¹ Polo, ntumwa - epa n'oshin oyileang vear to wur ve, kansi n'oshin oyileang Yezu Kristu ti Tea Nzeam eyikey ombiya n'ewa ² ti atwung ankum ayi ti me ne mvur i Nzeam i buu e Galatia: ³ Ngrasia eyii ya gnu ti ngemba e Tea Nzeam ti e Nkum Yezu Kristu, ⁴ eyijir na mpea djuung inde ndemie djwi na masumu isu, djwi, n'oshin oyileang Tea Nzeam, atelimi ne ntangu opeane ipwo iliso leti. ⁵ Ya nde, eyii lokumu e mvwe na mvwe. Amen. ⁶ Ndayen ngituka n'oshin omikagn gnu ntshima okwongo eveang eveang etay ende wur eyoviagni na ngrasia e Yezu Kristu. Ndayen ngituka na ngyug wuwun oledjiagni along amuu iky. ⁷ Epa eling ntuba wuwun along amuu iky aliko, kansi eli na vear amuu alokiagni oyug mpi aletshimi along a Kristu. ⁸ Kansi ata yug su to wanzio eyum dzug amiyia n'ondongagni along amuu ali oshin iky na along ayilong su, shingagni nde ayii na nkuu. ⁹ Oshin oyitubime nteang, mpi wean nkea ntuba diaka opeane: "Yug wur amolongagni along iky eli epa oshin omog n'along ayivey gnu, wur enagn aviy nkuu." ¹⁰ Djwi vim eleling me eli ojir o vear a buu to ojir o Nzeam? Me, nge ndeling mpea kiese ya vear a buu? Yug ndeling ko na mpea osiang ya vear a buu, epa ndi wur otshia e Kristu ve. ¹¹ Atwung ame, nding ojiagni gnugnun along ayolongagnime ekayum ya vear a buu ve. ¹² Nkavea along awo ya wur, kaku ko wur eyindong wog ve. Kansi Yezu Kristu wur eyii ngya mpea wog. ¹³ Omiyugagni oshwong o luzingu eme ntangu eyikime n'onkwon o Wayuda, oshin nge eyipiikime mpay mpi eyipeagnikime dibundu e Nzeam. ¹⁴ Ne kati evuru e Nzeam e Wayuda, aleveanikime ikub ndenga vear entsign a mvwe eme ti otuba ome. Ayikime na kikesa entsign mpi nkakieka ikagn ve ne vii ayisaky atea ame. ¹⁵ Kansi Nzeam eyinson me yum ntangu eyikime n'ipfugn i mea me, mpi eyimvii me na wuo ende, ¹⁶ aleang nde na ngyegne me Mon nde n'imono, djwi ntsu ndong along a Mon nde ya empaagn. Ne ntangu enagn, nkaling ilag ata ya wur emog ve. ¹⁷ Nkatsa ko ata Yeruzalem ve etay e vear ayikum wantumwa nteang eme. Kansi atsime buu e Arabia mby s'akey me Damasi. ¹⁸ Ne mby i mvwe isar, s'avean me Yeruzalem djwi na ntsa nsanga ti Sefasi mpi ayime m'ande nshuu djum n'itean. ¹⁹ Kansi nkayen ata ntumwa emuu ve, lima ko Jaki e otwung o Nkum. ²⁰ Ndokabagni ne nteang e Nzeam, ne vii amofugnagnime, epa modjimagni ve. ²¹ Mby s'atsime ne buu e Siria ti Silisia. ²² Me, ne mvuru i Nzeam iyidjir Kristu ne Yudea wankanjiaka ve. ²³ Ayugikiwo ko wuwun: "Wur eyitepiike mpay nteang atikum ndong lukwikilu eyilingikinde ndjag." ²⁴ Mvur i Nzeam iwo akearikiwo lukumu ya Nzeam djwi na me.