¹ Polo, ntumwa e Yezu Kristu oshin oyileang Nzeam, Ngulusi esu mpi Yezu Kristu, ekaagn esu, ² ya Timotei, mon me penza ne lukwikilu. Ngrasia, ngy na ngemba eyum ya Tea Nzeam ti ya Yezu Kristu Nkum esu eyi ya yie. ³ Ndokana ilong iyopime ntangu eletshikime Masedonia mpi eyokabime na nsatsiga ne Efeso djwi na nkaba vear amuu ayi kog na nkwon ndong along oshin omuu iky. ⁴ Mpi na nkwon ntsug atii n'itsig ti ntshim ipea nsuka. Oshin along anagn atsawo mpur ko ashia na isiy mpi ipikug nsarisa ve otshia o Nzeam na ntsa nteang ne lukwikilu. ⁵ Opean, itsin i nsiku iyopime eli lutondo etsangyum n'etura e wuo, ne nginu i wuo ti ne lukwikilu e masonga. ⁶ Vear amuu ayisapea vii ane okwongo wamijing mbug n'ituba-tuba i buzoba. ⁷ Waling nkum walongi i nsiku, kansi wapijia ve nge eletubiwo mpi djwi nge eletsug wo onen. ⁸ Kansi su sijia susun nsiku ili wuo yug wur akie oshin oleang nsiku. ⁹ Sijia susun wakakie nsiku djwi na vear a wuo ve, kansi djwi na vear apwo ti vear apilemfuki, djwi na vear apijia Nzeam ti vear a masumu, djwi na vear atsandjag atea ti amea awo wawe, djwi na vear adjag vear, ¹⁰ djwi na vear a bizumba, djwi ampeam akie mpite, djwi n'ampeam alekii mpite wog na wog ti ankear alekii mpite wog na wog, djwi na vear atsankama vear djwi watsug ampfum awo, djwi na vear oyang, djwi wantiegn oyang mpi djwi na vear ankum apikug n'along a wuo ane. ¹¹ Onkwon one elir otuba o wuo o Nzeam e lokumu, otuba eyimpiwo na ndong. ¹² Nkeara nsag-na-viye ya Nkum esu Yezu Kristu. Nde wur eyimpii biu, n'oshin oyiyen nde ndakug mpi n'oshin oyintsug nde n'otshia one. ¹³ Ayime wur eyitwike vii a Nzeam nteang, wur eyipike vear mpay mpi wur e nkier, e matata. Kansi Nzeam angyug nde ngy djwi alekikime vii anagn nkajiaka ve, mpi nkadjiraka ve. ¹⁴ Mbiy ngrasia e Nkum esu s'ayuiwo to, ti lukwikilu ti lutondo eli ya Yezu Kristu. ¹⁵ Ene eli otuba o masonga mpi efwete ngyama vear ankum, otuba owo eli Yezu Kristu ayinde ne bu djwi na mvuga vear amasumu. Ndi emog ne vear apwo anagn. ¹⁶ Kansi djwi na wo, Nzeam s'angyug nde ngy, djwi Yezu Kristu akug ngyegne ne mbug eme, wur enteang penza, oshin etura ende ejia nkwung. Akinde ngagn djwi nkum mbanu e vear akwikila wa nde djwi luzingu e mvwe na mvwe. ¹⁷ Opean, ya Nkum e mvwe na mvwe, ya Nkum epitsungwa, epitsuwo ngyen na viy, Nzeam emog, lokumu ti nkembo eyii ya nde mvwe na mvwe. Amen. ¹⁸ Vim ewigname ya yie, Timotei, mon me, oshin oyibikuliwo nteang djwi na yie, wuwun yie ofwete ndwa mbeagn i wuo, ¹⁹ n'oshin oli owum lukwikilu eyie ti nginu iwuo. Djwi ntangu emifanga wo nginu inagn, vear amuu wamidzig ne vay ne lukwikilu ewo. ²⁰ Ne kati e vear anagn, eli Himena ti Alexandre ayipime ne mbwo i Satana djwi wavey ilong na nkwon ntwe diaka Nzeam.