¹ Ne mby ewo, Yezu atsampwe etay e walongoki, n'ikri i nzey e Tiberiade. Yenagni oshin oyapwinde. ² Simoni Petelo, Toma eviewo Didime, Natanael e wiya e Kana ne Galilea, mon e Zebede, ti walongoki ipe imuu i Yezu, ayiiwo wankum ondii omog. ³ Simoni Petelo nda wo ndenden: "Ndetsu ndob nse. Watuba wa nde wuwun: "Siletsu ti yie." Wapwe, wakwuna ne war. Kansi wakavea ata vim ve otshuu onagn enkum. ⁴ Emikeam vuna, Yezu ayima ne nky, kansi walongoki wakajia ve wuwun enagn eli Yezu. ⁵ Yezu atuba nda wo ndenden: "Aman ame, kaku gnu na vim enda ve?" Wokeara wuwun: "Kaku." ⁶ Atuba nda wo ndenden: "Twomagni oshing nikri i war, etay e wum ewuo, asiyen gnu." Watwomo mpi, wakakug nkea mbin oshing ve, djwi oluy o nse itita neti. ⁷ Mby longoki eyiileangike Yezu akaba Petelo ndenden: "Ene eli Nkum! Mby ntangu emiyug Simoni Petelo ndenden eli nkum, alwer eleam ende ti okaba n'ikini inde, s'alog nde ne vay, djwi akayia n'eleam ne djuung ve. ⁸ Walongoki imuu inagn wayia na war, s'abinikiwo oshing ewo etiyuo na nse, djwi wakayia etey na nky ve, ata wa metele nkama. ⁹ Ntangu emisab wo ne nky, wayen watipiey akea a tshiya, wafum ntse ti mampa. ¹⁰ Yezu atuba nda wo ndenden: "Yagagni na ntse imidjag gnu nendien. ¹¹ Simoni Petelo akwuna ne war, abin oshing owo, neti ayiiwo na ntse inen-inen nkama emog n'otean n'isar (153). Ata ntse ayiiwo entsign, kansi oshing okayay ve. ¹² Yezu atuba nda wo ndenden: "Yag olagni." Kaku ata longoki emog ve eyoyui ndenden: "Yie nagn?" Djwi watijia wuwun eli Nkum. ¹³ Yezu ayia, abag mampa, apea wur na wur, apea ti ntse. ¹⁴ Enagn ayiiwo mbala isar emipwe Yezu ne nteang e walongoki onde yim ko emikeande mbiy ne kati e bafwa. ¹⁵ Emishir wo nda, Yezu atuba nda Simoni Petelo ndenden: "Simoni mon e Yonasi, antsa yie ndeang oshin olenga amuu ane?" Okeara ndenden: "Ee, Nkum, ojia yiyen atsame ondeang." Yezu atuba ndenden: "Liy ameme ame!" ¹⁶ Akea onjue mbala ozole: "Simoni mon e Yonasi, antsa yie ndeang oshin olenga amuu ane?" Petelo okeara ndenden: "Ee, Nkum, ojia yiyen atsame ondeang." Yezu okaba ndenden: "Liy ameme ame!" ¹⁷ Okea njue mbala isar: "Simoni, mon e Yonasi, antsa yie ndeang yie?" Petelo akum ko ngy-ngy djwi atoyue mbala isar: "Antsa yie ndeang?" mby nde atokeara ndende: "Nkum, ojia vii ankum, ojia yiyen atsame ondeang." Yezu atuba nda nde ndenden: "Liy ameme ame!" ¹⁸ Vi-a-vii, vi-a-vii, mokaba, ayiikiyie imon ilieng, alwerikiyie okaba n'ikini yemie, aletshikiyie etay enkum eleang yie, kansi ntangu eyakum yie ongnuign, ayashima yie mbwo iyie, mby wur emuu ayolweraka nde okaba n'ikini, ayovaraka nde etay epileang yie." ¹⁹ Atubikinde vii anagn djwi na nkab ashin onkagn eyawa Petelo djwi na mpea Nzeam lokumu. Emishir nde ntuba vii anagn, s'atubinde nda Petelo: "Onsandjii me." ²⁰ Emikea ntshim Petelo, ayen longoki eyiileangike Yezu ndean aleseye, longoki eyiilogi ote n'ebimi e Yezu ntangu eyiilikiwo epiyekwo, ndug eyoyui ndenden: "Nkum, wur ewo esosar eli nagn?" ²¹ Ntangu emoyen nde, Petelo atuba nda Yezu ndenden: "Nkum, mby nde ene, nge eyayia ya nde?" ²² Yezu okeara ndenden: "Yug mileang memen asatsuga tii ko eshuu eyakeame, ilolir yie? Yie, onsandjii me." ²³ N'otuba onagn, esiang epagn ne kati e atwung wuwun longoki enagnapaya teana ewa. Kansi Yezu akatuba nda Petelo ndenden apayawa ve, kansi: "Yug mileang memen asatsuga tii ko eyakeame, ilolir yie?" ²⁴ Eli ndug longoki enagn wur elekab ntiegn i vii anagn, ndug wur emifugn wog. Sijia susun ntiegn ende eli masonga. ²⁵ Yezu akiinde vii amuu entsign, yug ko wafugn emog-emog, mpibansi ve memen buu anakug wo na ngwum enkean enafugn wo enagn.