¹ Me Polo, ntumwa e Kristu Yezu oshin oyileang Nzeam, ti otwung osu Timontei, ² sitifugna vear amikwikila mpi atwung asu ne lukwikilu e Kristu atsangya ne Kolosi. Ngrasya ti ngemba e Tea eyi ya gnu. ³ Sikeara nsag- na-viye ya Nzeam, Tea e Nkum esu Yezu Kristu, mpi silesami ntangu enkum djwi na gnu. ⁴ Sitiyug lukwikilu egnu ya Yezu Kristu ti lutondo egnu e vear ankum amison wo djwi na Nzeam. ⁵ Olagni na lutondo ewo, djwi na etura emitsug gnu ne vii a wuo amowumagni wog ne dzug. Omiyugagni vii awo ntangu eyolongagniwo Otuba o kieleka, oshwong o wuo. ⁶ Oshwong o wuo oyikum etay egnu, eyiwur mbeam mpi eyipeagn buu opfugn. Etay egnu mpi eli ko oshin omog, yum eshuu eyiyug gnu Otuba o wuo mpi eyolongagniwo na masonga vii alir ngrasia e Nzeam. ⁷ Ene eli along ayolongagni Epafrasi, ewur esu otshia eli wur etsankie otshia o Kristu ne dzin ime. ⁸ Epafrasi wur etekabi oshin oleang gnu Mpeve. ⁹ Djwi na lutondo ewo, yum eshuu eyiyug su oshwong one, sipitsu ndem ve na nsama djwi na gnu. Sileling ya Nzeam oyuragni na ontiegn ti na waagn o Mpeve djwi ojiagni vii ankum aleang nde. ¹⁰ Silesami djwi oyiagni na epier eleang Nkum mpi ayii n'osiang ne vii ankum. Silesami djwi opuragni etshia e wuo eshin n'eshin mpi ofweagni n'oshin ognu onjia Nzeam. ¹¹ Silesami djwi Nzeam opiagni biu o nkembo ende djwi oyiagni n'inaagn mpi otshungagni itura ne vii ankum. ¹² Silesami djwi oyiagni n'osiang e nkeara nsag-na-viye ya Tea, nde wur eyopiagni biu o mvey ikab i vii a wuo eyipiinde vear amidjir ne mwinda. ¹³ Nde wur eyitelimi n'ekub e mpib mpi eyiteshwer n'ekub e Mon nde e nsiya. ¹⁴ Simivug djwi na Mon nde, ndug wur emiteveye ndolula i masumu. ¹⁵ Mon ali ignigning i Nzeam epitsuwo ngyen. Ali ekelamu e nteang ne vim ankum ayikii Nzeam. ¹⁶ Akiiwo vim ankum djwi na nde, ne dzug ti ne buu, vim atsawo ngyen na epitsuwo ngyen. Yug wampeve wali ne nkway ekub, wali na lokumu, wali n'ekub ti na biu, vim ankum nde wur eyikii mpi akiiwo vim ankum djwi na nde. ¹⁷ Ali ne nteang e vim ankum, mpi vim ankum agnim djwi na nde. ¹⁸ Ali ote o djuung, djuung eli dibundu. Ali itsin mpi wur enteang emibiy n'ewa djwi ayii Nkum e vim ankum ayikiiwo. ¹⁹ Djwi na wo, Nzeam s'oyurinde na bunzambi ende opfugn, ²⁰ mpi djwi ne mbug e Mon vim ankum akey ngaagn wa Nzeam ndemie. Nzeam amikeara ngemba n'aluung ande ne kulunsi. Nzeam atikeara ngemba ne kati e vim ankum ti nde ndemie, eyi vim ali ne buu, to eyi vim ali ne dzug. ²¹ Mby gnu, vear ayiike nteang nteang angingien etay e Nzeam mpi wambeni djwi na nginu ignu ti etshia egnu epwo. ²² Kansi opeane, amokearagni ngaagn n'ewa e djuung inde. Akinde ngwign djwi opuragni wasantu, vear akwon mbin ne nteang ende, ²³ yug omisatsugagni ko ne lukwikilu, yug okapeagni okwongo ve n'oshwong o wuo eyiyug gnu, eyilong wo ya vear ankum ne buu. Ene eli wog oshwong o wuo, me Polo, eyikum me wur ende otshia. ²⁴ Opean, nde n'osiang djwi na mpay ileyen me djwi na gnu. Me ko, ndalungisa ne djuung ime vim ayikwon ne mpay iyiyen Kristu djwi na djuung inde eyi dibundu. ²⁵ Ntikum wur otshia e dibundu e Nzeam, n'oshin omimpea Nzeam otshia ondongagni gnu otuba o Nzeam opfugn. ²⁶ Ene eli djwi oziy eyiwumike Nzeam vear wamvwe na wamvwe. Kansi opean atiyegne wog ya vear akwikila wa nde. ²⁷ Nzeam aling nde angyegne otsun ti nkembo e diswekamo ene n'ekiri enkum e buu. Diswekamo ewo eli: Kristu ne kati egnu, nde asopeagninde ekaagn e mviya nkembo eleye. ²⁸ Eli Kristu elelongsu. Silekabi vear ankum wayii na waagn mpi, silalong na waagn entsign djwi wakum vear akug ya Kristu. ²⁹ Wog enagn, ndekii otshia mpi ndelwi na biu onde, ndug elekii na biu onde ne kati eme.