¹ Ntangu emishir nde ntuba vii anagn, Yezu atsa nda walongoki inde ne nky e vay a Sedron, mpiog, ayiwo n'opeang emog, mby s'ashwinde neti ti walongoki inde. ² Yudasi efwete nsar Yezu, ajiikinde ondii onagn, djwi nde, atshikinde nsanga nda wo mbala entsign neti. ³ Mby Yudasi s'ashwinde neti, avara ayer-nkuu a wanganga-Nzambi ti wafarize, wayia na wamwinda, n'ising i tshiya, ti eta. ⁴ Yezu ajiikinde vii ankum asileg djwi na nde, atsa nteang ewo, nda wo ndenden: "Olingagni nagn?" ⁵ Wokeara wuwun: "Yezu e Nazarete." Yezu akeara ndenden: "Eli mug." Yudasi wur emosar ayiinde kog nda ayer-nkuu anagn. ⁶ Ntangu emakaba Yezu nenden: "Eli mug", wakea mby, walog ne buu. ⁷ Akea njue mbala emuu iky: "Olingagni nagn?" Wakeara wuwun: "Yezu e Nazarete." ⁸ Yezu akeara ndenden: "Si ntokabagni memen eli mug. Yug eli mug eleling gnu, siangagni vear ane wakien." ⁹ Atubinde oshin onagn djwi djwi otuba oyitubinde ekug: "Kaku wur emitsa ntu vene vear ayiimpi yie." ¹⁰ Simoni Petelo wur eyii n'ompien e vur epe, anangwur otshia e nkum e wanganga-Nzambi, s'obag nde itii i wog e wum. Dzin i wur otshia enagn Malkus. ¹¹ Yezu atuba nda Petelo ndenden: "Keara ompien oyie e vur epe n'ibenge iwo. Me, nkwon gnua ikob i mpay imimpea tea?" ¹² Mby, ayer-nkuu ankum, ti ankum awo, ti wasentre i waYuda s'atshung wo Yezu, wotshung nkori. ¹³ Wotovara nteang etay e Anna, djwi ayiinde okiu e Kaifa, eyii nkum e wanganga-Nzambi ne mvwe enagn. ¹⁴ Kaifa eli wur eyiipi ilong ya waYuda ndenden ekug wuo wur emog awe djwi na vear ankum. ¹⁵ Simoni Petelo ti walongoki imuu, alesedjiikiwo Yezu. Nkum e wanganga-Nzambi ajiikinde longoki enagn. Ashwe nda Yezu neti opeang e nkum e wanganga-Nzambi; ¹⁶ mby Petelo asatsuga nelien, mbeama n'itunu opeang. Longoki emuu eyiijikiwo etay e wanganga-Nzambi enagn apwe, atuba nda onkear eyiikwungike n'itunu opeang, mby Petelo s'ashwinde. ¹⁷ Mby onkear owo s'atubinde nda Petelo ndenden: "Yie, epa oli longoki emuu e wur ene?" Akeara ndenden: "Apa ndi longoki ende ve." ¹⁸ Vear otshia ti wasentre iyiike kog apiey wo ekb e tshiya eyiyorikiwo, djwi na mpio. Petelo ayorikinde tshiya nda wo. ¹⁹ Nkum e wanganga-Nzambi ayuikinde Yezu djwi na walongoki inde mpi djwi n'along ande. ²⁰ Yezu akeara ndenden: "Me, nkaziy ve, atubikime ya vear a buu ene, alongikime ne wasinagoga, ondii otsa nsama waYuda. ²¹ Djwi na nge enjwe yie? Ywe vear ayiingyug me vii nge eyakabi me. Wog anagn wajia vii ayakabime." ²² N'otuba onagn, iyer-nkuu emog anangYezu mbata, ndenden: "Ene wog oshin okeara yie ya nkum e wanganga-Nzambi?" ²³ Yezu atuba nda nde ndenden: "Yug ntituba epwo, onkabike epwo ewo emituba me; yug ntituba wuo, djwi na nge eminang yie mbata?" ²⁴ Ko oshin eyotshung wo nkori, Annaotum etay e Kaifa, nkum e wanganga-Nzambi. ²⁵ Simoni petelo ayiinde kog, ayor ko tshiya. Wa nde wuwun: "Yie ko okayiaka longoki ende emuu?" Asan, ndenden: "Epa ndi longoki ende ve." ²⁶ Wur otshia emuu e nkum e wanganga-Nzambi, otwung o wur emibag Petelo itii, atuba ndenden: "Nkoyen yie ya nde neti opeang egni mpign?" ²⁷ Petelo akea nsan. Etean kaku, nkogo avug. ²⁸ Wavara Yezu yim etay e Kaifa, wotum n'opeang e nkum e mbumater ne suka-suka. Wo wemie wakashwe ve, djwi wakavey mbin djwi asilawo n'okina o Pake. ²⁹ Pilato s'apwinde, atsa ondii oli wo, ndenden: "Ofugnagni wur ene na djwi nge?" ³⁰ Wokeara wuwun: "Yug akwon ngya wur epwo, sipinayia ti nde etay eyie ve." ³¹ Wog eyiitubi Pilato ndenden: "Veyagni nde, bagagni vii ande oshin otuba onkwon ognu. WaYuda wa nde wuwun: "Ne nsiku isu, epileang ve sidjag wur." ³² Enagn ayiiwo djwi vii ayitubi Yezu ekug, eyiikab nde n'oshin ewa esiwa nde. ³³ Pilato akea neti opeang, avie Yezu mby oyue: "Oli vuy e waYUda?" ³⁴ Yezu okeara ndenden: "Enagn yemie wur eyue, go otiyug ya vear amuu watuba djwi na me?" ³⁵ Pilato okeara ndenden: "Me, ndi Yuda? Epa ndi Yuda ve. Vear a buu egnu ti ankum a wanganga-Nzambi watojie etay eme. Djwi nge emikie yie?" ³⁶ Yezu okeara ndendn: "Ekub eme epa eli ne buu ene ve. Yug ekub eme etoyia e buu ene, vear ame otshia analwa wo djwi na me, djwi wankwon mpea me ne mbwo i waYuda. Kansi ekub eme epa eli ne buu ene ve." ³⁷ Pilato atuba nda nde: "Oli vuy?" Yezu okeara: "Otituba, ndi vuy. Angwur wo, ayiime ne buu ene djwi na nkab ntiegn i masonga. Wur enkum eli ne masonga asiyug nde otuba ome." ³⁸ Pilato nda nde ndenden: "Vim nge eli masonga?" Emituba nde oshin onagn, apwe nelien, akea ntsa etay e waYuda, nda wo ndenden: "Mpiyen ata ipwo imog ya nde ve. ³⁹ Kansi, oshin omiziga gnu, n'okina enkum e Pake, atsame ompuragni wur emog ne bolog, oleangagni mopuragni vuy e waYuda?" ⁴⁰ Wankum wakea ndzama wuwun: "Kaku, epa nde, pur Barabasi." Barabasi enagn ayiinde nkea wumu.