¹ Ntokabagni vii ane djwi ekafiyia ibag djwi gnu okalogagni. ² Ayokmagni wo ne wasinagoga, ntangu wean eleye, eyayia wur enkum eyodjagakagni ayabansa nde alakie vii a wuo ne nteang e Nzeam. ³ Ayakiewo vii anagn djwi watojii ata Tea, ata me ve. ⁴ Ntokabagni vii ane djwi ntangu eyakug wo, okey nkanagni gnugnun ene eli vii ayokabagni me. Nkaleang n'onkabagni n'itsin ve, djwi ayiwo ndi ma gnu. ⁵ Opeane, mean ndekey ntsa etay e wur eyintum, yagnu kaku wur emog eminjeue ndenden: 'Oletsu nonkagn?' ⁶ Kansi, djwi ntokabagni vii ane, itura ignu itiyuo na ngy. ⁷ Mokabagni e masonga, djwi na gnu, ekug wuo nkien, djwi yug nkakien ve, wur esoshungagni enagn apayia mpi etay egnu ve; kansi yug mikien, ayotum me nde etay egnu. ⁸ Mby, ntangu eyayiande, ayayegne nde vear a buu wajii masumu iwo, masonga, ti ewu e Nzeam: ⁹ djwi na vii alir masumu iwo, n'oshin opidjir wo ya me; ¹⁰ masonga, eli djwi n'oshin olekey me ntsa etay e Tea, opafingienagni ve; ¹¹ mby ewu, eli djwi na nkum e buu ene watobag ewu ende. ¹² Ndi na vii amuu entsign onkabagni, kansi opakugagni wog opeane ve. ¹³ Ntangu eyayia wur eyoshungagni enagn, Mpeve e masonga, ayovaragni nde ne masonga enkum, djwi apatuba vii ayim ya nde ndemie ve, kansi ayakabaka nde vii ayayugaka nde, ayokabakagni nde mpi vii aleye. ¹⁴ Ayampeaka nde me lokumu, djwi ayaveyaka nde vii ayim ya me, mby okabakagni. ¹⁵ Inkum ili Tea na wo, ili ya me; wog etuba me memen avey ya me, mby okabagni. ¹⁶ Esatsuga ivim i ntangu fioti, opafingyenagni ve, mby ivim i ntangu emuu ongyenagni, djwi ndetsu etay e Tea. ¹⁷ N'otuba onagn, walongoki inde imuu watuba wog na wog wuwun: "Djwi itekabande ene etuba nge: 'Ivim i ntangu fioti opafingyenagni ve, mby ivim i ntangu fioti ongyenagni djwi ndetsu etay e Tea?' ¹⁸ Wuwun: "Nge eling ntuba: 'Esatsuga ivim i ntangu?' Sipijia ve nge etuba nde." ¹⁹ Yezu emijia nde ndenden waling onjue, atuba nda wo ndenden: Oyueagni gnug na gnug na djwi iyitubime: 'Esatsuga ivim i ntangu, opafingyenagni ve; mby ivim i ntangu ongyenagni.' ²⁰ Vi-a-vii, vi-a-vii, mokabagni, ayaliyegnu, ayataragnu, kansi vear a buu ayayen wo osiang: ayayiagnu ngy-ngy, kansi ngy egnu ayatshim wo, ayakum wo osiang. ²¹ Onkear ntangu ewur nde, atsande nkum ngy-ngy djwi ntangu ende etikug, kansi ko ntangu esipwe mon, apafikana mpay iyiyug nde ve, djwi n'osiang e wur emipwe ne buu. ²² Gnu mpi opeane olagni ngy-ngy; kansi ayakeame ongyenagni, mby ayayiagnu n'osiangn'itura ignu. Kaku wur eyokumagni osiang ognu ve. ²³ Eshuu enagn, opafinjueagni ata na djwi imog ve. Vi-a-vii, vi-a-vii, mokabagni, vim enkum esiwignagnu ya Tea ne dzin ime, ayopeagni nde. ²⁴ Tii opeane, otowignagni ata vim emog ve ne dzin ime. Wignagni asivea gnu djwi osiang ognu ekug. ²⁵ Ntokabagni vii ane n'itsig, Ntangu wean eleye, eli mpafokabagni vii n'itsig ve, kansi asowung m'onkabagni wuo vii a Tea. ²⁶ Eshuu enagn, ayawignagnu ne dzin ime, epa ntuba memen ayapeame bisamu etay e Tea djwi na gnu ve; ²⁷ djwi tea ndemie aloleangagni djwi n'oshin oyindeang gnu, omidjiragni gnugnun me, apwime etay e Tea. ²⁸ Apwime etay e Tea, mby s'ayiime ne buu; opeane ndalim ne buu, ndetsu etay e Tea." ²⁹ Walongoki inde watuba wuwun: "Yenaka opeane otuba wuo-wuo, opitubi n'itsig ve. ³⁰ Opeane sitijia susun ojia vii ankum, kaku mfunu esoyue wur ata djwi ve, wog enagn edjir su susun apwiyie etay e Nzeam." ³¹ Yezu akeara ndenden: "Opeane osadjiragni?" ³² Yenagni ntangu eleye, ntangu ewo ewean etikug, esipagn gnu, wur na wur etay ende, asisagnu nsugn ko memie, kansi epa ndi memie ve, djwi Tea ali nda me. ³³ Ntokabagni vii ane djwi oyiagni na ngemba ya me. Ayopeagni wo mpay ne buu, kansi tsugagni ko biu, me, minunga buu ene."