¹ Okina elawo mampa ikwon ete, eviewo Pake, ayiwo etikum pipi. ² Ankum a wanganga-Nzambi ti walong i nsiku alingikiwo oshin osidjag wo Yezu, kansi aleyugikiwo womo e vear. ³ Satana ayiwo atishwe ne djuung i Yudasi Iskalioti, eyii emog ne kati e wantumwa djum n'ipe. ⁴ Yudasi s'atshinde nshwe mpfug ti ankum a wanganga-Nzambi ti ankum ayer-nkuu djwi n'oshin ositshung wo Yezu. ⁵ Ayen wo osiang entsign, mby s'opiiwo ekri. ⁶ Adzign etura, alingikinde oshin o wuo esiviende vear anagn wotshung djwi oluy o vear ankum anagn wakwon njia. ⁷ Eshu elawo mampa ikwon ete, Eshu e Pake ekug. ⁸ Yezu atum Petelo ti Yoane, ndenden: "Tshwag, wongagni ondii osilasu Pake." ⁹ Wokeara wuwun: "Oleang sitsi ngwong nonkagn?" ¹⁰ Nda wo ndenden: "Yenagni, ntangu esishwe gnu ne wiya enen, asiyen gnu wur emog alevari iwung i vay. Sadjieagni wur enagn tii n'evuru esishwe nde. ¹¹ Mby asitubagnu ya nkea evuru enagn gnugnun: 'Nkum alojwe yie ndenden: Ondii osilande Pake ti walongoki inde eli nonkagn?' " ¹² Mby asolagagni nde itunu evuru emog eli dzug, ti wankway neti: enagn wog ondii osilasu Pake." ¹³ Watsa, wayen ko oshin oyitubi nde, mby s'awong wo Pake ewo neti. ¹⁴ Ntangu etikug, s'alikiwo ne dzug i mesa ti wantumwa inde. ¹⁵ atuba nda wo ndenden: "Aleang me nda Pake ene ti gnu, ne nteang e mpay isiyen me. ¹⁶ Djwi mokabagni, mpayafila Pake ve, tii ko eyakug vii awo n'ekub e Nzeam." ¹⁷ Avey ikob, akeara nsag-na-vie, ndenden: "Veyagni ikob ine, gnuagni vinu ine itse-itse gnankum. ¹⁸ Djwi mokabagni, mpayafignua vinu ve, tii ko eyayia ekub e Nzeam." ¹⁹ Mby avey mampa, ntangu emishir nde nkeara nsag-na-vie, abag itign-itign, s'apiinde walongoki inde, ndenden: "Ene eli djuung ime emipeame djwi na gnu. Ayakiakagnu oshin one djwi onkanakagni me." ²⁰ Ntangu emishir wo nda epiekwo enagn, avey ikob i vinu apea, ndenden: "Ikob ine, eli alien a mpa e aluung ame amipwe djwi na gnu. ²¹ Kansi liragni wuo, wur esinsar ndean ali ti me ne mesa ene. ²² Mon-wur aletsu ewa, oshin omileang Nzeam, kansi mpay ya wur esosar. ²³ Mby, wabana njue wog na wog wuwun nagn eling nkie vii anagn? ²⁴ Ne kati e wantumwa, esiy epwe wog na wog, waling njia nagn elenga n'ekub. ²⁵ Atuba nda wo ndenden: "Wavuy i buu ene amigneg buu iwo, vear alekii n'ekub ewo atsawo amvie wo "vear a wuo." ²⁶ Epikug eyii oshin omog ti gnu ve. Wur elenga amuu ne kati egnu, wuo ayii kamsi imon ilieng, eli nkum ne kati egnu, ayii wur otshia e vear amuu. ²⁷ Wur ela ne mesa ti wur etsug olio ne dzug i mesa, nagn elenga? Epa wur eli ne dzug i mesa? Kansi me, mean ndi ne kati egnu kamsi opeagni vim anda. ²⁸ Gnu, olagni vear amiyen mpay ti me. ²⁹ Oshin omitsug Tea me ekub e dzug djwi na me, me mpi ndatsug ekub e dzug djwi nagnu, ³⁰ djwi gnu mpi, olelagni, ognuagni ne dzug i mesa eme, n'ekub eme, mby ognemagni ne nkway ekub djwi na mbag ewu e ekuu djum n'ipe e Israel." ³¹ Nkum ndenden, Simoni, Simoni, satana atiling ko oveyagni kamsi mbeam antu. ³² Kansi me, ntisama biu djwi na yie, djwi okalogo lukwikilu eyie, ntangu esikea yie, ntangu esikea yie, kaba atwung ayie wayii na kikesa." ³³ Petelo akeara ndenden: "Nkum, me asiyiame ko ti yie etay enkum esitsa yie, ata ne bolog, ata n'ewa." ³⁴ Mby Yezu atuba nda Petelo ndenden: "Mokaba, Petelo, nkogo apatovug lwo ene ve, yug ontonsan me mbala isar yiyen ompinjia me ve." ³⁵ Yezu akea ntuba ndenden: "Ntangu eyotumagni me memen oyaveyagni ekri, ataibwomo, ata antwum ne nkuu, akwon gnu vim? Wokeara wuwun: "Kaku." ³⁶ Mby atuba nda wo ndenden: "Opeane, wur eli n'ekri avey, eli n'ibwomo avey, eli kaku ompien ve, asar eleama ende djwi na nshum ompien. ³⁷ Djwi mokabagni, otuba oyifugn wo ene, asikug wo djwi na me: "Otsug wo ondii omog ti vear apwo." Vii awo wean aling nkug." ³⁸ Walongoki wuwun: "Nkum, yen empien epe ewean. Akeara ndenden: "Etikug." ³⁹ Ntangu emishir nde nda, epiekwo, Yezu atsa ne dzug ombimi oliveoshin oyitshikinde nshu inkum, walongoki inde wosodjie. ⁴⁰ Emikum nde neti, atuba nda wo ndenden: "Samagni djwi okalogagni ne mpukumuna." ⁴¹ Anam nda wo, atsa ontinteang, akr abong ne buu, mby s'asamikinde, ⁴² ndenden: "Tea, yug oleang, ondimi ikob i mpay ine! Kansi ekwon ngya luzolo eme, eyii luzolo eyie." ⁴³ Mby wanzio emog eyim dzug s'ayindompwe djwi n'ompea nde biu. ⁴⁴ Ntangu emiyen nde atikum mbeama n'ewa, s'asamikinde entsign, mbiiy epwe ne djuung, ekum kamsi aluung, s'alogokiwo aluy ne buu. ⁴⁵ Emishir nde nsama, ayima, akea etay e walongoki inde, ayen wativuraka na ngy-ngy. ⁴⁶ Nda wo ndenden: "Djwi na nge emivur gnu? Biyagni, samagnidjwi okalogagni ne mpukumuna." ⁴⁷ Ko ntangu eyitubikinde, yen oluy o vear wean wayia, wur eyiviikiwo Yudasi, emog ne kati e walongoki djum n'ipe, ndean ne nteang e vear angn. Avanga mbeama na Yezu djwi n'ompea nde mwa. ⁴⁸ Mby Yezu atuba nda nde ndenden: "Yudasi, otisar Mon-wur na mwa empea yie?" ⁴⁹ Vear ayii ti Yezu, emiyen wo vii asilog anagn, wuwun: "Nkum, s'anang empien ene?" ⁵⁰ Mby emog ne kati ewo s'anang nde ompien, ebag itii i wum i wur otshia e nkum e wanganga-Nzambi. ⁵¹ Yezu ndenden: "Siangagni etikug!" Mby akir itii i wur enagn, ovuga. ⁵² Yezu atuba nda ankum a wanganga-Nzambi, ankum a tempelo ti antsuru a dibundu, wog vear ayii ntshung Yezu: "Gnu, otiyiagni kamsi olingagni nkea wumu, ti empien ti eshung ne mbwo. ⁵³ S'ayiikime nshu inkum ne tempelo, okantshungakagni ve, opeane eli ntangu egnu, na biu e mpib." ⁵⁴ Ntangu emikir wo Yezu, s'ovariwo n'evuru e nkum e wanganga-Nzambi. Petelo alosodji etey mpign. ⁵⁵ Wapiey tshiya ne ngnina opeang, vear watigneme. Petelo mpi agneme nda wo. ⁵⁶ Wur otshia emog onkear ntangu emoyen nde ne nteang e tshiya, olir n'elung, ndenden: "Wur ene mpi ayiinde nda nde." ⁵⁷ Asan, ndenden: "Onkear ene, me mpijia ata wur ewo ve." ⁵⁸ Etean kaku, wur emuu oyen, ndenden: "Yie mpi, oli ya vear anagn." Kansi Petelondenden: "Ompeam ene, me epa ndi ti wo ve." ⁵⁹ Elig ntangu emog, wur emuu iky ayia, atsug inaagn ndenden: "Wur ene, vi-avii, ayiinde ti nde, djwi ene ali wur e Galilea." ⁶⁰ Kansi Petelo akearar ndenden: "Ompeam ene, mpijia ata vii atuba yie ve." Ko ne ntangu enagn eyiitubikinde, nkogo s'avug nde. ⁶¹ Ntangu emitshima Nkum elung, alir Petelo. Mby Petelo akea nkana otuba eyokabi Nkum: "Nkogo na ntovug lwo ene, asinsan yie mbala isar." ⁶² Petelo apwe, s'aliyikinde aluu. ⁶³ Vear ayiikirike Yezu saloyuikiwo two, alodjagikiwo isur. ⁶⁴ Wodzub elung, mby wojuike wuwun: "Kab, nagn emonang yie?" ⁶⁵ Watuba vii amuu entsign djwi na Yezu, s'alotwikiwo. ⁶⁶ Ntangu emikeam vuna, antsuru a dibundu, ankum a wanganga-Nzambi ti walong i nsiku wayia ondii omog. Wavara Yezu ne nteang ankum awo asibag ewu, ⁶⁷ wuwun: "Yug oli Kristu, otekabi." Kansi nde nda wo ndenden: "Yug mokabagni, opadjiragni ve, ⁶⁸ yug me mpi mojueagni, opakugagni na nkeara me mvutu ve. ⁶⁹ Bana lwo ene, Mon-wur ayagneme nde ne wum ewuo e ekub e Nzeam." ⁷⁰ Wankum s'atubiwo: "Yie kog, oli Mon e Nzeam?" Akearandenden: "Ko oshin omituba gnu." ⁷¹ Mby s'atubiwo wuwun: "Kaku mfunu esifiling su ntiegn ve. Sitiyug emituba nde n'odzum onde ndemie."