¹ Eshu emuu, ntangu eyilongike Yezu vear ayii neti e tempelo, ankum a wanganga-Nzambi, ti walong i nsiku, ti antsuru a dibundu s'ashwi wo. ² Watuba wa nde wuwun: "Otekabi, n'ekub e nagn elekiiyie vii ane? Go wur nagn emopea yie ekub ene?" ³ Akeara ndenden: "Me mpi, ndoyueagni djwi ine: ⁴ onkabagni, mbotika e Yoane, eyim ya Nzeam go ya vear?" ⁵ Watsa mpfug wog na wog, wuwun: "Yug simikeara susun: Eyim ya Nzeam, asituba nde ndenden djwi na nge ekadjiraka gnu ya nde? ⁶ Kansi yug simikeara susun: Eyim ya vear, vear ane ankum asitebug wo atari, djwi wajia n'itura iwo wuwun Yoane ali ngunsa." ⁷ Mby wokeara wuwun wapijia ve etay eyim mbotika ewo. ⁸ Yezu mpi s'atubinde ndenden: "Me mpi mpokabagni ve n'ekub e nagn elekiime vii ane." ⁹ Mby s'apiinde etsig ene ya vear ankum: "Wur emog afuy evur, asapea ya vear otshia wasalir, s'atshinde buu emuu, ayiinde etean mpiog. ¹⁰ Ne ntangu e nkie vim n'evur, atum wur otshia emog etay e vear alir evur djwi wopii ikab i vim amikiewo. Vear anagn wodjag isur, wokeara ko mbwo mpama. ¹¹ Akea ntum wur otshia emuu, wodjag isur, wopea nsogn ne viy a vear, wokeara ko mbwo mpama. ¹² Akea ntum emuu otatu, wonang wampura, wobug nelien, wokma. ¹³ Nkea evur s'atubinde ndenden: 'Asikieme esing? Ekug wuo ntum mon me ompeam eleang me, mbala emuu asilemfuka wo ya nde.' ¹⁴ Kansi ntangu emoyen wo nde, vear alir evur wuwun: 'Yenagni, ene wur eyasavey oleama-nzo e tea nde. Yag sodjagagni djwi oleama-nzo esakum esu.' ¹⁵ Mby s'odjag wo awa, wotomo nelien e evur.Ntangu ene nkea evur asakiende nge? ¹⁶ Asiyiande, asidjag nde vear alir evur enagn, asipeande evur ya vear amuu." Ntangu emiyug vear vii anagn, watuba wuwun vii ane epakum ve! ¹⁷ Yezu, ntangu emalir nde wankum, atuba ndenden: "Itari iyifangi vear ayiitwungike evuru itikum itari i mfunu ikir ikuu evuru?" ¹⁸ Wur eyalog n'itari iwo, ayamog nde. Yug itari iwo itilog ne dzug i wur, wur enagn ayayia nde gnimi-gnimi." ¹⁹ Ankum a wanganga-Nzambi ti walong i nsiku anatshung wo Yezu ko ne ntangu enagn, Kansi ayug wo womo oluy o vear anagn. Ajiiwo wuwun etsig emipeande enagn, atuba nda wo. ²⁰ S'asawo liraka Yezu na waagn, watum amuu wapwe kamsi vear a wuo, wayia etay ende djwi wolob odzum na vii asituba nde, djwi wotshung, wopii n'ewuo e wur ebag vii ti nkum e mbumater. ²¹ Vear anagn wojue wuwun: "Long, sijia atsayie ntuba mpi atsayie ndong ko ne mbug, opilir oshin oli wur ve, kansi atsayie ndong mbug e Nzeam n'oshin o masonga. ²² Ekug sifuti go sikwon mfuta mpaku ya Sezar?" ²³ Yezu, ntangu emiyen nde waagn ewo epwo enagn, akeara ndenden: ²⁴ "Tongyegnagni ikutu imog." Elung eli n'ekri ene, ti vii amifugn wo neti ene eli e nagn?" Wokeara wuwun: Eli e Sezar." ²⁵ Mby s'atubinde nda wo ndenden: "I Sezar, peagni ya Sezar; I Nzeam mpi, peagni ya Nzeam." ²⁶ Wakafikug ntuba ata djwi ve ne nteang e vear anagn, wayen ko ngituka na mvutu imipeande, wayia ko pwo. ²⁷ Wasaduse imuu iyitubike wuwun vear wapafikea mbiy n'ewa ve, wayia njue Yezu wuwun: ²⁸ "Long, yen vii ayisatefugna Moize: 'Yug otwung oyie ompeam atiwa, atisasugn nsakwe ekawur wo mon ti nde, otwung onsgn asakr wear, wawur ti nde ne dzin otwung emiwa. ²⁹ Opeang omog ayiiwo n'aman ampeam ashiambia. Mon e nteang atsug wear, awa, wakawur ve. ³⁰ Ozole asakr mpi wear enagn. ³¹ Otatu osovey, tii wankum ashiambia wakavea mon ve, wamiwa. ³² Mby-mby, onkear owo mpi asawa. ³³ Ne ntangu eyakea mbiy vear n'ewa, onkear onagn ayayia nde wear e nagn ne kati ewo? Djwi wankum ayiwo awum a nde." ³⁴ Yezu akeara ndenden: "Aman a nshu ine walekii avea mpi walepii aman awo n'avea. ³⁵ Kansi aman ayakug, yug watikum ne nshu ileye, ne ntangu eyabiy vear n'ewa, kaku eyavey wear ti wum ve. ³⁶ Djwi wapafiwa ve, ayakum wo oshin omog ti banzio, ayayiawo aman a Nzeam, djwi watikea mbiy n'ewa. ³⁷ Vear nkea mbiy n'ewa, eli vii ayikab Moize ntangu eyiyen nde tshiya n'oshung o mvu. Avie Nkum ndenden Nzeam e Abrama, Nzeam e Izak ti Nzeam e Yakob. ³⁸ Djwi Nzeam apa ali Nzeam e bafwa ve, kansi Nzeam e vear ali na luzingu, n'oshin otuba nde, wankum wali na luzingu." ³⁹ Walong i nsiku imuu s'avey wo otuba wuwun: "Long, otituba wuo." ⁴⁰ Wakafikug n'onjue ata djwi ve. ⁴¹ Yezu nda wo ndenden: "Oshin onkagn etubawo wuwun: Kristu ali mon e David? ⁴² Djwi David ndemie atuba n'onkeana e wankunga ndenden: 'Nkum atituba nda Nkum eme ndenden: Gneme ne wum eme ewuo, ⁴³ tii ko eyatsug me wambeni iyie ne ngie i nkuu iyie.' ⁴⁴ David alovie nde Nkum, oshin onkagn esifiyia nde mon nde?" ⁴⁵ Vear ankum ayugikiwo vii ankum ayitubikinde, mby atuba nda walongoki inde ndenden: ⁴⁶ "Osugagni na walong i nsiku, aleang wo nkien ko n'elobo etey-etey, wuo vear wapii wo mbea n'endii eli vear oluy, wuo wagnemi ko nkway i nteang ne wasinagoga, ne nkway i nteang n'okina. ⁴⁷ Ne mvuru i wansakwe, atsawo ntsa mvey vim awo ankum, aleang wo nkie ko bisamu itey-itey djwi wayen vear a wuo."