¹ Mby Pilato s'avey nde Yezu, wober fimu. ² Ayer-nkuu watwung impu atiene, s'alwer wo Yezu n'ote, wolwer ti olobo e kwi. ³ wayia mbeama na nde, wuwun: "Mbea eyie, vuy e waYUda!" Mby s'onangikiwo mbata. ⁴ Pilato akeampwe, atuba nda wo ndenden: "Yenagni, ndopuragni wur ene nelien, djwi ojiagni gnugnun kaku ata ipwo imiyen me ya nde ve." ⁵ Yezu s'apwinde, ti impu atiene n'ote ende, ti olobo e kwi ne djuung. Pilato nda wo ndenden: "Yenagni wur egnu!" ⁶ Ntangu emoyen ankum a wanganga-Nzambi ti wasentre, wadzama wuwun: "Kwog nde ne kulunsi! Kwog nde ne kulunsi!" Pilato atuba nda wo ndenden: "Veyagni nde gnemie, okwogagni ne kulunsi, djwi me, mpiyen ata ipwo imog ya nde ve." ⁷ WaYuda wokeara wuwun: "Sili na nsiku emog, oshin otuba nsiku ewo, ekug wuo awe, djwi atituba ndenden ali Mon e nzeam n'oshin onde." ⁸ Ntangu emiyug Pilato otuba onagn, alega ngyug womo. ⁹ Akea neti opeang, ayue Yezu ndenden: "oyim nonkagn?" Kansi Yezu akokeara ata djwi ve. ¹⁰ Mby Pilato atuba nda wo ndenden: "Djwi na nge epinkeari yie otuba? Opijia ve yiyen ndi n'ekub esituba me wokwog ne kulunsi, ndi mpi n'ekub e ntuba mopur okien?" ¹¹ Yezu okeara ndenden: "Kaku ekub esivea yie ne dzug ime ve, yug ekub ewo wakopea yim dzug ve. Wog enagn, wur eminjie etay eyie atikie disumu eninen." ¹² Ne ntangu enagn, Pilato alingikinde oshin nge esipur nde Yezu. Kansi waYuda wadzama na biu, wuwun: "Yug omopur, opa ali ewur e Sezare ve. Wur enkum esikum vuy n'oshin onde ndemie, enagn atun Sezare." ¹³ Pilato emiyug nde otuba onagn, s'apur nde Yezu nelien opeang, agneme n'ondii eviewo "Pave", n'otuba e waYuda eli "Gabata", djwi na mpuum ewu e Yezu ne tuminar. ¹⁴ Ayiiwo eshuu ewong wo okina o Pake, ayiiwo ne ntangu djum n'ipe. Pilato atuba nda waYuda ndenden: "Yenagni vuy egnu ndean!" ¹⁵ kansi wo, watsug elie wuwun: "Awe! Awe! Kwog nde ne kulunsi!" Pilato atuba nda wo ndenden: "Nkwog vuy egnu ne kulunsi?" Ankum a wanganga-Nzambi wuwun: "Vuy elisu sa nde eli ko Sezare." ¹⁶ Mby s'apiinde Yezu djwi wokwog ne kulunsi. Wavey Yezu, s'aletshikiwo ti nde. ¹⁷ Yezu alevari kulunsi ende, akum n'ondii eviewo "Ebaay ote", n'otuba e waYuda eli "Golgotha". ¹⁸ S'okwog wo ne kulunsi n'ondii onagn, ti vear ape amuu, egni wog, egni wog, mby Yezu ne ngnina. ¹⁹ Pilato afugn vii amuu, atsug ne dzug i kulunsi, wafugn oshin one: "YEZU E NAZARETE, VUY E WAYUDA". ²⁰ WaYuda entsign atangikiwo vii anagn, djwi ondii oyikwog wo Yezu ne kulunsi ayiiwo mbeama na oluu o wiya, afugn wo n'otuba e waYuda, ti otuba e Latin, ti otuba e waGreki. ²¹ Ankum a wanganga-Nzambi eyiike waYuda watuba wa Pilato wuwun: "Oyafugn yiyen: Vuy e waYuda ve. kansi fugn yiyen: 'Atubinde ndenden: Ndi vuy e waYuda.' " ²² Pilato akeara ndenden: "Vim emifugn me, eli ko emifugn me." ²³ Ayer-nkuu ntangu emishir wo nkwog yezu ne kulunsi, wavey ileam inde, wakab akab anign, iyer-nkuu imog-imog aey ikab. Wavey ti olobo onde, ekayia ata n'otiye, yim ko dzug tii ngie ko eleam emog. ²⁴ Mby watuba wog na wog wuwun: "Sipayara eleam ene ve, kansi sibug dzeke, silir nagn esivea." Vii anagn ayiiwo djwi otuba eyiifugn wo n'enkean ekug: "Watikie ileam ime akab-akab, watibug dzeke djwi n'olobo ome." Enagn wog vii ayiiki ayer-nkuu. ²⁵ Mbeama na kulunsi e Yezu, mea nde atiyima ti otwung o mea nde onkear, Maria e wear e Klopasi, ti maria e Magdala mpi ayiinde kog. ²⁶ Yezu, ntangu emiyen nde mea nde, ti longoki eyiileangikinde mbeama na mea nde, atuba nda mea nde ndenden: "Mea, yen mon yie ndean." ²⁷ Mby atuba nda longoki enagn: "Longoki, yen mea yie ndean." Ko ne ntangu enagn, longoki enagn avey mea, atsa nda nde n'opeang onde. ²⁹ Ayiiwo kog ti ilongo imog itiyuo to na vay a ongnign. Ayer-nkuu watwomo (eponge) neti, waler n'oshung, watsug mbeama n'odzum onde. ³⁰ Ntangu emiyug yezu eli ongnign, atuba ndenden: "Vii ankum atikug." Mby akeya ote, s'awinde. ³¹ mby waYuda, djwi ayiiwo eshuu ewong wo okina, na womo e djuung i vear anagn epikug nsatsuga ne wakulunsi ve tii ko eshuu e sabat, djwi ayiiwo eshuu eninen, s'awigniwo ya Pilato djwi watsi mogo nkuu i vear amikwog wo ne kulunsi, walimi djuung iwo. ³² Ayer-nkuu s'ayiiwo, wamogo nkuu i wur enteang, mby nkuu i wur ozole. ³³ Emikum wo ondii oli Yezu, wayen atiwa, wakafimogo nkuu inde ve. ³⁴ Kansi iyer-nkuu emog otwuna ko epaagn n'ikwong, etean kaku aluung ti vay s'apwi wo. ³⁵ Wur eyoyen s'akab nde vii anagn, ntiegn ende ko eli e masonga, ajia ndenden atuba masonga djwi gnu okwikilagni. ³⁶ Vii anagn ayiiwo djwi ekug oshin oyiifugn wo n'enkean: "Kaku ata wuyu ende eyamog ve." ³⁷ N'ondii omuu wamifugn wuwun: "Ayayen wo wur eyiitog wo ikwong." ³⁸ Ne mby ewo, Yozefo e Arimate eyiike longoki e Yezu n'oziy djwi na womo e waYuda, awigna mbug ya Pilato na ndima djuung i Yezu. Pilato apea Yozefo mbug, s'ayiinde mvey djuung inde. ³⁹ Nikodemi eyiitshike etay e Yezu otshuu-otshuu, ayia ko, ajie ananagn a nsuu emikiewo na myrra ti aloes, odzuru owo ayiiwo e litele nkama emog. ⁴⁰ Wankeape s'avey wo djung i Yezu, wadjing eleam e siy, wamwang ananagn a nsuu oshin otsankie waYuda yug wapfugn asaga. ⁴¹ Ayiiwo n'opeang emuu n'ondii oyiikwog wo Yezu ne kulunsi, n'ondii owo, ayiiwo n'aluma ampa, watopfugn ata wur emog nteang ve. ⁴² Djwi ayiiwo eshuu e wong wo okina e waYUda, mpi djwi aluma awo ayiiwo mbeama na wiya, mby s'apfugn wo Yezu neti.