¹ Me, Polo, wur efugn onkean one. Sositene, ewur esu ne lukwikilu, ali nendien nda me, ntangu efugn me onkean owo. Nzeam aleang nde ngii emog e wantumwa i Yezu Kristu mpi anson nde djwi nkii otshia onde. ² Onkean one eli djwi n'evuru e Nzeam eli ne Kolinto, djwi na vear ankum amison Yezu Kristu djwi na Nzeam, ti wur enkum, ondii onkum olinde, emivie Nzeam djwi na nkie otshia onde ne dzin i Nkum esu Yezu Kristu, Nkum ewo mpi Nkum esu. ³ Nzeam, Tea su ti Nkum esu Yezu Kristu waloleangagni mpi walopeagni ngemba. ⁴ Atsame nkeara Nzeam eme nsag-na-viye nshuu inkum djwi na gnu, djwi na olwi o ngrasia emopeagni Yezu Kristu djwa ayoleangagni. ⁵ Kristu amopeagni vim entsign. Amosarisagni gnu na ntuba masonga inde mpi na njia Nzeam. ⁶ Gnu gnemie, along awo amosiamisagni biu n'oshin oletubignu vii alir Kristu. ⁷ Wog enagn kaku ikab imog imiveagnu iyim ya Mpeve e Nzeam ne ntangu ekwung gnu eshuu e Nzeam eyatsug nde Yezu Kristu Nkum mpi eyoyegne nde ya vear ankum. ⁸ Nzeam ayakie nde ko okumagni biu n'oshin onde, okiagni otshia onde tii ne nsuka, oshin onagn, gnu gnemie opayayiagni ata n'ipwo imog ve eshuu e Nkum Yezu Kristu eyakeande ne buu. ⁹ Nzeam ayakukisande vii ankum emiwong nde na nkie. Nzeam amoviagni, wog enagn s'emiveagnu oshin o njia ti ndeang Mon nde, Yezu Kristu, eli Nkum esu. ¹⁰ Atwung ame, ngwigna ya gnu ne dzin i Nkum esu Yezu Kristu, na ngyia ko n'otuba omog n'odzum, na nkwon ngyia akab-akab ne kati egnu. Yiagni n'etura ti na nginu imog ne vii ankum akiegnu, mby ayoyen gnu nde ne mpeve, oledjiagni ko vim oshin omog. ¹¹ Vear a Klowe ankabiwo wuwun otinamagni akab-akab ne kati egnu. ¹² Djwi ili kog. Konso wur ne kati egnu aleling ngyug ko longi ende. Wur na wur aletubi n'oshin onde. Emuu ndenden: "Me, ndadjie ko Polo." Emuu ndenden: "Me, ndadjie ko Apolosi." Emuu diaka ndenden: "Me ndedji Petelo." Mby wur e nsuka ndenden: "Kansi me, ndedji Kristu." ¹³ Kansi Kristu wapikug n'onkie akab-akab ve. Wakakwog Polo ne kulunsi djwi na gnu ve. Wur eyopeagni mbotika akopeagni mbotika ne dzin i Polo ve. ¹⁴ Ndakeara nsag-na-viye ya Nzeam djwi n'oshin oyipime mbotika ko ya ivim i vear fioti nendien; ne kati ewo Krispusi nda Gayusi. ¹⁵ Epa eli djwi-djwi ve, me apime vear anagn mbotika ne dzin ime. ¹⁶ (Opean ndakana memen apime mbotika mpi ya vear opeang o Stefanasi, kansi djwi na vear amuu, mpikani diaka ve memen apime mbotika ya vear amuu aky ne Kolinto). ¹⁷ Kristu ankantum djwi na ngyia mpea mbotika ya vear ve kansi djwi na ndong wur enkum oshwong o wuo elir Kristu ndemie. Ndong oshwong o wuo epa oshin eling waagn e otuba o vear ve kansi oshwong owuo eyum n'otshia o Kristu ntangu emiwande ne kulunsi. ¹⁸ Wog enagn, vear aletsu ewa djwi na vii a Nzeam wapikug njia along a kulunsi. Kristu awinde ne kulunsi djwi na wo, kansi oshwong o kulunsi kaku mfunu ve djwi na wo. Kansi djwi na su vear amivug mpi emikeara Nzeam ne luzingu, oshwong owo ekie ne kati esu na biu o Nzeam. Ngunsa emog afugn nde ngean n'Otuba o Nzeam: "Waagn e vear abansa wuwun wali ankea ntiegn, ayadjag me, mby ayakieme djwi vii ankum alewong ankea waagn akwon ngwong." ²⁰ Ankea waagn wali nonkagn n'okiri one? Wapijia ata vim ve ne vii a Nzeam. Kaku ata emog ekie otshia ompfugn, kaku ata emog eli biu n'otshia o ntsug esiy. Wog enagn, Nzeam s'ayegninde ndenden waagn enkum ankea waagn eli ifara. ²¹ Ne waagn o Nzeam, vear akakwikila wakakug njia Nzeam na waagn owo wemie ve. Wog enagn, Nzeam s'ayinde na kiese e ntum oshwong eyiyen vear a waagn kamsi vii a ankea ibwunu. Eli oshwong olelongsu mpi eli na biu e mvuga wur enkum esidjir wog. ²² Wayuda waling ngyien bidimu ne viy a vear djwi wadjir wur elong. Wagreki waling ontiegn ne mabansa ilir wanginu i mpeve. ²³ Kansi su silong ko oshwong olir Kristu, eyiwi ne kulunsi. Djwi na Wayuda oshwong o kulunsi e Kristu eli vim emog epikug wo ndjir ve djwi ewa ne kulunsi atsawo mpea epie epwo. Djwi na Wagreki, vii anagn ali vii a ibuma kibeni mpi epikug wo ndjir ve. ²⁴ Kansi djwi na su, vear ayivii Nzeam djwi sikug njia vii anagn, Kristu ali biu o Nzeam djwi na nunga ewa mpi ali waagn o Nzeam djwi na njia Nzeam mpi na ndonguka vii olir nde. Eseang e wuo epilir epuy e djuung to mabansa i vear; na Kristu wapitsu nkabula n'okiri etay emog Wayuda mpi etay emuu vear a buu iky mpi vear a mpuy i djuung iky. ²⁵ Wog enagn, vii ayen wo ibuma djwi na Nzeam alenga vii a waagn ankum asikug mbansa vear a buu. Ye ikab imilega okieg ne djuung, i Nzeam elenga vim ankum a vear a buu na biu. ²⁶ Atwung ampeam ti atwung ankear, liragni oshin o vear ayignu ntangu eyoviagni Nzeam. Liragni oshin nge eyignu kaku mfunu. Okayiagni vear alenga na waagn ne kati e vear ankum. Okayiagni ne mfunu entsign ve djwi vear walemfuki ya gnu. Okayiagni n'antsuru a lukumu ve. ²⁷ N'ondii onagn, Nzeam ason nde vii ayi kaku ntina ve ne nteang e vear apikwikili djwi vear awo wakwon nsama wemie. Nzeam amison vim akwon biu e buu ene, djwi ankea biu wyii na nsogn. ²⁸ Nzeam ason nde vii atsangyen vear apikwikili kamsi kaku mfunu ve djwi na ngyegne ndenden vii abansawo wuwun eli na mfunu entsign kaku wo na mfunu ata fioti ve. ²⁹ Nzeam akinde ngwign djwi wur akwon ngya na mpila e mvey lukumu ndemie mpi djwi akeari lokumu enkum ya Nzeam. ³⁰ Yug omibeam djuung iyie ti Yezu, eli djwi na Nzeam. Yezu nde wur eyiteyegni waagn o Nzeam, nde wur eyiteson djwi na Nzeam, nde wur eyitevugi mpi eyitewum. ³¹ Wog enagn, oshin omifugn wo n'onkean o Nzeam wuwun: "Wur eling mvey lokumu ende ndemie, avey lokumu ende ndemie na vii amikie Nzeam djwi na nde."