¹ Yezu atuba nda walongoki inde ndenden: "Eli mpay na nkwon vim asitelogo ne masumu, kansi mpay ya wur eyajie ibagu inagn! ² Anakug wo wuo wotshung itari ininen ne nking, wotwomi ne nzey, kansi epa atsug ibagu ne nteang e mon emog ne kati aman alieng ane ve. ³ Osugagni, yug otwung oyie atilog ne masum, keara nde ne mbug; yug amitshima etura ende, lolula nde!" ⁴ Yug atokie yie ipwo mbala ishiambia n'eshu emog, mbala inkum inagn, alekey etay eyiendenden: 'Ondoluli', asololula yie." ⁵ Wantumwa s'atubikiwo wa Nkum wuwun: "Tokasiang lukwikilu esu dzug." ⁶ Nkum ndenden: "Yug lukwikilu egnu etoyia onen kamsi ebeam e seneve, anatuba gnu ya oshung o sikomore ene: 'Lim kog, tshwag oyimi ne nzey', analemfuka nde. ⁷ Kansi, nagn ne kati egnu, yug ali na wur otshia ekie n'evur, ata elir gnam inde, atubi nda nde, ntangu elekey nde yim evur, ndenden: "Yag eveang, gneme, la ne mesa?" ⁸ Apatuba nda nde ndenden: 'Leam djwi na me, tshung okaba oyie, ompii vim anda, yug mishir nda, mishir gnua, mby yie osala, osagnua?' ⁹ Apakea nkana wuo emikie wur otshia enagn djwi atikie vii ayitubiwo ya nde? ¹⁰ Gnu mpi oshin omog, yug otikiagni vii ankum amituba wo ya gnu, tubagni gnugnun: "Sili vear otshia e mpama, sitikie vii ayiikug su na nkie." ¹¹ Ntangu eletsikinde Yeruzalem, alelegikinde ne kati-kati e Samaria ti Galilea. ¹² Ntangu eleshwi nde ne wiya emog, vear djum ayii na nkeang e ndwumwayia nsanga a nde. Wayima etey na nde, wajir otuba wuwun: ¹³ "Yezu, Nkum, oteyug ngy!" ¹⁴ Ntangu emayen nde, atuba nda wo ndenden: "Tshwagagni etay e wanganga-Nzambi djwi wpyenagni." Ntangu eletsikiwo ne mbug, wayen wuwun wativug ne nkeang iwo. ¹⁵ Emog ne kati ewo emiyen nde ativug, akea ne nkuu i nde, akeara Nzeam nsag-na-viye, n'otuba o biu. ¹⁶ Alog ne nkuu i Yezu, elung ngie, s'okearikinde nsag-na-viye. Ayinde wur e Samaria. ¹⁷ Mby Yezu atuba: "Wakayia vear djumali na nkeang? Mby vear iwua imuu inagn wali nonkagn? ¹⁸ Epa ko ongingien ene wur emikea djwi aye mpea Nzeam nsag-na-viye?" ¹⁹ S'atubinde nda wur enagn ndenden: "Tshwag, lukwikilu eyie etovuga." ²⁰ Wafarize ntangu emoyuewo djwi na ntangu enkagn eyayia ekub e Nzeam, mby Yezu s'akearinde ndenden: "Ekub e Nzeam epayayia kamsi oshin plir gnu na viy ve. ²¹ Wapayatuba wuwun: Ewean nendien, go eli nompign. Djwi ekub e Nzeam eli ne kati egnu." ²² Mby s'atubinde nda walongoki: "Nshu ileye, ayaling gnu oyenagni eshu e Mon-wur, kansi opayayenagni ve. ²³ Ayokabagni wo: Ali nompign, oyatsagni ve, oyakimagni aveang mpiog ve, ²⁴ djwi ko oshin otsampwe tshiya e nzarine dzug olung, yim etay ene ekum ti etay emu, ko oshin onagn eyayia eshu e Mon-wur. ²⁵ Kansi nteang, ekug wuo atoyen mpay entsign, ayofanga wo ya aman a ndwong ene. ²⁶ Vii ayilog ne ntangu eyii Noe, ayalog wo mpi ne ntangu e Mon-wur. ²⁷ Vear alikiwo, agnuikiwo, akiikiwo avea, apiikiwo aman awo n'avea, tii ko eshu eyishwi Noe n'ashwa, mvuye s'ateang nde, adjag wnkum. ²⁸ Vii ayilog ne ntangu e Loti, ayayiawo ko oshin omog, vear alikiwo, agnuikiwo, ashumikiwo, asarikiwo, afuyikiwo ivur, atwungikiwo mvuru. ²⁹ Kansi eshu eyipwi Loti ne Sodomo, mvuye e tshiya ti etugu e tshiya alog wo yim dzug, adjag wankum. ³⁰ Ayayiawo oshin omog eshu eyayen gnu Mon-wur. ³¹ Eshu enagn, wur eyavean ne dzug apafikr djwi na mvey vim n'evuru ve, ata wur emitsa evur apafikea mby ve. ³² Kanagni wear e Loti. ³³ Wur eyaling avugi luzingu ende, ayafanga nde, wur eyafanga luzingu ende ayakea nde mvea. ³⁴ Mokabagni, otshu onagn, vear ape ayavur wo ne ntir emog, ayavey wo emog wasasugn emuu. ³⁵ Ankear ape watog ne nguu ondii omog, ayavey wo emog, wasasugn emuu. ³⁶ Vear ape ayayiawo n'evur, ayavey wo emog, wassasugn emuu." ³⁷ Walongoki wa nde wuwun: "Ayayiawo nonkagn?" Akeara ndenden: "Ondii oyayia djuung, wog enagn ondii oyayia wankuma-nkuma."