¹ Emishir nde ntuba vii anagn, Yezu asiang viy dzug, ndenden: "Tea, ntangu etikug! Pea mon yie nkembo, mby mon yie mpi opii yie nkembo, ² oshin eyopii yie ekub ne dzug i wur enkum, djwi apii evug e mvwe na mvwe ya vear ankum ayopii yie. ³ Djwi evug e mvwe na mvwe, eli wojii yie, Nzeam emog e masonga, ti wur eyiitum yie, Yezu Kristu. ⁴ Mopea yie nkembo eyie ne buu, mishira otshia eyiimpiyie na nkie. ⁵ Ntangu ene, yie Tea, ompii nkembo eme mbeama na yie yemie, nkembo eyiikime na wo nteang, ne nteang e nkie buu. ⁶ Mikaba vear ayiimpi yie wajii dzin iyie ne kati e buu ene. Ayiikiwo ya yie mby s'ampii yie wo; wamiwum otuba oyie. ⁷ Opeane, wean wamojia wuwun vim ankum ayiimpi yei eyim ya yie. ⁸ Djwi, mapea otuba oyiimpi yie, wamovey otuba owo, wamijia wuo-wuo wuwun ngyim etay e yie, wamidjir mpi wuwun yog wur eyiintum. ⁹ Esama me ene, eli djwi na wo. Epa nsama djwi na vear a buu ve, kansi djwi an vear ayiimpi yie, djwi wali vear ayie. ¹⁰ Enkum eli me na wo, eli ya yie; enkum eli ya yie, eli ya me. Ntivey lokumu eme ya wo. ¹¹ Apa ndi diaka ne buu ene ve, wo, wali ne buu, me, ndetsu etay eyie. Tea e Santu, wum wo ne dzin iyie eyiimpi yie, djwi ayii ko emog kamsi su. ¹² Ntangu eyiikime ma wo ne buu, awumikime ne dzin iyie. miwum vear ayiimpi yie, kaku ata emog emitsa ntu ve, obu ko mon emijing mbug, djwi vii ayifung wo n'enkeana ekug. ¹³ Opeane, mean ndetsu etay eli yie; ntuba vii anagn ne buu djwi osiang ome ekug ya wo. ¹⁴ Mapea otuba oyie, kansi vear a buu watatun, djwi epa wali vear a buu ene ve. Kamsi me mpi, epa ndi wur e buu ene ve. ¹⁵ Epa nding ya yie djwi alimi ne buu ene ve, kansi djwi na ngwum wo ne nteang e wur epwo. ¹⁶ Epa wali vear a buu ene ve, kamsi me mpi, epa ndi wur e buu ene ve. ¹⁷ Vey wo wankum vear a yie ne masonga, djwi otuba oyie eli masonga. ¹⁸ Ko oshin oyintum yie ne buu, me mpi, ntatum ne buu. ¹⁹ Ntipea djuung ime ya yie djwi na wo, djwi wo mpi wayii wa yie ne masonga. ²⁰ Epa nding ko djwi na wo ve, kansi ti vear ayadjir ya me ne otuba owo, ²¹ djwi wankum wayii emog, kamsi yie Tea, oli ya me, kamsi me, eli me ti yie, djwi wo mpi, wayii emog ti su, djwi buu wajii wuwun yog wur eyiintum. ²² Ntapea lokumu eyiimpi yie, djwi wayii emog, kamsi su, sili emog; ²³ me ne kati ewo, yie ne kati eme, djwi wayii ko emog, mby vear a buu wajii wuwun yog wur eyiintum, yie olaleang wo kamsi eyiindeang yie me. ²⁴ Tea, ndeang wuo ondii oli me, vear ayiimpi yie ko wayii ti me, djwi wayen nkembo eme, nkembo eyiimpi yie, djwi omindeang me nteang na ntokie buu. ²⁵ Tea e masonga, vear a buu wakojia yie ve, kansi me, ojiime yieti vear ane wamijia wuwun yog wur eyiintum. ²⁶ Ntakaba wajii dzin iyie, ayakaba me djwi djwi ngaagn eyii yie na wo ya me eyii mpi ya wo, me mpi asiyiame ma wo."