¹ Yezu, ntangu emisiang nd viy, ayen ankea otsun oshin oyipikiwo makabu n'esag. ² Ayen ti nsakwe emog omva, ayia ntwomo akutu ape. ³ Yezu ndenden: "Mokabagni vi-a-vii, nsakwe ene atipea makabu ilenga vear ankum. ⁴ Djwi makabu imipea vear amuu, eli ekri eli kaku wo na mfunu ewo, kansi nde, atipea n'oshin onde, ekri ende enkum eyikinde na wo djwi na luzingu ende." ⁵ Vear amuu atubikiwo n'intieng atari ayitwung wo tempelo ti vim ayipikiwo makabu neti, mby nde s'atubinde ndenden: ⁶ "Nshu ileye, opayafiyenagni itari ne dzug itari imuu ve, inkum ayabvuo wo." ⁷ S'ojuiwo wuwun: "Long, vii anagn ayayiawo ntangu enkagn, mpi kidimu nge eyayia djwi na njia susun vii awo aleye?" ⁸ Yezu akeara ndenden: "Osugagni, wur apodjimagni ve. Djwi vear entsign ayayiawo ne dzin ime, wuwun: Eli me. Ntangu ewean etivanga, kansi gnu, oyasadjiagni wo ve. ⁹ Yug otiyugagni oshuru o mbaagn, oyayugagni womo ve, Ekug wuo vim anagn atoyia nteang. Kansi enagn epatoyia nsuka ve." ¹⁰ Mby akaba ndenden: "Buu emuu ayalwawo ti buu emuu, ekub emuu ayalwawo ti ekub emuu. ¹¹ Buu ayagnugakawo, n'endii n'endii, wankeang ti nziya ayayiawo, ti vii a womo, ti bidimu ne dzug olung. ¹² Ne nteang e vii anagn, ayotshungakagni wo, ayopeakagniwo mpay, ayopeakagniwo ne mbwo ankum a sinagoga, ayotwomakagni wo ne bolog, ayovaragni wo ne nteang e wavuy ti ankum a mbumater djwi na dzin ime. ¹³ Vii anagn ayayiawo djwi gnu opiakagni ntiegn. ¹⁴ Kansi gnu, oyayenagni mpay ve n'itura ignu djwi n'oshin oyatubagnu, ¹⁵ me, ayopeagni me otuba ti waagn djwi vear ayofugnagni waponungagni ve, wapafivea ata djiw isifitubawo ve. ¹⁶ Ata atea agnu ti amea agnu ayosarakagni wo, ata atwung agnu, ata vear apier mbeama na gnu, ti iwur ignu, ayadjakawo amuu ne kati egnu wawe. ¹⁷ Vear ankum ayotunakagniwo djwi na dzin ime. ¹⁸ Kansi kaku ata iwuu ote e wur emog eyalim ve. ¹⁹ Tsugagni ko biu, ayavugagnu moyo ignu. ²⁰ Ntangu eyayen gnu ayer-nkuu watidjing Yeruzalem, jiagni gnugnun wiya eling ngwa. ²¹ Mby vear ayayia ne Yudea wakim ne dzug embimi, vear ayayia ne kati e Yeruzalem wapwi, vear ayayia n'ivur wapayashwe ne wiya enen ve. ²² Djwi enagn ayayiawo nshu ikearawo mbela, djwi vii ankum ayiifugn wo akug. ²³ Mpay ya ankear ayayia na djim ti ankear ayayia na aman a nse ne mbwo ne nshu inagn! Djwi mpay ininen ayayiawo ne buu, Nzeam ayayegne nde nkier inde ya vear anagn. ²⁴ Vear ayawakawo n'empien, vear a buu imuu ayatshungakawo, ayavarakawo mpfumi ne buu iwo, mby empaagn ayamearakawo Yeruzalem na nkuu tii ko eyashirawo ntangu ewo. ²⁵ Bidimu ayapweakawo ne vuna, ne ngwon ne weer ti ne buu. Womo ayayiawo ya vear, wapafiyen oshin nge esikiewo ve, djwi nzey ayakiende oshuru ti opepe. ²⁶ Vear ayasugakawo egnim na womo ne ntangu eyakungakawo vii asilog ne buu, biuu inkum ili ne dzug ayagnug wo. ²⁷ Mby ayayen wo Mon-wur aleye ne mafuba, na biu ti nkembo eninen. ²⁸ Ntangu eyabana ndog vii ane emog-emog, kea ngyimagni, shungagni ete egnu, djwi evug egnu etikum pipi." ²⁹ Mby Yezu akea mpea etsig ene: "Yenagni oshung o nsuu ti eshung emuu ene enkum. ³⁰ Yug ko etipur nkaya, esilir gnu, ojiagni gnugnun siling nkum ne ntangu e mbiiy. ³¹ Oshin omog mpi ntangu eyayen gnu vii ane atikug, jiangi gnugnun ekub e Nzeam etikum pipi. ³² Mokabagni vi-avii, ndwong aman ane epalenga ve yug vii ankum ane atokug. ³³ Olung na buu ayaleg wo, kansi vii atuba me apayaleg ata itaang ve. ³⁴ Osugagni, itura ignu ikakum odzuru djwi na vim anda, djwi na gnuaka veana, ti ntsug ngy n'itura ignu djwi na luzingu egnu, djwi eshu ewo ekafilog kamsi ilung djwi gnu okwon njiagni. ³⁵ Djwi eshu ewo ayayiawo kamsi otii emitwomowo ya vear a buu opfugn. ³⁶ Keamagni viy, samagni ntangu enkum djwi oyiagni na biu e ndim ne vii ankum eyayia ene, djwi opwiagni oyiyimi ne nteang e Mon-wur." ³⁷ Mbiiy enkum, Yezu alongikinde neti e tempelo, kansi otshuu onkum atshikinde mvur ne dzug ombimi olive. ³⁸ Yug vuna etikeam, vear ankum atshikiwo etay ende ne suka-suka na ngyug along ande.