¹ Me, Paulu, ntumwa e Yezu Kristu, n'oshin oyileang Nzeam, kimvuka ti otwung osu Timoteo, situba ya gnu, vear evuru e Nzeam e Kolinto, ya wasantu inkum ili na buu e Akai. ² Ngrasia ti Ngemba iyum na Nzeam, Tea su ti na Nkum Yezu Kristu. ³ Nzeam, Tea e Nkum su Yezu Kristu, avey lukumu. Ali Tea eyi na ngiy mpe ali Nzeam etsankeya vear etura. ⁴ Nzeam asekeya etura ne mpay inkum ileyen su, ne mpila nde, ne mbug etura emisekeyande, su ko sikeyi vear amuu ali ne mpay itura. ⁵ Djwi, oshin o mpay i Kristu imiywowo ya su, oshin omog, Kristu alesekeyi itura. ⁶ Kansi yug sileyen mpay, eli djwi na nkeya itura ignu mpe djwi na lubiku to evug egnu ; ye yug itura isu ili ngikera, eli djwi na itura ignu ko ikeri. Itura ignu ilekeri viavi ntangu elevarignu oshin ompay oyiyenikisu ko. ⁷ Ekaagn esu ya gnu eli biuu, djwi sijia susun oshin oleyen gnu mpay, eli ko oshin olekeyignu itura. ⁸ Atwung asu, sipikug ndeang ve nde okwon ndjiagni vii ampay ayivisu ne Azia. Mpay iyiyen su alengewo biuu osu, abansisu susun sipafiyia diaka na luzingu ve. ⁹ Ne mpila nde sikwon ntsug etura ya su semie kansi ya Nzeam etsambiya vear n'ewa. ¹⁰ Eli Nde wur eyiselimi ne kigonsa ewa mpe eyaselima diaka n'oshin o bigonsa inagn. Simitsug ekaagn esu ya Nde susun ayakeande mbikisa su diaka. ¹¹ Gnu ko oletesadisagni ne mbug i bisamu ignu. Djwi ngrasia emiveasu djwi na bisamu i vear entsign eyi djwi na vear entsign mbug e nkeara nsag na viye ya Nzeam djwi na su. ¹² Djwi vim elepii vear osiang eli ontiegn olepii itura iso, ontiegn olelag oshin olekienikisu le buu ene ne nteang egnu na busantu ti na masonga ne viy a Nzeam, epa na wagn o wur ve kansi na ngrasia e Nzeam. ¹³ Kaku vii amuu akiy amofugnagnisu n'onkean one ve, esikwon gnu ntanga to ndjia. Mbansa memen, ¹⁴ oshin omijiagnu ata itaang gnugnun su ayayiasu kikuma osiang ognu l'eshuu o Nkum esu Yezu, oshin omog, gnu ayayiagnu kikuma osiang osu. ¹⁵ Djwi oshin oyijikime ngwign, alingikime ngya nteang etay egnu, djwi oviyagni ngrasia inagn mbala ipe. ¹⁶ Ayidikime na ndeg etay egnu djwi na ntsa Masedonia. Mbiy yug ntiyum Masedonia, nkey etay egnu, mbiy gnu otsintshignagni me ne Yudea. ¹⁷ Oshin obansikime ngagn, ayiwo ndetsug nteme ? Nge nginu iyiveyikime ayiwo nginu isu i vear, ne mpila nde ko ne ntangu emog nsikug ndjir "e, e" to nsikug ntun memen "kako." ¹⁸ Kansi oshin oyi Nzeam masonga, sipikug ntuba ve mbala emog "e, e" ti "kako." ¹⁹ Djwi mon e Nzeam, Yezu Kristu, eyilongsu kati egnu, Silive, Timoteo ti me akayia "E" to "kako." Kansi ayinde ko ndjir "E." ²⁰ Djwi alag ankum ayipii Nzeam ali ko "E" ne mbug ende. Yo yina, ne mbug ende, situba "Amen" djwi n'osiang o Nzeam. ²¹ Opean eli Nzeam wur elepii su ti gnu biuu ne kati e Kristu mpe eli nde wur eyisekwi epiem. ²² Ko ndug ko wur eyinag vear tampo ende mpe eyitsug Mpeve n'itura kamesi kidimbu e vim ayasepeande mbiy. ²³ Mvey Nzeam kamesi temwe eme ne moyo, djwi kikuma ekayiame Kolinto ve ayiwo ko djwi na nding wuo egnu. ²⁴ Ekayia ve djwi na nzikisa oshin oli lukwikilu egnu, kansi otshia olekisu ti gnu eli djwi na kiese egnu, n'oshin omidzimagnu ne lukwikilu egnu.