¹ Yezu akea ntuba nda walongoki ndenden: "Nkea otsun omog ayinde na wur emog eyiwumike otsun onde, kansi wur ewo akawumaka vimawo wuo ve. ² Nkea otsun ovie, atuba ndenden: 'Vii nge eleyug me watuba djwi na yie? Onkabi vii ankum otshia emikie yie, djwi opafiwum vim ame ve.' ³ Wur enagn s'atubinde n'etura ende: 'Asikieme esing djwi nkum eme atindima n'otshia o ngwum vim ande? Ntsi nkie otshia e wur? Mpakug ve, mpi eli nsogn na ntsa ngwignaka ya vear. ⁴ Ntijia vim eyakieme, djwi ata watindima, vear walemveyike ne mvuru iwo.' ⁵ Avie vear ankum ayike n'abaya a nkum ende, atuba nda wur eyii nteang: 'Ibaya i nkum eme ya yie eli kwe?' ⁶ Akeara ndenden: 'Eli eleanga e vir nkama.' Nda wur ewo ndenden: 'Vey onkeana oyie ewean! Gneme nendien, kagn mfugn eleanga otean.' ⁷ Atuba nda emuu: 'Mby yie, ibaya iyie eli kwe?' Akeara ndenden: 'Akob ekuru nkama.' Nda wur ewo ndenden: 'Vey onkeana oyie, fugn akob ekuru oniani.' ⁸ Nkum atubikinde djwi na wur otshia epwo enagn, n'oshin eyopiikiwo ilag. Djwi aman a eshu e lwo ene wamapeaka ilag entsign djwi n'iwur iwo, apa wali diaka aman a mwinda ve. ⁹ Kansi me, mokabagni, iwur ti otsun opwo, djwi ntangu eyakwon gnu, wo, ayoyamagni wo n'evuru e santu e mvwe na mvwe. ¹⁰ Yug wur ali wuo ne vim a kieg, asiyiande mpi wuo ne vim a nen, yug wur ali epwo ne vim a kieg, asiyiande mpi epwo ne vim a nen. ¹¹ Yug okayia wuo n'otsun opwo, nagn esopea otsun o wuo? ¹² Yug oayia wur e wuo ne vim a otwung, nagn esopea vim a yie yemie? ¹³ Kaku wur otshia emog esikug ayii na ankum ape ve. Djwi asisan nde emog, aleang emuu; asikama nde ti emog, asatun emuu. Opikug ngyagni vear otshia e Nzeam ti ekri ve." ¹⁴ Wafarize eyiike omvuy, ayugukiwo inkum inagn, mby s'oyuikiwo nde two. ¹⁵ Mby s'atubinde nda wo ndenden: "Gnu, aleang gnu ko vear woyenagni wuo, kansi Nzeam ajia itura ignu. Djwi vim eli ngivean dzug ne kati e vear eli masumu ne nteang e Nzeam. ¹⁶ Nsiku i Moize ti along a wangunsaayiikiwo tii ko ntangu eyinkum Yoane. Yim ko neti, ekub e Nzeam walelong, kansi wur na wur akii ko biu djwi ashwi neti. ¹⁷ Olung na buu ayaleg wo, kansi ayayiawo mpay djwi n'imon i vim i kieg emifugn wo n'onkeana e nsiku na ndog. ¹⁸ Wur eyalima wear nde n'ivea, yug atitsa nkea ntsug wear emuu, atikie itaay. Wur esitsug okear emikma wo n'ivea, atikie mpi itaay. ¹⁹ Ayiwo na nkea otsun omog, alwerikinde ko ileama i wuo, i kwi-kwi konso eshu eyiikinde n'osiang ne luzingu ende. ²⁰ Nkea omva emog, dzin inde Lazari, avurikinde ko ne nteang epfug e vuru e wur enagn, djuung inde imijuo na wampura, ²¹ alikinde mfuya i vim ayilogike ne mesa eyilike nkea otsun enagn. Ata wamva ayikiwo ndier wampura inde ne djuung. ²² Nkea omva awa, banzio wovara, watsa onky n'ipeo Abrama. Nkea otsun mpi awa, wopfugn. ²³ Ne wiya e wabafwa, nkea otsun ajir viy dzug, nde kog atikum n'ondii o mpay, ayen etey, Lazari n'ipeo Abrama. ²⁴ Adzama: 'Tea Abrama, ongyug ngy, tum Lazari atub ko epign ende ne vay antwomi iluy i vay, djwi elim eme etiyum, tshiya etilega biu, ndi ne mpay.' ²⁵ Kansi Abrama okeara: 'Mon me, tokea nkana otsun oyiviiy yie ne epier eyie, Lazari mpi n'epier ende ayikinde ne mpay, opeane ndean ali n'osiang, yie olayen mpay. ²⁶ Jia yiyen mpib eninen eli ne kati esu ti gnu, vear aling waye etay e su, ata aling ngya etay e gnu, wapakug ve.' ²⁷ Nkea otsun atuba ndenden: 'Ndawigna ya yie tea Abrama, tum Lazari n'opeang o tea me , djwi ndi na atwung ampeam atean. ²⁸ Djwi nde, akabi vii ane wuo-wuo, wakayia n'ondii o mpay ene.' ²⁹ Abrama akeara ndenden: 'Moize ti wangunsa wali mpiog, wayug along a wo.' ³⁰ Nde, akeara ndenden: 'Tea Abrama, epa oshin onagn ve. Djwi yug ko wamiyen wur emiwa atikea ntsa etay e wo, asitshima wo itura.' ³¹ Kansi Abrama okaba ndenden: 'Yug wakaleang ngyug Moize ti wangunsa ve, ata wur emiwa amikea mbiy n'ewa, wapatshima itura iwo ve.' "