo ntangu eyitum nde wanzio ende etay e Yoani. ² Yoani s'epiinde ntiegn ne vii alir otuba o Nzeam mpe ntiegn ne vii alir Yezu Kristu mpe s'ekabnde vii ankum ayiyen nde. ³ Kiese eyi ya wur etanga n'otuba o dzug mpe ya wur eyug otuba o waprofeta, mpe ya wur elemfuka ne vii amifugn wo le tii, djwi ntangu ewo etivanga. ⁴ Mug, Yoani ya mvuru i Nzeam ishambia ili n'Azia : ngrasia na ngemba iyi ya gnu, ngrasia ti ngemba iyum ya wur eli, ya wur eyiyii mpe ya wur eleye mpe iyum na mpeve ishambia iyi ne nteang i kiti ende ekub, ⁵ ti iyum ya Yezu Kristu, temwe e masonga, nsom enteang e vear amiwa mpe mon e wankum ili ne buu ene. Ya nde wur esleang mpe eyiselimi ne masumu ne mbug alung ande - ⁶ nde emisekumisa vear ekub ende, wamimpe i Neam Tea - ya nde eli na lukumu mpe biuu mvwe na mvwe. Amene. ⁷ Yenagni, ndean aleye ne mafuba ; dziy inkum asoyen wo, ata vear ayotog ikwong n'epagn. Mpe etuba enkum ne buu ene ayaliyewo djwi na nde. Ee, Amen. ⁸ Nkum Nzeam atuba ngean : " Nde alfa mpe omega, nde wur eli, wur eyiyii mpe wur eleye, nkea biuu." ⁹ Mug, Yoani - otwung ognu mpe wur elevey ikab mbug emog ndagnu ne mpay, n'ekub e Nzeam mpe n'inaagn iletsugsu na Yezu - ayikime n'esiang evyewo Patimos, djwi n'otuba o Nzeam mpe djwi na kitemwe e Yezu. ¹⁰ N'eshuu e Nkum, Mpeve ankirnde, mpe s'ayugme ne mbiy eme otuba omog obiuu kamesi oshuru o isig. ¹¹ Otuba owo s'ankabinde ngean : " Fugn vii ayen yie ane n'onkean, ye tum wo ne mvuru i Nzeam ishamia ili n'Efezo, ne Simirna, ne Pergamumi, ne Tiatira, ne Sardisi, ne Filadelfia mpe ne Laodisea." ¹² S' atshim me mbiy djwi na ndjia oshin otuba nge etuba nda me, mpe ntangu emitshim me, ngyen mwinda ishambia i wolo. ¹³ Ne kati kati e mwinda ishambia iwo, ayiwo na wur emog eyi kamesi mon e wur, emilwer olobo otitey, emitshung okab owolo n'ebim. ¹⁴ Ote onde ti awuu ande ayiwo siy kamesi afur a siy agnam, kamesi nezi to atari a mvwe mpe viy ande kamesi ikib i tshia. ¹⁵ Nkuu inde ayiwo kamesi ebende e tshia, kamesi bronzi emileam wo n'ibulu i tshia mpe otuba onde ayiwo kamesi oshuru e waley entsign ilekukuli na biuu. ¹⁶ Ne wum ewuo ende, akirnde weer to mbwetete ishambia. N'odzum onde, ompien omog onsor omitsug wo mpia vur inkeape s'epwiwo, mpe elung ende ayiwo kamesi vuun ntangu etsande mpiey na biuu onde onkum. ¹⁷ Ntangu emoyen me, s'alog me n'ekuu ende kamesi wur emiwa. Ayab wum ewuo ende ne djwung ime mpe atuba ngean : " Oyayug wom ve. Nde wur enteang mpe wur ensuka, ¹⁸ wur eli na luzingu. Awime, kansi yenaka, nde ne luzingu mvwe na mvwe ! Ye mikir nsab i ewa ti i wea e vear amiwa. ¹⁹ Yo yina, fugn vii amiyen yie, vii ayen yie opean mpe vii ayasayia ne mbiy i vii ane. ²⁰ Djwi na diswekamo elir mbwetete ishambia iyiyen yie ne wum eme ewuo mpe wamwinda ishambia i wolo : Mbwetete ishambia inagn ili wanzio i mvuru i Nzeam ishambia mpe wamwinda ishambia inagn ili mvuru i Nzeam ishambia."