¹ Mug, insur, m'ofugna yie Gayusi, eleang me ne masonga. ² Mon me ensiya, ndeang owong ne vii ankum mpi oyi na biuu ne djung, oshin osiwong ko moyo eyie. ³ Djwi atime n'osiang ntangu emiyia atwung mpi emipeawo ntiegn e masonga iyie. ⁴ Kaku osiang onen olenga oyi omiyug me ntangu eminkabawo wuwun aman ame walekien ne masonga. ⁵ Mon me ensiya yia na masonga ntangu enkum esadisayie atwung n'angingien. ⁶ Wog vear ayipii ntiegn e lutondo eyie ne nteang e vear evur e Nzeam. Akiyie wuo na nsadisa wo djwi na vwayazi ewo oshin oleang Nzeam, ⁷ oniang apwiwo djwi na dzin i Yezu Kristu, mpe wakavey ata vim emog ve etay empagn. ⁸ Sifwete ngyama vear oshin onagn djwi siyi s'awo vear akie otshia djwi na masonga. ⁹ Afugnme imon onkean djwi na vear evur e Nzeam, kansi Diatelefe etsandeang ngya nteang ewo wankum, atun nseyama. ¹⁰ Djwi na wo, yug ndeye, asikaname etshia elekinde ntangu eletubinde ndasu vii ankier. Apiletsuni ko kog ve, kansi apileyami atwung ve, mbiy vear aleyami atwung, alapum mpe alakimi n'evuru e Nzeam. ¹¹ Mon me ensiya oyadjie vii apwo, kansi djie vii awuo. Wur ekie wuo ali wur e Nzeam, wur ekie ipwo atoyen Nzeam ve. ¹² Demetriyusi avinde ntiegn e vear ankum mpe ntiegn e masonga wemie. Su ku sipea ntiegn mpe ojiagni gnugnun ntiegn esu eli e viavi. ¹³ Ntangu ebanime mfugn onkean one, ayime na vii entsign e ntuba. Kansi opean, ntun ntuba vii ankum n'onkean. ¹⁴ Nde n'ekaagn e ngya ongyen ntshuu ine. Oshin onagn, ayaveasu mpila e nsuls sug na sug. ¹⁵ Nzeam opii ngemba. Iwur isu ili nendien wayotuma mbea.