¹ Jidi, nsadi e Yezu Kristu, otwung o Jaki, ya vear ali Tea Nzeam amaleang entsign, mpi emiwum wo djwi na Yezu-Kristu. ² Ngy, ngema ti ngaagn eyii entsign ya gnu. ³ Otwung o ngaagn, aligikime n'omfugnagni djwi n'evug e vear ankum. Akug wo mofugnagni djwi molongagni na ndwa mbeagn i kieleka djwi na lukwikilu eyisapeawo ya wasantu otshwag ntshie. ⁴ Djwi ne kati egnu, vear amuu wamishwe, wamabag ewuu bana ntama, vear a mbin waletshimi ngrasia e Nzeam ekum vii apwo, waletun njir Nkum esu emog ti Long, Yezu-Kristu. ⁵ Opean, ndi na mfunu onkanagni, ya gnu vear ajia vii ane wuo, gnugnun Nkum, ne mby e mvuga vear mpi emalima nde ne buu e Ejipiti, adjag nde vear akwon lukwikilu. ⁶ Mpi banzio ikawum endii ikub iwo ve, kansi Nzeam amatshung eshing otshwag ne mpib, amawum djwi n'ewu eshuu e nsuka. ⁷ Eli kamsi Sodomo nda Gomoro ti viya enen ili mbeama na wo, eyikike kamsi wo k'otshia o kinduma mpi eyidjiki vii ipwo. Via anagn amikum mbanu eninen djwi na vear ayen mpay i ndola i tshiya e mwe na mvwe. ⁸ Oshin omog, vear oyang anagn walepiy djuung iwo na wandoy ipwo, watuma ekub mpi walatwe nkembo. ⁹ Ata Arkanzi Mikayel tangu elwikinde nda ontshung ti eyishinde nda nde djwi na djuung i Moize, akotwe ve, kansi atubinde ngean: ''Sianga Nkum ndemie ongniangi !". ¹⁰ Kansi vear anagn waletwi vim apijiawo, walekii vim ajiawo kamsi vear a biu. ¹¹ Mpay ya wo! Djwi watidjie mbug eyi Kayino mpi wamilog n'ipwo eyiki Balam, djwi la mpuy ekri. Awiwo ntangu ntangu eyidjiiwo vii apwo a Kore. ¹² Eli ipwo ilepiy okina ognu. Wakie akagn wapiyug ata nsogn ve, wala, wagnwa, wala ko djwi na nshira mpuy i djung. Wali mafuba imikwon vay, mpi elevari opepe etay enkum. Wali eshung e ntangu owaa ekwon ngwur atub, emiwa mpi emisumawo mbala ipe. ¹³ Opepe e biu etsankir nzey eninen, mpe etsampur efuu, oshin omog vear anagn atsawo mpur wemie vii awo a nsogn. Wali kamsi weer imiyungana mpe emisawo shugn ne mpib e mvwe na mvwe. ¹⁴ Enoki, eyi wur ishambia l'okwo yum Adamu, abikulinde ngean djwi na wo: " Lir Nkum atiyia na wasantu inde awugu na awugu. ¹⁵ Aleye djwi na mbag ewu e vear ankum. Aleye djwi na mpum ewu e vear ankum apwo djwi na vii apwo ayikiwo n'oshin opwo, mpi djwi na itubatuba inkum eyitubi empaagn djwi na nde." ¹⁶ Wali vear atsagnie igniegnie mpi alebokuti djwi na luzingu ewo, mpi waledji mpuy ipwo. Wali vear omwong,walepur otuba opwo n'odzum owo, waledjii vear vear amu ko djwi na nding iwuo iyim ya wo. ¹⁷ Kansi gnu, atwung a ngaagn, kanagni otuba oyilong wantumwa i Nkum esu Yezu Kristu ne ntshuu imileg. Okabagniwo ngean: ¹⁸ "Ne ntangu e nsuka ayayiawo na vear ayoywagni two mpi ayasadjie ko mpuy iwo i djung." ¹⁹ Avear anagn walenami vear. Wali vear a buu, mpi kakuwo na Mpeve. ²⁰ Kansi gnu, atwung a ngaagn, twungagni gnemie lukwikilu e santu , mpi samagni na Mpeve-Santu. ²¹ Pieragni neti e ngaagn e Nzeam mpi kwungagni ngy e Yezu Kristu, Nkum esu elojiagni luzingu e mvwe na mvwe. ²² Yiagni vear a ndolula etay vear atsug esiy. ²³ Vugagni avear amuu n'oshin esapurgnu ne tshiya. Etay e vear amuu, yiagni na ndolula ti wom. Tunagni ata ileam imita mbin djwi na masumu i mpuy i djung. ²⁴ Ntangu opean, na nde wur ekug n'ongwumagni na nkwon ndog, mpi na nde wur ekug n'omvaragni wuo na kiese ne nteang elung ende e nkembo eninen, ²⁵ ya nde ndemie Nzeam eli Ngulusi esu, ne dzin i Yezu Kristu, Nkum esu, nkembo, onen, ekub ti biu eyi ya nde, lii, lwo ene, ti mvwe na mvwe. Amen.