¹ Mby, eshuu e nteang, e mposo eyiibani, ne suka-suka, Maria e Magdala atsa n'aluma, ivim i mpib ileko, ayen watilima itari ininen iyidzub wo ne nkr. ² Akim etay e Simoni, ti etay e longoki emuu eyiileangike Yezu, akaba ndenden: "Watilima djung i Nkum Yezu n'aluma, sipijia ondii emotsug wo ve." ³ Mby Petelo nda longoki emuu enagns'apwiwo, watsa n'aluma. ⁴ Wankeape alekimikiwo aveang, kansi longoki emuu enagn alenga petelo n'iveang, akum wur eteang n'aluma. ⁵ Emibaba nde, ayen ko ileam ne buu, kansi akashwe neti ve. ⁶ Simoni Petelo emisakum nde, ashwe neti e nkr, asayen ko ileam ne buu ⁷ ti ileam iyiitsug wo ne ngie ote ende ondii omuu, kansi ekayia ondii omog ti ileam iyodjing wo ne djung ve. ⁸ Mby longoki emuu eyiikum nteang enagn ashwe mpi ne nkr, ntangu emiyen nde, s'adjir nde. ⁹ Djwi wakajiaka ve, n'oshin oyiifugn wo n'enkean, Yezu ayiiwo afwete nkea mbiy ne kati e wabafwa. ¹⁰ Mby walongoki ipe inagns'akey wo nkien etay ewo. ¹¹ Kansi Maria asandeyima nelien, mbeama na nkr, asaliye. Ntangu eliyende, ababa djwi na ndir neti e nkr, ¹² ayen banzio ipe n'ileam i siy-siy, watigneme n'ondii oyitsug wo djuung i Yezu, emog etay ote, emuu etay e nkuu. ¹³ Woyue wuwun: "Onkear one, nge eliye yie?" Akeara ndenden: "Ndaliye djwi watilima Nkum eme, mpijia ondii emotsug wo ve." ¹⁴ Ntangu etuba nde, akea ntshim, ayen Yezu ndan atiyima, kansi akajia ve ndenden ene eli Yezu. ¹⁵ Yezu atuba nda nde ndenden: "Onkear one, nge eliye yie? Oling nagn? Nde kog abansa ndenden ene eli wur etsandir ondii one, okeara ndenden: "Nkum, yug eli yie wur emolima, onkabi ondii emotsug yie, mokey omvey." ¹⁶ Yezu atuba nda nde ndenden: "Maria! Nde mpi akea ntshim, mby atuba nda nde n'otuba e waYuda ndenden: "Rabbouni!" Etuba "Long!" ¹⁷ Yezu atuba nda nde: "Oyankir ve, djwi ntovean etay e Tea me ve. Kansi tshwag oyen atwung ame, kaba wo yiyen ndekey mvean etay e Tea me ti Tea gnu, Nzeam eme ti Nzeam egnu." ¹⁸ Maria e Magdala s'atshinde nkaba walongoki ndenden atiyen Nkum, ndug wur emokaba vii anagn. ¹⁹ Eshuu ewo enagn, epiyekwo, ayiiwo eshuu e nteang e mposo enagn, ondii eyiike walongoki, ipfug ingam, ayiiwo ngitshung djwi na womo e waYuda, Yezu ndean ayia, apwe ne ngnina ewo, nda wo ndenden: "Ngemba eyii ya gnu!" ²⁰ Ntangu emishir nde ntuba, ayegne mbwo inde ti epaagn ende. Walongoki ayiiwo n'osiang entsign emiyen wo Nkum. ²¹ Yezu akea ntuba nda wo: "Ngemba eyii ya gnu!Oshin oyiintum Tea, me ko ndotumagni. ²² Ne mby e otuba onagn, afebe opepe ne djuung iwo, ndenden: "Veyagni mpeve-Santu. ²³ Vear ayalima gnu ipwo iwo, ipwo iwo mpi ayalim wo; vear ayatun gnu na ndima ipwo iwo, ipayalim mpi ve." ²⁴ Toma eviewo Didime, longoki emuu eyii ne kati e vear djum n'ipe, akayia kog ve ntangu emipwe Yezu. ²⁵ Walongoki imuu inagn wokaba wuwun: "Sitiyen Nkum." Atuba nda wo ndenden: "Yug nkayen ndubu i nsonso ne mbwo inde ve, yug nkatsug ikagn ime ewuo n'epaagn ende ve, mpadjir ve." ²⁶ Ne mby e nshuu iniani, walongoki inde wakea nsanga neti evuru, Toma ayiinde nda wo.Yezu ayia, ipfug ayiiwo ngitshung, apwe ne ngnina ewo, ndenden: "Ngemba eyii ya gnu!" ²⁷ Mby atuba nda Toma ndenden: "Yag, tsug epign eyie, lir mbwo ime; vanga, tsug ikaagn ewuo eyie n'epaagn eme! Oyayia n'etura ntsug ve, kansi djir." ²⁸ Toma okeara ndenden: "Nkum, eme, Nzeam eme! ²⁹ Yezu okaba ndenden: "Djwi otiyen mby s'amidjir yie. Osiang ya vear amidjir ata wakayen ve." ³⁰ Ne viy a walongoki inde, Yezu akiinde bidimu entsign, etofugn wo n'onkean ene. ³¹ Kansi vii ane, afugn wo djwi odjiragni gnugnun Yezu ali Kristu, Mon e Nzeam, mby ntangu esidjir gnu, oyiagni na luzingu ne dzin inde.