¹ Yezu, ntangu emishwe nde ne Yeruko, atear ne wiya. ² Yenaka nkea otsun omog, dzin inde Zakayi, nkum e vear avey ekri e mpaku. ³ Alelingikinde oshin osiyen nde Yezu, kansi apikug ve, djwi vear ayiwo oluy, mpi ayinde okwe. ⁴ Akim iveang nteang, atsamvean ne dzug oshung e sikomore, djwi aloyen ntangu esileg nde ne mbug enagn. ⁵ Ntangu emikum Yezu n'ondii onagn, asiang viy dzug, atuba nda nde ndenden: "Zakayi, kagn nkr, djwi me lwo ene, asiyia me n'evuru eyie." ⁶ Nde mpi s'akr ndeeveang-eveang, s'vey nde n'evuru ende n'osiang onkum. ⁷ Ntangu emiyen vear oshin onagn, s'atubikiwo wog na wog: "Atitsa mvur n'evuru e wur e masumu." ⁸ Kansi Zakayi emiyima nde ne nteang e Nkum, okaba: "Nkum, ndapea ya ankea emva ikab otsun ome ne ngnina, yug mikie ipwo ya wur na vim ende, asikeara me vim ende mabla inign." ⁹ Yezu atuba nda nde: "Evug etishwe lwo ene n'evuru ene, djwi nde mpi ali mon Abrama. ¹⁰ Djwi Mon-wur ayinde nding ti mvugawur enkum emijing mbug." ¹¹ Vear ayugikiwo vii anagn ankum, nby nde akea mpea etsig emuu, ayiwo atikum mbeama na Yeruzalem, mby ayenikiwo kamsi ekub e Nzeam eling mpwe. ¹² Atuba ndenden: "Wur emog owur wo n'okuu e vear otsun, aletshikinde buu emuu etey, djwi na ntsa mvey ekub e vuy, mby akey. ¹³ Avie vear otshia djum, apea wur na wur ikutu, ndenden: 'Sashumagni vim osarakagni tii ko ntangu eyakeame.' ¹⁴ Kansi vear a buu ende alotunikiwo, wasatum okiegn ne mby ende djwi watsinkaba vear angn wuwun oyaleangagni ayii vuy ve. ¹⁵ Ntangu emikeande yim mvey ekub e vuy, s'aviinde vear ande otshia eyiipinde ikutu ya wur na wur djwi na njia oshin omikiewo n'ekri ewo. ¹⁶ E nteang ayia, ndenden: "Nkum, ikutu iyimpii yie etiwur akutu djum." ¹⁷ Nkum okeara ndenden: "Eli wuo, oli wur otshia e wuo; djwi otikiewuo ne vim e fioti. Ndopea ekub, oli nkum elir viya enen-enen djum." ¹⁸ Wur otshia ozole ayia, ndenden: "Nkum, ikutu iyimpii yie etiwur akutu atean." ¹⁹ Nkum okeara ndenden: "Yie, olayia nkum e viya inen-inen itean." ²⁰ Wur otshia emuu ayia, ndenden: "Yen, ikutu iyimpii yie ewean, awumukime wog n'eleama, ²¹ djwi ayiikime na womo oyie, djwi vii ayie ali biu entsign; atsayie mvey vim ata n'ondii okasaky yie ve, atsayie nkeaga mbeam ata n'ondii okafuy yie." ²² Nkum okeara ndenden: "Wur otshia epwo ene! Ndalwon ko ne vii amituba yie; ojia yiyen vii ame aliwo biu entsign, atsame mvey vim n'ondii okasaky me, atsame nkeaga mbeam n'ondii okafuy me; ²³ djwi na nge ekatsayie ngwum ekri eme n'evuru ewum wo ekri, djwi ntangu esikeame ntsi vey ti ekri esiwur wo?" ²⁴ Mby atuba nda vear ayii kog ndenden: "Kumagni nde ikutu inagn, peagni ya wur eli n'akutu djum." ²⁵ Vear anagn wuwun: "Nkum, nde, ali n'akutu djum." ²⁶ Mokabagni, asipeawo ya wur eli na wo, kansi wur ekwon, askuma wo ata ivim ili nde na wo. ²⁷ Kansi djwi na wambeni ime wakaleang ayiame nkum, yagagni ti wo nendien, djagagni wo ne viy ame." ²⁸ Ntangu emishir nde ntuba vii anagn, s'akir nde mbug ne nteang e vear anagn, s'aletshikiwo Yeruzalem. ²⁹ Ntangu emikum nde mbeama na Betfage ti Betania, etay e ombimi eviewo Olive, atum walongoki inde ipe, ³⁰ ndenden: "Tshwagagni ne wiya eli nteang egnu, ntangu esishwe gnu neti, asiyen gnu mpunda emog watitshung oshing n'oshung, kaku ata wur emog emikuna ne dzug iwo ve. Pubagni nde, jiagni nendien. ³¹ YUg wur amoyueagni djwi na nge epubagnu mpunda enagn, asokearagnu: "Nkum ali na mfunu ewo." ³² Walongoki iyitum nde wayen mpi ko oshin oyakabi Yezu. ³³ Ntangu eyipubikiwo oshing, ankea mpunda wuwun: "Djwi na nge epubagnu mpunda enagn?" ³⁴ Wakeara wuwun: "Nkum ali na mfunu ewo." ³⁵ Mby s'ayiwo na mpunda ewo etay e Yezu, wayab ileama iwo ne dzug i mpunda, Yezu s'akuninde ne dzug iwo. ³⁶ Ntangu elekienikinde, vear wayia ileama iwo ne mbug. ³⁷ Ntangu emikum nde mbeama na Yeruzalem, elekrikiwo ombimi e olive, walongoki inkum wakum n'osiang, s'akearikiwo lokumu ya Nzeamn'otuba o biu, djwi na bidimu inkum iyiyenikiwo, wuwun: "Lokumu ya vuy eleye ne dzin i Nkum! Ngemba ne dzug, nkembo n'endii e dzug-dzug!" ³⁹ N'oluy o vear anagn, wafarize imuu s'atubikiwo wa nde wuwun: "Nkum, ngnianga walongoki iyie wayii pwo." ⁴⁰ Yezu akeara ndenden: "Mokabagni, yug wo wamiyia pwo, atari asitsug wo elie." ⁴¹ Emivanga Yezu mbeama na wiya, s'abanikinde na ndiye, ⁴² ndenden: "Yug ko otojia eshu emopeawo ene, otojia vim nge esopea yie ngemba! Opeane wean watiziy vim awo ne viy ayie. ⁴³ Ne snhu ileye, wambeni iyie ayodjing wo, ayogneg wo, ayotshigna wo etay n'etay. ⁴⁴ Ayopagna wo, ti yie, ti aman ayie, wapasasugn itari ne dzug itari imuu ve, djwi okajia ve ntangu e Nzeam emiyiande n'ondir yie." ⁴⁵ Ntangu emishwe Yezu ne tempelo, s'akmikinde vear ayisarike, ⁴⁶ ndenden: "Wamifugn wuwun: 'Evuru eme ayayiawo evuru e bisamu; kansi gnu, otitshimagni wog itsug ankea vimu.' ⁴⁷ Yezu alelongikinde konso eshu ne tempelo. Ankum a wanganga-Nzambi, walong i nsiku ti antsuru amuu alelingikiwo n'ondjag nde, ⁴⁸ kansi wakayenaka oshin osibana wo ve, djwi vear ankum aledjiikiwo along ande na wuo enkum.