¹ Mby s'apiinde etsig emog, djwi na nkaba wo wasamike ntangu enkum, wakwon ndeem, ² ndenden: "Ne wiya emog eninen, wur emog ebag vii akaluraka Nzeam ve, akayugaka ata ilag i wur emog ve. ³ Ko ne wiya enagn, ayiiwo n'onkear omog o nsakwe, ayinde n'onkaba ndenden: "Bag vii ame ti wur esama me ti nde ene." ⁴ Kansi wur ewo akaleangaka ve. Ndemie ndenden: 'Ata mpilur Nzeam ve, mpiyug otuba o wur emog ve, ⁵ oshin oleye ntuba nsakwe ene, ekug wuo mbag vii ande, djwi asiangi na mpeaka me ontwong osayu.' " ⁶ Mby akea ntuba ndenden: "Yugagni vii atuba wur epwo enagn ebag vii. ⁷ Mby Nzeam asikwon nde mbag vii aman amison nde, alovii mbiiy ti otshu, asiyia nde etean na nkeara wo mvutu?" ⁸ Mokabagni, asibag nde vii awo eveang-eveang. Kansi ntangu eyayia Mon-wur, ayayen nde lukwikilu eliko ya vear ne buu?" ⁹ Akeampea etsig ene, djwi vear amuu ayiyenike wuwun wali vear a masonga, kansi wapikii vii awuo ve ya vear amuu: ¹⁰ "Vear ape washwe n'evuru e Nzeam djwi na nsama, emog ayinde farize, emuu ayinde wur evey ekri e mpaku. ¹¹ Farize ayima, asama oshin one: 'O Nzeam, mokeara nsag-na vie djwi apa ndi oshin omog ti vear amuu ane ankum ve, otshia owo ko nkuma vear vim, kaku masonga ya wo ve, vear atsankie itaay, oshin omog ti wur evey ekri e mpaku ene. ¹² Me, atsame nkie okio mbala ipe ne mposo emog, atsame mpea vim ame ankum ikab imog n'akab djum.' ¹³ Kansi wur evey ekri e mpaku ali etey mpign, apikug na nsiang viy dzug ve, anang ko ewuo n'ebimi, ndenden: 'O Nzeam, nkier iyie ekri etay eme, ndi wur e masumu.' ¹⁴ Mokabagni, wur e mby ene akey nde ntsa evuru ende, Nzeam atiyug bisamu inde, kansi epa emuu enagn ve, djwi wur eleang avean ko dzug, ayokeawo ngie, kansi wur eleang akri ngie, asojir wo dzug." ¹⁵ Wojie aman alieng djwi akir, kansi ntangu emiyen walongoki oshin onagn, wangnianga vear aleyike ti aman anagn. ¹⁶ Mby Yezu avie ndenden: "Siangagni aman alieng waye etay eme, oyapumagni ve, djwi ekub e Nzeam eli ya vear ali kamsi wo. ¹⁷ Mokabagni vi-a-vi, wur ekavey ekub e Nzeam kamsi imon ilieng ve, apshwe mpi neti ve." ¹⁸ Nkum emog s'ojuinde: "Long e wuo, ekug nkii nge djwi mvey luzingu e mvwe na mvwe?" ¹⁹ Yezu okeara ndenden: "Djwi na nge emvie yie me wuo? Eli wuo eli ko Nzeam ndemie. ²⁰ Ojia wansiku ine: Oyakie itaay ve, oyadjag ve, oyakuma ve, oyapea ntiegn oyang ve, lemfuka ya tea yie ti mea yie." ²¹ Ndenden: "Atsame nkir onkwon onagn enkum yim ko olieng ome." ²² Ntangu emiyug Yezu vii anagn, atuba nda nde ndenden: "Ekwon vim emog ya yie: Sar vim ankum ali yie na wo, pea ya ankea emva, asivea yie otsun ne dzug, mby osandjie me." ²³ Ntangu emiyug nde vii anagn, akum ko ngy-ngy, djwi ayinde n'otsun entsign. ²⁴ Yezu, ntangu emiyen nde wur ewo atikum ngy-ngy, atuba ndenden: "Eli mpay ay ankea otsun na nshwe n'ekub e Nzeam! ²⁵ Kaku mpay ev ya mpunda na nshwe n'itunu i sindani, kansi epa ya nkea otsun ve djwi na nshwe n'ekub e Nzeam." ²⁶ Vear ayoyugike wuwun: "Mby nagn ayavug?" ²⁷ Yezu akeara: "Vim eli ya vear epikug ve, Nzeam akug." ²⁸ Petelo s'atubinde: "Yenaka su, sitisasianga vim asu ankum silosodjii yie." ²⁹ Yezu nda wo ndenden: "Mokabagni vi-a-vii, kaku wur emog ve eli, asasianga, djwi n'ekub e Nzeam, evuru ende, ata wear nde, atwung ande, tea nde ti mea nde, aman ande, ³⁰ akwon mvea entsign en mvwe ine ti ne mvwe ileye, evug e mvwe na mvwe." ³¹ Ne mby ewo, s'avey nde wankea djum n'ipe, ndenden: "Yenagni, wean siletsu Yeruzalem, vii ankum ayiifugn wangunsa djwi na Mon-wur asikug wo. ³² Djwi ayosar wo ya empaagn, ayoyuewo nde two, ayopeawo nsogn ne viy a vear, ayotwaga wo asuy. ³³ ayonang wo fimu, mby ayodjag wo; ne mby e nshu isar, ayabiy nde ne kati e wabafwa." ³⁴ Kansi wo, wakajiaka vii ankum anagn ve, djwi na wo, otuba onagn ayikiwo kamsi etsig, ne wagn owo, wakakir oshin o vii atuba nde ve. ³⁵ Yezu, ntangu emivanga nde mbeama ne Yeriko, wur emog emibuye viy atigneme n'ikri i mbug, otshia ko ngwigna. ³⁶ Emiyug nde oluy o vear waleleg, ajue vii awo nge. ³⁷ Wokaba wuwun eli Yezu e Nazarete wur eleleg. ³⁸ Mby wur emibuye viy enagn adzama na biu: "Mon e David, ongyug ngy! ³⁹ Vear alekienike nteang ende wongnianga djwi ayii pwo, kansi nde alega ndzama na biu: "Mon e David, ongyug ngy!" ⁴⁰ Yezu ayima ndenden ondjiagni wur enagn nendien. Ntangu emikum wur emibuye viy mbeama na nde, Yezu ojue: ⁴¹ Oleang mokii nge?" Akeara ndenden: "Nkum, ndaleang viy ame akey ngam." ⁴² Yezu atuba nda nde ndnden: "Viy ayie angam. Lukwikilu eyie etovuga." ⁴³ Ko ne ntangu enagn, viy ande angam, s'alodjiikinde, akeara Nzeam lokumu. Vear ankum ayiyen vii anagn, wakeara mpi Nzeam nsag-na-vie.